Македонија
Ковачевски: Северна Македонија станува дел од семејството „Лидл“

Претседателот на Владата на Република Северна Македонија, Димитар Ковачевски, денеска присуствуваше на одбележувањето на подготвителните активности за изградба на „Лидл“ логистички и дистрибутивен центар во Северна Македонија во индустриската зона Речица во близина на Куманово, каде што имаше и свое обраќање.
„Северна Македонија официјално станува дел од големото семејство на познатиот трговски синџир ‘Лидл’, кој е препознатлив во регионот и пошироко по својот квалитет и цена. За мене претставува големо задоволство што овој германски гигант ја избра токму Северна Македонија, поточно оваа индустриска зона во селото Речица во близина на моето родно Куманово за изградба на модерен логистички и дистрибутивен центар во нашата држава.
Со инвестиција од 80 милиони евра и нови над 150 работни места во финалната фаза на нивното проширување, ‘Лидл’ планира најголема, но и долгорочна инвестиција во нашата држава, која сметам дека ќе отвори големи перспективи како за нашата национална економија така и за нашата држава, која преку ваквите успешни бизнис-модели ќе оствари поголем пробив на меѓународните пазари“, рече Ковачевски.
„Квалитетот на ‘Лидл’ успешно се градеше во изминатите 50 години и денес мрежата на овој познат трговски синџир е распространета во повеќе од 30 земји во светот и со над 12.000 маркети.
‘Лидл’ не е само обичен трговски синџир, туку изграден бренд, чии маркети во регионот се посетени и од многу наши граѓани бидејќи добиваат висок квалитет за поволна цена. Ние создадовме услови ова да го овозможиме дома.
Зад овој квалитет стојат луѓето, поточно над 376.000 вработени, кои се дел од реномираното семејство ‘Лидл’.
Денешниот настан е потврда за нашето долгорочно цврсто партнерство со нашите германски партнери и стимул за нашите економски политики, кои создаваат поволен и предвидлив деловен амбиент за странските инвеститори, кои ја избираат нашата држава како стабилно и безбедно место за своите инвестиции.
Верувам дека ‘Лидл’ ќе испише успешна приказна и во нашата држава како што тоа е случај и во регионот. Исто како што испишува во светски рамки бидејќи верува во луѓето и во нивниот потенцијал. Не случајно честопати велам дека најголем двигател на нашиот развој се луѓето. Тие се нашиот најголем адут и нашата најголема вредност. И затоа треба да вложуваме во нивниот развој“, изјави премиерот Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лукаревска: Секој ден ново задолжување, ВМРО-ДПМНЕ повторно покажува неодговорност

Владата предводена од ВМРО-ДПМНЕ повторно покажува неодговорност во управувањето со јавните финансии и секој ден ги задолжува граѓаните, реагираше пратеничката на СДСМ, Сања Лукаревска на денешната Комисија за финансирање на буџетот.
„Задолжување имаме за 94% завршен проект. Проектот за подобрување на основното образование, кој започна уште во април 2021 година, со предвиден рок за реализација до февруари 2026 година, според зборовите на заменик-министерот, досега е реализиран со 94,27%. Остануваат уште околу 5,7% од средствата што треба да се реализираат. И покрај тоа, денес сме сведоци на ново задолжување токму за тие преостанати 5,7%, со рок на отплата од 12 години и годишна каматна стапка од 18,5%. Ова е значително повисоко од претходниот рок на отплата од 11 години, кој важеше за првите 95% од реализираните средства“, рече таа.
Потенцираше дека ова е уште еден доказ за недоследност во политиките на владејачкото мнозинство.
„Добро е што имаме продолжување на проектите што ги започна СДСМ. Но, парадоксот е очигледен, овој проект е иницијатива на претходната влада, која сегашната власт ја презема со ново задолжување без никаков јасен план како ќе се враќаат средствата. Она што некогаш беше предмет на жестоки критики, денес е прифатено и се промовира како успех. Се прашуваме дали има реална стратегија за враќање на овие задолжувања.“, додаде Лукаревска.
Таа потсети и дека во периодот на владеење на ВМРО-ДПМНЕ беа изградени 74 училишта за 10 години, додека под СДСМ, во пократок временски период, беа изградени и реновирани 80 училишни објекти.“
Посочи дека владејачкото мнозинство, кое во минатото жестоко ја критикуваше СДСМ за задолжувањата, денес само иницира нови и нови задолжувања, не само преку унгарскиот кредит, туку и преку стратешкиот договор со Велика Британија, додека веќе е најавено и ново задолжување во висина од една милијарда евра.
Македонија
Адеми: Секој обид за укинување на Бадентер е обид државата да се врати назад

