Македонија
Ковачки: Петровска да каже дали адресата на живеење ѝ е иста со адресата на хациендата со базен, а Ковачевски кога ќе ја разреши
На денешната седница во Собранието на Македонија пратеникот од редовите на ВМРО-ДПМНЕ, Драган Ковачки, постави две пратенички прашања, едно до министерката за одбрана Славјанка Петровска, дали според податоците во нејзината лична карта адресата на живеење ѝ е иста со адресата на луксузната хациенда со базенот во Радишани, и второ прашање до премиерот Димитар Ковачевски, дали по понижувањата кон Петровска планира да достави предлог за разрешување на министерката.
„Имам две пратенички прашања, ова е анкетниот лист што го има доставено министерката Славјанка Петровска до ДКСК и тука нема пријавено никаков имот, има пријавено само два кредита и кредитни картички. Во 2007 година на парцелата којашто неспорно била во сопственост на министерката Петровска гледате дека нема никаква градба. Во 2009 година на таа парцела веќе гледате дека има куќа, бесправно изградена, без потребната градежно-техничка документација. Веднаш по тоа на лице место излегуваат лица од катастарот, прават увид и согласно тие системски проверки, го запишуваат имотот на име на министерката Славјанка Петровска. Во 2012 продолжува со дивоградба на објектот и гледаме дека веќе е изграден базен. Во 2016, тоа е последната година кога е градена дивоградбата, гледаме дека дополнително е изграден уште еден објект на местото во сопственост на почитуваната министерка. Министерката имаше и прес каде што кажа дека продала некое земјиште, но со цел да ја покријат нејзината лага веднаш на помош го побараа и директорот на катастар, којшто кажа дека земјиштето неспорно до 2020 е во сопственост на министерката. значи Петровска вели дека пред десеттина години го продала, директорот вели дека до 2020 година е во нејзина сопственост, а податоците од катастарот велат дека сè уште е во владение на Петровска. Пред мене имам сметка за вода којашто гласи на името на таткото на министерката со адреса на луксузната хациенда. Дали според податоците во вашата лична карта адресата на живеење ви е иста со адресата на луксузната хациенда со базенот во Радишани“, праша Ковачки.
Пратеникот Драган Ковачки постави и второ прашање до премиерот Ковачевски, дали по неговите неконтролирани испади со кои ја понижил министерката за одбрана како жена планира предлог за нејзино разрешување.
„Второ прашање до премиерот, дали откако со вашите неконтролирани испади ја пониживте министерката за одбрана како жена, а потоа и како функционер, а согласно изнесените аргументации на оваа говорница, планирате да доставите предлог до собранието за разрешување на министерката за одбрана“, нагласи Ковачки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Герасимовски: Засилените контроли на Секторот за инспекциски работи на Општина Центар продолжуваат
Во заедничка акција инспекторите за животна средина на Општина Центар, хигиеничарите од ПОЦ и Министерството за внатрешни работи исчистија и заградија напуштен објект кој пред извесен период бил диво населен и претворен во дива депонија и кој претставуваше извор на зарази. Објектот се наоѓа во непосредна близина на гимназијата Р.Ј Корчагин, информираат од Општина Центар.
Градоначалникот на општината, Горан Герасимовски ги повикува граѓаните да ги пријавуваат вака запуштените објекти.
„ Овде затекнавме мини депонија која навистина негативно влијае не само на здравјето на околината туку и на здравјето на самите граѓани кои диво се населиле. Нашата цел како општина е да ги исчистиме и обезбедиме сите слични објекти и поради заштита на здравјето на граѓаните кои живеат во нивна околина и поради безбедносни причини. За таа цел ги повикувам сите жители на Центар да ги пријавуваат ваквите запуштени места со цел да ги исчистиме, обезбедиме и затвориме од повторно насилно вселување“, потенцира Герасимовски.
Општина Центар, како што се истакнува во соопштението, е решена да воведе ред во напуштените објекти и сите сопственици кои имаат вакви објекти ќе бидат задолжени истите да ги одржуваат, безбедноста на граѓаните и одржувањето на јавната хигиена во општината е на прво место.
