Македонија
Командир осуден за мито на кого не му е прв скандал бил на смена во „Идризово“, кога избега затвореникот
Срѓан Димитриевски е командирот кој бил на смена вчеравечер во „Идризово“, кога се случи бегството на затвореникот осуден за обид за убиство и дрога, а полицаец беше повреден, дознава „Макфакс“.
Димитриевски е лице осудено за примање мито како полициски службеник од МВР. Од таму добил отказ, па стана командир во затворот. Тој беше дежурен командир и за време на новогодишната вечер, кога млад затвореник беше брутално претепан. Директорот за санкции, Марјан Спасовски во интервју, кажа дека бил запознаен со сите овие факти, но не гледаше зошто би го тргнал од функцијата – командир. Тој додаде и дека контактира лично со командирот Димитриевски, но не сакаше да ги покаже пораките во неговиот телефон.
На прашање дали го познава командирот Димитриевски, директорот Спасовски кажа: „Да, тој е командир во КПУ Идризово. Мислам дека има одлежано затворска казна. Дали затворска казна или притвор не знам меѓутоа мислам дека – да“.
На реакција како може лице кое имало судир со законот да биде командир, директорот Спасовски рече: „Зошто да го избркам, треба да направи некој посериозен дисциплински прекршок за да биде избркан. Зошто да го бркам?“.
Прашан дали командирот е негов послушник и извршител, директорот Спасовски кажа: „Апсолутно не, зошто…?“.
Кога млад затвореник од Ромска националност бил претепан на Нова година, во 2 часот наутро, на смена кај дежурен командир е Димитриевски.
„Утврдена е одговорност. За сите чинители ќе има санкции. Имало тепачка меѓу осудени лица, во тој момент доаѓаат дежурни командири, двајца, реагираат и доколку се утврди дека има пречекорување на овластувања, не само дисциплински туку и кривично ќе одговараат“, рече Спасовски.
Потоа, повторно беше прашан, каде се наоѓа дежурниот командир во време на тепачката, на што директорот Спасовски одговори: „На главната капија. А настанот се случува внатре….“
На укажувањето дека сам кажал дека командирот влегол внатре да ги разделува, директорот Спасовски негираше дека тоа го кажал и додаде: „Двајца затворски полицајци… Тој е одговорен на смена.. Ова лице (командирот) не ги разделува. Тоа го покажуваат камерите. И за него е утврдувањето на дисциплинската одговорност. Ако бил кај врата нема одговорност“.
Неодговорени останаа прашањата зошто лице со висок безбедносен ризик, осуден на над 20 години казна бил спроведуван без полициска асистенција. Молк и на прашањето зошто не е постапено според протоколот на затворот, каде што, доколку нема домски доктор во затворот се повикува Брза помош, која потоа одлучува дали треба лицето да се носи на болничко лекување.
Управата за санкции и директорот на „Идризово“ Шпенд Тахири уште утрово беа прашани за потврда дали Димитриевски е командирот кој бил на смена и издавал наредби за спровод. Тие до моментот на објавување на оваа вест – не одговорија.
Инаку, командирот Димитриевски кој сега е суспендиран, добил условна казна. Бил првообвинет во судската постапка, каде се гонеле и други четири лица. Првично, се гонел дека заедно со групата од МВР барале 2.000 евра од лице за да не му пишат кривична пријава. Договорено било парите да се предадат на друго лице на бензиска пумпа. Договарањето било во канцеларија. Димитриевски добил условна казна, која станала правосилна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на министерот Муцунски со шефот на Мисијата на ОБСЕ во Скопје, Вал
Министерот за надворешни работи и надворешна трговија, Тимчо Муцунски, денеска оствари средба со шефот на Мисијата на ОБСЕ во Скопје, амбасадорот Килиан Вал. На средбата беше потврдена долгогодишната соработка со ОБСЕ во различни области, при што беше изразена поддршка за напорите на Организацијата насочени кон зајакнување на соработката и одржување на мирот во регионот на ОБСЕ, извести МНР.
Двајцата соговорници изразија задоволство од досегашната соработка помеѓу ОБСЕ и македонските институции, и ја потврдија подготвеноста за нејзино продолжување. Тие разменија мислења и за тековните активности на Мисијата и заеднички ја реафирмираа посветеноста на продолжување на проектите кои ги поддржуваат реформските процеси на новата Влада.
