Македонија
Колев: Има индиции за злоупотреби поврзани со автопатот Штип – Миладиновци

Повеќе од една година институциите не успеваат да се справат со пуштањето на автопатот Штип – Миладиновци, изјави претседателот на Граѓанско-демократска унија, Петар Колев.
Тој рече дека не само што граѓаните не може да користат нешто за што ќе плаќаат, туку никој не собрал смелост да пројави одговорност и да ни соопшти што е проблемот.
„Не е завршен проектот? Има ли пропусти кај изведувачите, подизведувачите или можеби контролата? Има ли некој одговорен за тоа? Колку ќе нè чини автопатот? Има ли луѓе од претходната и сегашната власт кои злоупотребиле средства предвидени за овој проект?
Некакви тендери наместени, провизии, проценти? И, најважно, ќе сноси ли некој одговорност за сето ова?“, праша Колев.
Тој побара од премиерот Зоран Заев да пројави одговорност пред граѓаните од истокот, да излезе и да каже јавно што е проблемот.
„Обелоденете сѐ што е поврзано со автопатот, а има индиции за злоупотреби. Ја разбравме неможноста на МВР и Спасовски да се справат со живи луѓе што може да се движат (го визирам економскиот гуру Груевски и неговиот патент во економијата како да станеш милијардер за 10 години?), но проектите, кредите и банкарските сметки, како и тендерите и друго, се на хартија, нема како да им избегаат. Во спротивно, длабоко во мене, но и во голем дел од граѓаните, останува чувството за политички пазар помеѓу СДСМ и ДПМНЕ, во кој новата власт ја заштитува старата од кривична одговорност во замена за полна власт и непречено решавање одредени прашања. Не би шпекулирал со урбани легенди, но злите јазици, како во земјата така и надвор, зборуваат за материјални репарации во замена за мир и слобода“, истакна Колев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода дел од Општина Центар

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска (Вторник), поради изведување на водоводен приклучок од ф-80 мм на ул. Никола Тримпаре бб, прекинато водоснабдување ќе имаат корисниците на дел од ул. Никола Тримпаре, Дебарца и Борка Талевски.
Водоснабдувањето ќе биде прекинато од 09:00 часот до завршување со работните активности.(Општина Центар)
Македонија
Променливо облачно и нестабилно со локален пороен дожд, грмежи и засилен ветер

Времето денеска, променливо облачно и нестабилно со локален пороен дожд, грмежи и засилен ветер. Наместа процесите ќе бидат поинтензивни во форма на невреме со пообилен пороен дожд, грмежи, силен ветер и изолирана појава на град.
Минималната температура ќе биде во интервал од 6 до 13, а максималната ќе достигне од 21 до 29 степени.
Во Скопје, ќе биде променливо облачно со сончеви периоди. Попладне во делови од котлината ќе биде нестабилно со пороен дожд, грмежи, засилен ветер и услови за краткотрајно невреме со изолирана појава на град.
Минималната температура ќе се спушти до 11, а максималната ќе достигне до 28 степени.
Во наредните денови следува период на променливо облачно и нестабилно време со честа појава на локални врнежи од дожд и грмежи.
Наместа процесите ќе бидат поинтензивни во форма на невреме со пообилен пороен дожд (за кратко време поголема количина), грмежи, силен ветер (над 60 km/h) и изолирана појава на град.
До петок ќе дува умерен до засилен јужен ветер и температурите ќе бидат без поголема промена, а од сабота со засилен северен ветер ќе бидат во опаѓање.
Македонија
На многумина ќе им бидеме пречка, но како премиер нема да отстапам од правото да говориме на македонски, јазикот е нашиот неспорен идентитет, вели Мицкоски

Пред осумдесет години, на оваа почва, се кодифицираше македонскиот литературен јазик. Тоа беше повеќе од административен чин. Тоа беше признавање на една длабока, искрена, долга и тешка борба на еден народ за свое име, свој израз и своја самобитност. Оваа кодификација не произлезе преку ноќ. Таа беше плод на децении работа и истрајност на големи луѓе и на генерации интелектуалци, учители, поети, новинари, читатели. Секој од нив вложи збор, мисла, срце, истакна премиерот Христијан Мицкоски на одбележувањето на 80-годишнината од кодификацијата на македонскиот стандарден јазик.
Македонскиот јазик, кажа Мицкоски, живее во мислата на секој Македонец каде и да е.
„Во 21 век судбината на малите народи е постојано да се потврдуваат, борат и држат до своето право на идентитетско обележување. Најмоќните пропаганди се тие кои удираат по идентитетските обележја. И неретко ние како нација сме ги имале таквите удари, а болката е поголема кога тие доаѓаат од домашните луѓе кои ваму или таму, поради разноразни лични или лукративни интереси ќе оспорат или невнимателно ќе внесат сомнеж кон некоја историска вистина која нас не потврдува како народ и нација. Јазикот е нашиот бедем и неспорен идентитет, и јас како премиер нема да отстапам од нашето цивилизациско право да говориме на македонски, да се претставувам на македонски, да се радуваме, тагуваме и да пееме на нашиот многувековен, ќе повторам многувековен македонски јазик. Тоа го правеле нашите дедовци, тоа ќе го прават и нашите деца. Затоа на многумина ќе им засметаме, на неколкумина ќе им бидеме пречка, но секогаш знам дека работам за моите граѓани и нашата заедничка татковина“.
Владата, како што рече, ќе продолжи да инвестира во македонскиот јазик, преку образовни реформи, дигитални проекти, речници и стандардизација.