Македонија
Ковачевски за неформалната вечера со Сорос: Кога станавме независна држава, а сметката ни беше на нула, првата помош дојде од нивните фондови

Премиерот Димитар Ковачевски, одговарајќи на прашањето зошто на вечератa со лидерите на Западен Балкан биле присутни и Александар Сорос, Али Ахмети и Артан Груби, одговори дека тоа била неформална вечера, на која, покрај лидерите од Западен Балкан, седеле и искусни луѓе, кои, како што рече, најмалку дваесет години се во македонската и во регионалната политика.
„Форматот беше таков каде што можеа да седат навистина искусни луѓе, кои се 20-30 години во македонската и во регионалната политика и да размениме исти, слични или различни мислења и затоа и составот беше таков. Затоа беа и претседателот Пендаровски, и претседателот на ДУИ и премиерот на Косово, помошник-државниот секретар на САД, беше една неформална вечера на која беше и господинот Сорос, кој од првиот ден на нашата држава неговата фондација има позитивен удел во развојот на независна Република Северна Македонија“, рече Ковачевски.
Потсети на историски момент.
„Ќе ви кажам еден податок а тоа можете да го проверите и во Народната банка. Кога ние станувавме независна држава и кога нашите државни резерви беа еднакви на нула и кога тековната сметка на Македонија во тоа време беше нула, првиот ‘бриџ бон’ што Македонија го добива во тоа време е токму од фондовите на Сорос. Ако се сетите, вие сте помлади, но може Гордана Силјановска и Ѓорге Иванов да ви кажат, нивните први интернет-домени се со предзнакот на Сорос“, појасни Ковачевски.
Се работи, како што рече, за човек што има многу искуства со нашата држава и кои покажале дека помогнале и во развојот на демократијата и во формирањето на институциите, пред сè, невладините, учество во развојот на медиумите и затоа, според Ковачевски, и Сорос можел да каже свое видување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Изградба на нов саемски комплекс во Скопје: се разгледуваат можности, најавија од Владата

Директорот на Службата за општи и заеднички работи, Ивица Томовски, денеска одржа работна средба со претставници на „Скопски саем“, на која дискутираа за потребата и важноста од изградба на нов саемски комплекс во Скопје. На средбата беа разгледани можностите за локација, инфраструктурни услови и иновации кои би го направиле новиот саемски простор конкурентен на регионалните и меѓународните пазари.
„Враќањето на „Скопски саем“ во сопствен објект не само што ќе ја оживее економската активност, туку и ќе го зајакне регионалниот и меѓународниот профил на Македонија како важен трговски и деловен центар“, изјави директорот Томовски, истакнувајќи го значењето на оваа иницијатива за развојот на економијата.
Даниела Глигоровска, директорка на „Скопски саем“, ги нагласи предностите од обновување на саемската активност, која веќе неколку години не се одржува во свој објект.
„Саемите претставуваат клучни настани за промоција на македонските производи и услуги, како и за создавање на нови можности за странски инвестиции и соработка. Изградбата на современ саемски комплекс ќе ги отвори вратите за нови можности и ќе создаде услови за зајакнување на економијата“, додаде Глигоровска.
На средбата беше договорено меѓуинституционалната соработка и поддршка да продолжи и во периодот што следи подетално да се разгледаат сите аспекти и можности за изградба на нов објект за потребите на саемските манифестации.
Македонија
На делницата Миравци – Демир Капија од 11 часот сообраќајот се одвива по една коловозна лента

На патниот правец А1, на делницата Миравци – Демир Капија, од 11.00 часот сообраќајот ќе се одвива по една коловозна лента во должина од 1000м. поради изведување на градежни работи на пат, (расчистување на одрон), извести АМСМ.
На самото место поставена е соодветна сообраќајна сигнализација.
„На учесниците во сообраќајот им препорачуваме внимателно управување со возилата, прилагодување на брзината спрема условите на патот, како и почитување на поставената сообраќајна сигнализација“, велат од АМСМ.
Македонија
„Дали Зоран Заев во Дубаи гради високи згради од над 50 ката и дали на тој начин ја стекнал златната виза“, прашува ВМРО-ДПМНЕ

„Времето изминува, СДС се занимава со сè и сешто, шета од тема на тема, но за темите што ги интересира цела јавност ги нема ни збор да кажат. Веќе извесен период прашуваме и ги повикуваме СДС, Венко Филипче и Зоран Заев да одговорат дали поседуваат златни визи за Дубаи? Ако поседуваат, тогаш на кој начин ги стекнале имајќи предвид дека таквите визи се стекнуваат со вложувања или инвестиции кои надминуваат и неколку милиони“, прашуваат од ВМРО-ДПМНЕ.
„Дали Зоран Заев во Дубаи гради високи згради од над 50 ката и дали на тој начин ја стекнал златната виза? Ако е така, колку милиони однесе таму и од каде му се парите?
Оттука, го поставуваме и прашањето, дали и Филипче исто така е поврзан со оваа афера, па затоа од неговиот ментор Заев е поставен на чело на СДС за да му го чува грбот?
Сите знаат дека Филипче е верна сенка на Заев и дека тие двајцата се прават заедно, па оттаму е и дилемата дека во аферата со висококатниците во Дубаи можно е и тој да е вклучен.
Овие двајца беа неразделни и за време на нивното заедничко владеење, па така се богатеа врз грбот на граѓаните местејќи тендери, посебно во ковид кризата каде што живи беа фатени како договараат милионски провизии за набавка на вакцини.
Венко Филипче и неговиот ментор Заев со години наназад ја уништуваа и ограбуваа државата, па тие пари сега ги вложуваат во приватни бизниси. Во јавноста глумеа дека ја спасуваа Македонија, но тие само се спасувале самите себеси и милиони спечалени врз грбот и здравјето на граѓаните.
Зачудувачки е нивниот молк и фактот што на сите овие прашања и дилеми Филипче, Заев и СДС, ниту реагираат ниту пак ги демантираат. Можеби затоа што немаат аргументи и затоа што сите овие дилеми се точни, одговор треба да дадат тие.
Но едно е сигурно, СДС, Заев и Филипче, се синоним за криминал, неспособност и национални предавства“, соопшти ВМРО-ДПМНЕ.