Од балансерот до Бадентер, она што се случува претставува повторен атентат врз Охридскиот договор, обвини потпретседателот на ДУИ, Арбер Адеми.
Тој рече дека повторените изјави на претставниците на Владата за преиспитување на Бадентеровото мнозинство не се политички лапсус, туку тие се дел од намерно осмислено сценарио за повторен атентат врз Охридскиот договор и врз уставните темели, кои гарантираат еднаквост и стабилност во државата.
„Од првиот ден на овој мандат оваа Влада и нејзините партнери следат опасна агенда: го укинаа балансерот, со што го нарушија правичното застапување на Албанците и другите заедници, не го почитуваат Законот за јазиците, ги ослабнаа Инспекторатот и Агенцијата и дозволија повеќе од 100 институции да го игнорираат албанскиот јазик, неправедно го намалија бројот на советници во општините, спротивно на Уставот, законот и одлуката на Уставниот суд, ја избришаа албанската дијаспора од политичкото претставување и ја доверија имплементацијата на Охридскиот договор на личности со отворени антиалбански и антиевропски ставови, како Иван Стоилковиќ“, рече Адеми.
Тој додаде дека владата сака да го укине и гласањето со Бадентер.
„Денес, истиот план напредува кон преиспитување на Бадентеровото мнозинство – уставниот столб кој штити од мајоризација и го обезбедува мултиетничкото функционирање на државата. Секој обид за укинување на Бадентер по изборите, како што беше најавено, е обид државата да се врати назад – кон неправдата и исклучувањето. Наместо да го исполни јавното ветување дека’нема влада без уставни измени’, ‘Вреди’ опстојува со празни оправдувања, со релативизирање на штетните политики и со покривање на етноцентричните политики. Фотелјата и политичкиот опстанок се ставени над Охридскиот договор и над европската интеграција на државата“, рече Адеми.
Македонија
Муцунски: Благодарение на СДС и ДУИ преговорите со ЕУ не може да бидат блокирани затоа што никогаш и не почнаа

Денес Венко Филипче повторно зборуваше за преговорите со ЕУ, како тие да се блокирани. Но вистината е тажна и едноставна – благодарение на СДС и ДУИ, тие преговори не можат да бидат блокирани, затоа што никогаш и не започнаа, напиша министерот за надворешни работи, Тимчо Муцунски на „Фејсбук“.
„Од нас нема да слушнете големи зборови без покритие и празни чекори во сегашноста. Нашата задача не е да нудиме изговори, туку резултати. Затоа ја движиме државата напред – таму каде што ѝ припаѓа: во Европа. И тоа не е слоган, туку реалност што ја градиме преку конкретни проекти: бесплатен роаминг за нашите граѓани во ЕУ, зелени ленти за нашите превозници, пристап до европскиот единствен систем за плаќање, партнерство во безбедноста и одбраната со ЕУ. Тоа се вистински реформи, а не празни флоскули.
Оттука, Венко е во право: зборувам и работам и за поевтин роаминг за македонските граѓани. Но зборувам и за зачуван идентитет, достоинство и гордост. И да, не зборувам за виткање кичма, за администратори, за договори под маса, за прифаќање уцени или ултиматуми, како што тие го правеа тоа. Тука има разлика – и граѓаните ја гледаат таа разлика.
И токму затоа ја повикувам опозицијата да дејствува рационално и разумно. Да не штети на европскиот процес, туку да помогне преку реформите дома. Затоа што ова не е борба за лични или партиски интереси. Ова е борба за граѓаните, за државата, за иднината. И ќе напредуваме само ако сите заедно ги ставиме државните пред партиските интереси“, напиша Муцунски.