Македонија
Командир осуден за мито на кого не му е прв скандал бил на смена во „Идризово“, кога избега затвореникот
Срѓан Димитриевски е командирот кој бил на смена вчеравечер во „Идризово“, кога се случи бегството на затвореникот осуден за обид за убиство и дрога, а полицаец беше повреден, дознава „Макфакс“.
Димитриевски е лице осудено за примање мито како полициски службеник од МВР. Од таму добил отказ, па стана командир во затворот. Тој беше дежурен командир и за време на новогодишната вечер, кога млад затвореник беше брутално претепан. Директорот за санкции, Марјан Спасовски во интервју, кажа дека бил запознаен со сите овие факти, но не гледаше зошто би го тргнал од функцијата – командир. Тој додаде и дека контактира лично со командирот Димитриевски, но не сакаше да ги покаже пораките во неговиот телефон.
На прашање дали го познава командирот Димитриевски, директорот Спасовски кажа: „Да, тој е командир во КПУ Идризово. Мислам дека има одлежано затворска казна. Дали затворска казна или притвор не знам меѓутоа мислам дека – да“.
На реакција како може лице кое имало судир со законот да биде командир, директорот Спасовски рече: „Зошто да го избркам, треба да направи некој посериозен дисциплински прекршок за да биде избркан. Зошто да го бркам?“.
Прашан дали командирот е негов послушник и извршител, директорот Спасовски кажа: „Апсолутно не, зошто…?“.
Кога млад затвореник од Ромска националност бил претепан на Нова година, во 2 часот наутро, на смена кај дежурен командир е Димитриевски.
„Утврдена е одговорност. За сите чинители ќе има санкции. Имало тепачка меѓу осудени лица, во тој момент доаѓаат дежурни командири, двајца, реагираат и доколку се утврди дека има пречекорување на овластувања, не само дисциплински туку и кривично ќе одговараат“, рече Спасовски.
Потоа, повторно беше прашан, каде се наоѓа дежурниот командир во време на тепачката, на што директорот Спасовски одговори: „На главната капија. А настанот се случува внатре….“
На укажувањето дека сам кажал дека командирот влегол внатре да ги разделува, директорот Спасовски негираше дека тоа го кажал и додаде: „Двајца затворски полицајци… Тој е одговорен на смена.. Ова лице (командирот) не ги разделува. Тоа го покажуваат камерите. И за него е утврдувањето на дисциплинската одговорност. Ако бил кај врата нема одговорност“.
Неодговорени останаа прашањата зошто лице со висок безбедносен ризик, осуден на над 20 години казна бил спроведуван без полициска асистенција. Молк и на прашањето зошто не е постапено според протоколот на затворот, каде што, доколку нема домски доктор во затворот се повикува Брза помош, која потоа одлучува дали треба лицето да се носи на болничко лекување.
Управата за санкции и директорот на „Идризово“ Шпенд Тахири уште утрово беа прашани за потврда дали Димитриевски е командирот кој бил на смена и издавал наредби за спровод. Тие до моментот на објавување на оваа вест – не одговорија.
Инаку, командирот Димитриевски кој сега е суспендиран, добил условна казна. Бил првообвинет во судската постапка, каде се гонеле и други четири лица. Првично, се гонел дека заедно со групата од МВР барале 2.000 евра од лице за да не му пишат кривична пријава. Договорено било парите да се предадат на друго лице на бензиска пумпа. Договарањето било во канцеларија. Димитриевски добил условна казна, која станала правосилна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Кривичен суд го добил барањето од Палевски за адвокат
Кривичниот суд го добил барањето од Истражниот затвор „Скопје“ во Шуто Оризари за ангажирање адвокат што ќе го застапува осомничениот Љупчо Палевски во процесот за убиството на Вања Ѓорчевска и Панче Жежовски.
Од судот информираа дека од Истражниот затвор „Скопје“ во Шуто Оризари до Основниот кривичен суд Скопје е доставно официјално известување за екстрадицијата на осомничениот за кој веќе е определна мерка притвор од неговото пронаоѓање, односно лишување од слобода, како и барање за ангажирање адвокат, кој ќе го застапува во текот на постапката.
