Македонија
Ковачевски: Подобрувањето и унапредувањето на состојбите во образованието е приоритет

Претседателот на Владата на Република Северна Македонија, Димитар Ковачевски, заедно со министерот за образование и наука, Јетон Шаќири, присуствуваа на настан по повод презентација на нова лабораториска опрема и на резултатите од научно-истражувачките проекти на Фармацевтскиот факултет при Универзитетот „Св. Кирил и Методиј“ во Скопје.
На настанот, премиерот Ковачевски, во изјава за медиумите, истакна дека новата лабораториска опрема и научно-истражувачките проекти на Фармацевтскиот факултет имаат значаен придонес во научно-истражувачката дејност и воопшто во развојот на фармацевтската индустрија.
Со опремата во вредност од 450 илјади евра, обезбедени преку Министерството за образование и наука и дел од Фармацевтскиот факултет, како што посочи премиерот Ковачевски, се зајакнуваат и развиваат потенцијалите и капацитетите на четирите лаборатории на овој факултет.
Држава која инвестира во науката, рече премиерот Ковачевски, инвестира во својата иднина, раст и развој, инвестира во образовани кадри кои се конкурентни во светски рамки. При тоа, премиерот потенцира дека заложбата на Владата не е да извезуваме кадри, туку да ги задржиме дома.
„За прв пат по 10 години, во 2021 година е спроведен Конкурс за финансирање на научно-истражувачки проекти за јавните научни установи и одобрени се 7 проекти од јавен научен интерес во износ од над 300 илјади евра на седум јавни научни установи во државата. Спроведен е и Конкурс за набавка на опрема за лаборатории и акредитација на лаборатории за сите субјекти кои вршат научно-истражувачка работа во рамките на кој се одобрени вкупно 44 апликации за финансирање. Дел од овие одобрени проекти се и проектите на Фармацевтскиот факултет, а лабораториите кои работат овде се сертифицирани согласно сите светски и европски стандарди и можат да работат на истражувања кои важат во ЕУ и во другите развиени држави. Се работи за тригодишни проекти, чија вкупна вредност е речиси 318 милиони денари или над 5 милиони евра, во кои над 70% е учеството на државата во реализацијата на проектите“, истакна премиерот Ковачевски.
Во изјавата, премиерот Ковачевски посочи дека паралелно се работи на повеќе нивоа и дека подобрувањето и унапредувањето на состојбите, генерално во образованието е приоритет. Во таа насока беше истакнато дека со Законот за високо образование од 2018 година, е вратена автономијата на универзитетите и е основан Национален совет за високо образование и научно-истражувачката дејност, како и Агенција за квалитет во високото образование. Воедно, во 2021 година за прв пат е потпишан Колективен договор со кој се обезбедува континуиран раст на платите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Реконструиран локалниот пат Бујковци – Мршевци

Општина Илинден изврши комплетна реконструкција на локалниот пат што ги поврзува населените места Бујковци и Мршевци, во должина од 1.100 метри. Во рамки на проектните активности на терен се изврши целосно санирање на постоечката асфалтна површина со поставување на нов асфалтен слој, извести Општината.
Градоначалникот на Општина Илинден, Александар Георгиевски, изврши увид во градежните активности и нагласи дека после многу години конечно се реконструира овој локален пат, кој е од исклучителна важност за повеќе населени места од општината како и дека со ова значително се подобрува секојдневието на жителите и се зголемува безбедноста на сите учесници во сообраќајот. Дополнително, ќе се постави ново ЛЕД улично осветлување во должина од над 400 метри, како и целосна хоризонтална и вертикална сообраќајна сигнализација согласно сообраќајниот проект.
„Изградбата на овој локален пат е дел од проектите што ги финансира Владата, а средствата за реализација се 60% од Владата на Република Македонија и 40% од Буџетот на Општина Илинден.
Локалната самоуправа и понатаму останува посветена на реализација на инфраструктурни и развојни проекти, со цел создавање современи, квалитетни и безбедни услови за живот на сите граѓани“, велат од Општината.
Македонија
Привршува реновирањето на училиштата во Аеродром пред почетокот на учебната година

В. д. градоначалникот на Општина Аеродром, Дејан Митески, утрово ги посети основните училишта „Браќа Миладиновци“, „Блаже Конески“, „Љубен Лапе“ и „Александар Македонски“, кои ги завршуваат последните подготовки пред почетокот на новата учебна година.
Во ОУ „Браќа Миладиновци“ летово беше реновирана училишната спортска сала, која ќе овозможи подобри услови за спортските активности на учениците. Во основното училиште „Блаже Конески“ се молерисуваат ѕидовите и се поставува фасада на новиот дел од објектот, каде неодамна беа инсталирани прозорци, што значи дека училиштето ќе биде енергетски ефикасно.
Во ОУ „Љубен Лапе“ целосно е реновиран главниот влез, вклучувајќи нова фасада, гранитни нелизгачки плочки на платото и скалите, како и железна ограда за поголема безбедност на учениците. Исто така, се реновираа две училници и се варосаа ходниците на првиот кат, а главниот влез се реновира и во училиштето „Александар Македонски“.
„Нашата цел е секое дете да учи во безбедна и современа средина. Со овие значајни инвестиции во реновирањата на училиштата, создаваме подобри услови за учење и развој на младите генерации во Аеродром. Ќе продолжиме да вложуваме во инфраструктурата за квалитетно образование и безбедност на учениците“, изјави Митески за време на посетата.
Македонија
(Фото) Пожарот во ловиштето Јасен не е изгаснат, еден крак сè уште активен

Пожарот во ловиштето Јасен сè уште не е изгаснат. Еден крак е сè уште активен. Дождот што заврна во мала количина не го изгасна, извести директорот на ДЗС, Стојанче Ангелов.
Како што изјави тој, се дејствува со два „ер трактора“ на Дирекцијата за заштита и спасување. Една жешка точка има високо на сртот, а од спротивната страна две жешки точки со чадење. Се работи за екстремно стрмен терен и терен со зимзелена шума, што е исклучително ризично да се спуштат луѓе.
„Нашиот фокус е со двата „ер трактора“ и со полицискиот хеликоптер да дејствуваме на оваа точка. Ќе дадеме сè од себе во текот на денешниот ден да го ставиме целосно под контрола и овој преостанат крак од пожарот“, додаде Ангелов.