Македонија
Средба Филков-Вал: дискутирано за планираните реформи во правосудството
Министерот за правда Игор Филков оствари средба со амбасадорот Килиан Вал, шеф на Мисијата на ОБСЕ во Скопје.
Се дискутираше за планираните реформи и проекти во правосудството во насока на владеење на правото . Посебен осврт беше даден на Предлог законот за кривична постапка за што од страна на амбасадорот Вал беше соопштено дека ОБСЕ финансиски ќе го поддржи преводот.
Мисијата на ОБСЕ во Скопје во соработка со Министерството за правда ќе биде и натаму активно вклучена во подготовката на Развојната секторска стратегија 2024-2028, како и во работните групи за одредени законски измени, истакнуваат од министерството.
Нагласуваат дека соработката и дијалогот во наредниот период ќе се интензивираат со цел да се реализираат планираните реформи во правосудството.
Македонија
Германската министерка на средбата со Муцунски: Потребна ни е обединета ЕУ, која нема да биде блокирана од одделни земји членки
Министерот за надворешни работи и надворешна трговија, Тимчо Муцунски денес во Берлин оствари билатерална средба со сојузната министерка за надворешни работи на Сојузна Република Германија, Аналена Бербок, што претставува прва официјална средба на двајцата министри по преземањето на министерската позиција на МНРНТ Муцунски.
Фокусот на разговорите на средбата беше за одличните политички и економски односи помеѓу двете земји и цврстото партнерство во изминатите 30 години од воспоставувањето на дипломатските односи, за поддршката на Германија на нашиот евроинтегративен пат, како и за други актуелни теми од регионален и европски безбедносен аспект.
Министерот Муцунски изрази благодарност за континуираната поддршка и ангажманот на Германија за досега постигнатиот напредок на нашата земја на патот кон ЕУ, како и за посветеноста на Германија за забрзување на целокупниот процес на интегрирање на земјите од Западен Балкан, особено во рамки на иницијативата на Берлинскиот процес.
“Германија е предводник на европската перспектива на нашата земја и на целиот регион, а силниот фокус на спроведување на реформите останува во центарот на пристапот на новата влада“, нагласи Муцунски.
Министерот Муцунски истакна и дека Германија е клучен политички и економски партнер на нашата земја и еден од најголемите трговски партнери во годините наназад, при што изрази очекување за натамошно јакнење на економското партнерство меѓу двете земји и зголемување на обемот на трговска размена преку нови форми на заемна соработка.
На средбата и во рамките на прес-конференцијата, министерот Муцунски изрази убедување дека деблокадата на евроинтегративниот процес преку одржување на втората меѓувладина конференција и итен почеток на преговорите не само што ќе ја зајакне европската реформска агенда во Регионот, туку истиот ќе го направи и многу поотпорен на влијанијата од трети земји, притоа тој нагласи дека деблокирањето на нашиот евроинтеграциски процес е прашање од стратешки и безбедносен интерес, како за Регионот, така и за постојаните заложби на ЕУ.
Говорејќи за евроинтеграцијата и европската перспектива на Република Северна Македонија, германската министерка за надворешни работи Ана Бербок истакна дека само обединета Европска Унија која нема да биде блокирана од поединечни земји членки, може во кризни времиња целата своја тежина да ја стави на вагата на глобалната политика.
„На нас како Германија ни е посебно важно, да напредуваме во квалификуваното мнозинство, а не само во едногласното одлучување, што би значело дека во пристапниот процес би можеле да одлучуваме со мнозинско, а не едногласно одлучување“, нагласи таа во својата изјава.
Потенцирајќи ја силната поддршка од Германија и фактот дека македонската влада посветено напредува во реформскиот процес, германската министерка Бербок ја спомена важноста на реформите во правосудството, борбата против корупција и зајакнување на правната држава.
Бербок ја нагласи и нашата улога во регионалните иницијативи и притоа додаде дека Република Северна Македонија до сега преземала сериозна одговорност, пред се во рамки на „Берлинскиот процес“, а потоа и во мултилатералните иницијативи на меѓународната сцена, односно во Советот за човекови права на Обединетите Нации и Извршниот совет на организацијата за забрана на хемиско оружје.