Македонија
ЛДП со реакција за изјавата градоначалникот на Кисела Вода: Сепак има надеж
ЛДП реагираше на изјавите на Орце Ѓорѓиевски во врска со можноста за отповикување на градоначалници, нагласувајќи дека оваа иницијатива не е нова, туку е дел од нивните заложби кои претходно не биле поддржани ниту јавно ниту во Собранието.
„ЛДП ја истакна потребата за воспоставување на механизам за отповикување на градоначалници преку референдум, со цел поголема отчетност и одговорност на локалните лидери. Оваа иницијатива, која партијата ја поддржува подолг период, се заснова на примери од европските земји како Обединетото Кралство, Полска и Молдавија, каде ваквите механизми веќе се применуваат.
Според нив состојбата во која градоначалниците можат да ги поминат своите мандати без да одговараат за несработеното, ги оштетува општините и граѓаните. Иницијативата за отповикување на градоначалници се споменува како начин за подобрување на транспарентноста и одговорноста на локалната власт кон оние кои ја избрале“, велат од ЛДП.
Од партијата потсетија дека уште изминатата година кога ја пласираа идејата за доверба или отповикување на градоначалник истата беше отфрлена.
„Воедно минатата недела поднесовме амандман на измените во законот за локална самоуправа, кој за жал не беше поддржан во Собранието. Но, добро е што само по неколку дена доаѓаат позитивни реакции и изјави по однос на нашата заложба. Подаваме рака да го изработиме предлогот и да го усвоиме сите заедно во интерес на граѓаните“, истакнуваат од ЛДП.
ЛДП почнува серијал на јавни трибини со сите засегнати страни, а пред се со граѓаните затоа што предлогот ги има нив во фокусот: да добијат отчетни институции кои ќе им служат лично нив, а не на сопствените и партиски интереси. Институции исклучиво по европски стандарди и хармонизација со европското законодавство. ЛДП го повикува претседателот на ЗЕЛС и Министерот за локална самоуправа да се приклучат на оваа иницијатива.
Македонија
Претседателката Сиљановска Давкова се обрати на дискусијата „Младите и внатрепартиската демократија“
Претседателката Гордана Сиљановска Давкова се обрати на дискусијата „Младите и внатрепартиската демократија“, што се одржа во Кабинетот на Претседателот по повод 15 септември – Меѓународниот ден на демократијата.
Во дискусијата учествуваа подмладоци од политичките партии во земјава кои ги претставија своите погледи и искуства за улогата и положбата на младите во политичките партии кадешто членуваат и разменија идеи и препораки за подобрување на внатрепартиската демократија и за поттикнување на младинскиот ангажман во политиката.
Претседателката Сиљановска Давкова во обраќањето пред политичките подмладоци посочи дека демократизацијата на политичките партии е клучна за демократизацијата на политиката. Таа се осврна на процесите на внатрепартиското одлучување, на процесите на кандидирање и избор на партиските функционери, посочувајќи дека е неопходна децентрализираност на партиите, почитување на различни тенденции и мислења внатре во партиите и поавтентичен настап на локалните партиски организации.
Во таа насока, таа говореше за потребата од одговорност внатре во партијата, неопходноста од реформи, партиципативна политичка култура и промени во пристапот и комуникацијата на партиите со јавноста.
Претседателката во своето обраќање се осврна и на структурата на партиите и нивното претставување од аспект на родовата застапеност, истовремено посочувајќи дека дејствувањето на политичките партии во голема мера зависи од етичкиот капацитет на водството и на лидерот.
Претседателката ја поддржа потребата од поголема вклученост на младите во носењето на партиските одлуки, истакнувајќи дека тие треба да бидат најсубверзивниот елемент којшто ќе влијае на демократизацијата на овие процеси и на партиското одлучување.
Истакнувајќи ја важноста на внатрепартиската демократија, младите ги разгледаа можностите и начините за нивно поголемо влијание врз политичките процеси, преку активно учество и инклузија во партиските структури.
Политичките подмладоци како генератори на идното партиско лидерство ја истакнаа важноста од едукација и сензибилизирање за демократијата и нејзините сфаќања помеѓу младите.