Денес при посетата на тренинг центарот во Идризово, каде што беше промовиран новиот пристап за третман на лица прекршители на законите, претседателот на Владата Христијан Мицкоски даде изјава и во врска со историскиот договор за стратешко партнерство со Обединетото Кралство.

„Првата причина е стратешка и политичка. Колку повеќе стратешки договори и вакви партнерства имаме со големи и значајни светски фактори, како што е Обединетото Кралство, толку подолгорочна ќе биде стабилноста и перспективата на Македонија како држава, но и на граѓаните. Јас на овој договор гледам како на чекор напред во таа насока. Убеден сум дека ваквиот вид пријателство и партнерство може да донесе само добри работи за граѓаните“, изјави Мицкоски.

„Во економска смисла, тоа е втората причина, веќе споменавме дека имаме рамка со која ни се ставаат на располагање околу 6 милијарди евра, или околу 5 милијарди фунти. Станува збор за два типа на проекти кои се договорени за работа.

Првиот е реконструкција, модернизација и изградба на уште еден колосек на пругата што е дел од Коридорот 10, на потегот од Табановце до Гевгелија.

Втората група проекти се поврзани со здравството: конечно завршување на Клиничкиот центар Штип, заедно со Медицинскиот факултет и студентскиот дом со 200 легла, завршување на здравствената установа во Кичево и реконструкција на Клиничката болница во Тетово“, рече тој.

Тука, како што нагласи, спаѓаат проекти од енергетиката, проекти од транспортот, како и проекти од областа на медицината и здравството.

„Можно е, во догледно време, доколку сè функционира на начинот на којшто очекуваме, да биде изграден и големиот клинички центар во Скопје. Така што, придобивките ќе се мултиплицираат, и јас сум убеден дека како држава сме на прагот на еден трансформационен период.

Станува збор за трансформациони проекти кои што имаат за цел да додадат вредност, не само во квалитетот на живот на граѓаните тука, туку и генерално во македонската економија“, дециден е Мицкоски.

Најави дека во престојните денови ќе биде остварена и посета на Лондон каде високи делегации од двете влади ќе потпишат договор.

Министерот за правда Игор Филков присуствуваше на промоција на надградениот систем за електронски надзор во тренинг центарот на КПД Идризово.

Овој процес кој е резултат на сериозна работа и посветеност на Министерството за правда, Управата за извршување на санкциите и поддршката од нашите партнери, претставува чекор напред во реализацијата на европските стандарди за извршување на казните и унапредување на човековите права.

,,Електронските алки не се само технолошки уреди, тие се алатка за реформа. Тие се симбол на една нова, современа пробациска политика. Преку нивното користење, овозможуваме: Алтернатива на затворот, намалување на пренатрупаноста во казнено-поправните установи, подобра ресоцијализација и поголема безбедност за граѓаните. Ова не е само техничка надградба, тоа е јасна определба дека правдата може да се спроведува со достоинство и почитување на човековите права”, истакна Филков.

Дополнително, како што нагласи, со новиот Закон за пробација, чиј предлог е веќе подготвен во Министерството за правда, многу скоро ќе биде објавен на ЕНЕР, се воспоставува правна рамка која овозможува поширока примена на куќен притвор, условен отпуст и ресторативна правда, сето тоа под буден, но хуман надзор.

,, Со тоа, ги охрабруваме надлежните да пристапат кон пробацијата многу похрабро за во иднина заеднички да ја отстраниме црната дамка која што беше фрлена досега на изречените мерки, куќен притвор. Довербата и сигурноста во системот мораме да ги вратиме.

Ќе продолжиме да работиме на реформи кои носат вистинска промена, и ќе изградиме правосудство кое е достапно, правично и во служба на граѓаните”, порача министерот за правда, Игор Филков.

Градоначалникот на Центар, Горан Герасимовски информира дека викендов беше поставена нова подлога на детското игралиштe во паркот во Капишец, a реконструкцијата на паркот во оваа населба е во завршна фаза.

На детското игралиште е поставена вештачка трева како горна подлога, при што се задржани постојните гумени плочи под неа кои служат како амортизирачки слој. Подлогата е во согласност со стандардите за квалитет и безбедност, со цел да се обезбеди заштита на здравјето на децата и заштита на животната средина, според Општината.

„Викендов поставивме нова подлога на детското игралиште во Капиштец, како дел од завршната фаза на целосната реконструкција на паркот. Во следните денови ќе биде поставена дополнително детска урбана опрема од лулашки, клацкалки. Во изминатиот период поставивме ново лед осветлување, изградивме нова патека за движење, засадивме ново зеленило и декоративни садници, со што се обновени вкупно 7.800 квадратни метри јавна површина. Апелирам до сите граѓани да се грижиме за новата урбана опрема, да не ја оштетуваме и заеднички да создадеме и одржуваме почиста, побезбедна и поубава животна средина за сите, особено за најмладите“, вели Герасимовски.