Македонија
Ковачки: Во која НАТО-држава војска чува затвори, за преседанот да биде уште поголем, на ова е согласен и Пендаровски

На неспособноста на власта предводена од СДСМ и ДУИ ѝ нема крај.
Веќе половина година власта не може да се справи со сигурноста и обезбедувањето на затворите во Македонија, реагира Драган Ковачки, пратеник на ВМРО-ДПМНЕ.
Владата, вели тој, повторно си изгласа продолжување на кризната состојба во најголемиот затвор „Идризово“ и повторно, наместо да вработи професионална затворска полиција, затворот ќе го обезбедува Армијата.
Според него, овој невиден преседан не ѝ прилега на една држава членка на НАТО.
„Власта првпат оваа одлука ја донесе на 7 јуни 2023 година кога прогласи 30-дневна кризна состојба во затворот за потоа на 26 јули со гласовите на пратениците од парламентарното мнозинство да го продолжи за 3 месеци и сега на 7 ноември повторно со владина одлука го продолжува за 30 дена.
Цели 6 месеци не успеаја да го решат овој проблем и исто како и кога првпат беше прогласена кризна состојба, така и сега проблемите си стојат. Недостигаат над 100 затворски полицијаци, нема заштитна ограда во должина од 5 километри, нема скенер за рачен багаж, а нема ни целосен видеонадзор.
Ваква неспособност, ваков преседан и нарушување на имиџот на земја НАТО-членка досега е невиден“, оценува Ковачки.
Во која НАТО држава, во која членка на ЕУ или цивилизирана држава, војска чува затвори, прашува Ковачки. Ова, како што вели, е срам за една демократија.
„За преседанот да биде уште поголем, на овие очајни одлуки е согласен и претседателот на државата, Пендаровски.
Апелираме до власта да не се впушта во вакви опасни преседани, да престане со злоупотребата на Армијата на Република Македонија и да го решат проблемот со сигурноста и безбедноста на затворот. На оваа ситуација ѝ треба трајно и квалитетно решение, кое во иднина ќе ја гарантира безбедноста на оваа институција во која казна издржуваат сторителите на најтешки кривични дела, како тероризам или убиства.
Наместо да ја искористуваат Армијата, треба да го решат проблемот со вработување на затворска полиција, која е обучена и професионално и одоговорно ќе си ја врши работата“, додава Ковачки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ослободена од стапица мечка во Ресенско

Регионалниот ЦУК Битола, известува дека преку Единствениот број за итни случаи 112 во ЦУК била добиена пријава за заробено диво животно како последица од поставена криволовна замка во атарот на помеѓу селата Љубојно и Брајчино (Општина Ресен).
Пријавителот претпоставил во пријавата дека најверојатно се работи за мечка поради гласното рикање што се слушало во непосредна близина на мостот на Брајчинска Река.
„За оваа ситуација, од страна на ЦУК веднаш е известена Гранична полиција Маркова Нога, Полициска станица Ресен, Концесионерот – ловното друштво и други субјекти за понатамошно постапување. По интервенцијата на надлежните служби од Концесионерот -Ловното друштво, со присутен ветринар, од НП „Пелистер“ и од полицајци од МВР мечката е успиена и безбедно ослободена“, соопшти ЦУК.
Македонија
Средба Тошковски – Ходулин: Интензивна поддршка од ЕУ преку ИПА проектите за креирање полиција со европски стандарди

Министерот за внатрешни работи Панче Тошковски денеска оствари работна средба со претставници на Делегацијата на Европската унија, предводени од Стефан Ходулин, раководител на Одделот за соработка и Даница Стошевска, програм менаџер во канцеларијата.
На состанокот беше разгледана досегашната соработка помеѓу Министерството за внатрешни работи и Делегацијата на Европската унија во делот на спроведувањето на проектите финансирани преку Инструментот за претпристапна помош (ИПА).
Од страна на господинот Ходулин беше изразено задоволство од постигнатото во рамките на веќе спроведените проекти кои се имплементираат во министерството и изрази надеж дека посветеноста ќе продолжи со ист интензитет.
Министерот Тошковски во име на Министерството за внатрешни работи и се заблагодари на Делегацијата на ЕУ за досегашната поддршка и потенцираше дека истата е од исклучителна важност за министерството, и дека од наша страна ќе бидат обезбедени сите ресурси со цел максимално и рационално искористување на финансиската поддршка која е наменета за постигнување на европските стандарди во полициското работење.
За време на состанокот исто така се разговараше и за идните проекти кои се дел од Националната ИПА програма за 2025 година и следниот период, по што заеднички беше донесен заклучок дека ќе се продолжи со интензивни активности во наредниот период со цел финализирање плановите и проектите како основа за идното програмирање и обезбедување на сите неопходни предуслови од страна на министерството за внатрешни работи и целосна посветеност во нивната подготовка.
Двајцата соговорници изразија уверување и подготвеност за продолжување на одличната соработка и во иднина.
Македонија
Сиљановска-Давкова на средба со Радев: во фокусот трагедијата во Кочани и евроинтегративниот пат

Претседателката Гордана Силјановска-Давкова која е во Бугарија за да учествува во „Процесот Акаба“, пред медиумите соопшти дека ги посетила повредените пациенти кои настрадаа во трагедијата во Кочани и сега се на лекување во болницата „Пирогов“.
Рече дека се чувствуваат многу подобро. Таа оствари средба и со бугарскиот претседател Румен Радев.
Фокусот бил на трагедијата во Кочани, но се разговарало и за одблокирање на нашиот евроинтегративен пат, при што двајцата заклучиле дека се неопходни позачестени средби. Претседателката нагласила дека се можни компромиси и очекува исчекор на тој план.
Оддавајќи му признание на Радев таа кажа дека тој бил првиот претседател којшто утрото по трагедијата во Кочани и се јавил и и понудил секаков вид на помош.
„Прв ми се јави претседателот Радев. Благодарам. За жал или за добро, понекогаш трагедијата го вади доброто во сите нас, не политичкото, туку човечкото. Ова нема да може да го заборави ниту еден политичар од двете страни“, ја пренесуваат изјавата на Силјановска-Давкова бугарските медиуми.