Македонија
Ковачевски: Преку отворен дијалог до македонски модел на уставни измени и забрзана евроинтеграција
„Во согласност со нашиот закон и Уставот, уставните измени се структуриран процес во кој работата почнува преку работа на работна група на експертско ниво, а во која работна група ќе бидат вклучени и претставници на политичките партии.
Министерството за правда веќе упати покана до политичките партии да делегираат свои претставници во работната група во која се поканети и врвните експерти по уставно право во државата и каде што ќе бидат изработени уставните амандмани.
Потоа дискусијата ќе биде ставена, односно материјалот што тие ќе го изработат ќе биде ставен на расправа во општеството, со оглед на тоа дека треба да се запознаат академската заедница, деловната заедница, невладините организации, граѓаните преку медиумите и нормално преку собраниска процедура за која е потребно двотретинско мнозинство“, изјави премиерот Димитар Ковачевски на денешната заедничка прес-конференција со хрватскиот премиер, Андреј Пленковиќ, кој е во официјална посета на земјата, одговарајќи на новинарско прашање дали за Владата е прифатлив предлогот на опозицијата уставните измени да се направат по хрватски терк.
Премиерот Ковачевски нагласи дека разни партии предлагаат разни модели поради што е потребно за ова прашање да се дискутира на експертско ниво за да се изработи предлог што одговара на македонското општество и кој одговара на нашите закони и на она што ние го очекуваме од нашата иднина како идна земја членка на ЕУ.
„Јас не кажав ниту дали сум за нешто ‘за’ ниту дали сум за нешто ‘против’. Јас сум за тоа да донесеме уставни измени со кои ќе ги отвориме кластерите по ноември и до 2030 година ќе станеме земја членка на ЕУ, со заштитен македонски јазик, со македонски идентитет и со македонска култура, која ќе ја збогати културата на ЕУ и на сите европски народи“, рече премиерот Ковачевски на прес-конференцијата во Владата.
Тој потенцира дека обврска на сите политички партии е исто како што било обврска на сите политички партии во Хрватска кога таа пристапувала во ЕУ – да ги поддржат стратешките одлуки на државата и тие да не станат предмет на дневнополитичка борба.
„За дневно олитичка борба постојат други прашања, на кои може да се разговара со политичарите, со опозицијата, меѓу опозициските партнери, меѓутоа ова се важни одлуки за иднината на сегашните и идните генерации, кои сакаат подобар животен стандард, сакаат врвни демократски институции, сакаат функционални услуги во своите држави, а тоа се добива кога државата ќе ги воспостави критериумите, практиките и процедурите и законите во согласност со европското законодавство и нивното функционирање на начин како тие функционираат во ЕУ.
И ќе повторам, македонските граѓани сакаат да живеат во ЕУ, ама сакаат да живеат во ЕУ дома, а не да живеат во ЕУ во туѓина, во држави што се членки на ЕУ“, изјави премиерот.
Во однос на новинарското прашање за евентуална средба со лидерот на ВМРО-ДПМНЕ, Мицкоски, за уставните измени, премиерот Ковачевски појасни дека веќе се одржала лидерска средба во декември на негова иницијатива, на која биле повикани сите претседатели на парламентарните политички партии, а на која, меѓу другото, се разговарало за усогласувањето во однос на потребата за уставни измени со цел продолжување на европските интеграции на државата.
„На таа лидерска средба сите лидери на политичките партии се сложија за потребата од носење уставни измени, освен еден, кој молчеше, и двајца, кои не дојдоа.
Затоа сметам дека нема потреба од лидерска средба со оглед на тоа дека ставовите се познати. Лидерска средба не е институционален формат за носење конкретни решенија, туку тоа е формат на кој секој ги кажува своите политички ставови во однос на одредено прашање“, рече премиерот Ковачевски.
Тој додаде: „Во однос на тоа да се води дебата за уставните измени, таа дебата е структурирана, значи за уставни измени дебата не се води на телевизија, не се води кога се пуштаат градежни работи на канализациски цевки во одредени општини.
Дебата за уставни измени се води во експертска работна група, каде што секоја политичка партија делегира свои претставници и каде што врз основа на уставно право и врз основа на она што е пропишано, се дефинираат амандмани, кои потоа се ставаат на јавна расправа“, коментира премиерот Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).