„Судот во рамките на законските одредби ги издава сите дозволи поврзани со истражната постапка, која е во надлежност на Основното јавно обвинитeлство – Скопје и добиените барања ги доставува до предложените адвокати за нивно понатамошно постапување“, информираа од Кривичниот суд.
Дополнително, судија на претходна постапка во координација со надлежниот јавен обвинител ќе издаде наредба за спровод на осомниченото лице за негово произнесување во однос на околностите во предлогот на јавниот обвинител за определување на мерката притвор, а за донесеното решение јавноста ќе биде благовремено известена.
Македонија
Велковски: Добросостојбата на нашите деца е и ќе биде наша највисока цел
Министерот за труд и социјална политика, Ѓоко Велковски, заедно со претставникот на УНИЦЕФ, Патриција ди Џовани, и градоначалникот на општина Илинден, Александар Георгиевски, денeска, во детската градинка „Гоце Делчев“ во општина Илинден присуствуваше на промоција на проектот „Градење здрави навики во исхраната кај децата од предучилишна возраст”.
„Добросостојбата на нашите деца е и ќе биде наша највисока национална, општествена и лична цел“, потенцира Велковски и додаде дека здравата и безбедна храна е неопходност за подобар раст и развој на децата, особено во првите години од животот.
Во рамките на соработката со УНИЦЕФ почна реализацијата на проектот „Градење здрави навики во исхраната кај децата од предучилишна возраст”, во партнерство со асоцијацијата ЕДУЛЕНД, а активно учество во проектот зеде и Здружението за одржлив развој АРЕТЕ.
„Како резултат на овој проект произлегоа едукативни обуки, кои почнуваме да ги пилотираме првично во 4 градинки за вработените во предучилишните установи, а понатаму во план е да опфатиме уште 30 градинки во целата држава. Она што ме радува е дека на овие обуки учесници се вработените во детските градинки: директор, стручни работници и соработници, воспитувачи, негуватели и вработени во кујните во кои се приготвува храната за децата. Исто така, се изработи и прирачник со насоки за здрава исхрана“, рече министерот за труд и социјална политика.
Министерот Велковски додаде дека воспитувачите и негувателите од раното детство имаат клучна улога во обликувањето на здравите прехранбени навики на децата не само преку храната што ја нудат во градинките туку и, како што рече, преку однесувањето што го моделираат, нивните интеракции со децата за време на оброците, дискусиите и активностите што ги преземаат со децата.
„Од овие причини практичното унапредување на нивните професионални компетенции има големо значење“, потенцира министерот Велковски.
Македонија
Ѓорѓиевски и раководството на Централната кооперативна банка садеа дрвца во паркот во 11 Октомври – араки
Во заедничка акција со раководството на Централната кооперативна банка, денес, градоначалникот Орце Ѓорѓиевски садеше дрвца во паркот во 11 Октомври – бараки. Истовремено беше поставена и нова урбана опрема обезбедувајќи удобна и пријатна средина за сите граѓани, кои тука може да се одморат и да се рекреираат.
„Денес, заедно со раководството на Централната кооперативна банка сме во новоизградениот парк во населбата 11 Октомври – бараки, каде што садиме дрвца и поставуваме нови клупи. Дополнувањето на зеленилото и содржините во оваа нова локација за одмор и рекреација придонесуваат кон зголемување на естетскиот и еколошкиот аспект, но и кон креирање удобно место за одмор на нашите граѓани, кои, се надевам, често ќе го посетуваат во своето слободно време. Нашата јасна визија и ангажман за зголемување на зелените површини и урбаната опрема во општина Кисела Вода е евидентна преку изградбата на 15-ина паркови и спортско-рекреативни центри во овие 2,5 години и ова е нешто што ќе продолжи да се случува со зголемена динамика на работа. Сакам да ѝ се заблагодарам на Централната кооперативна банка за нивниот придонес кон унапредувањето на квалитетот на живот на нашите жители. Се надевам дека оваа соработка, како чин на општествена одговорност, ќе биде инспирација и за другите деловни субјекти и дека ваквиот начин на вложување во развојот на општината во иднина ќе стане стандард за соработка помеѓу јавниот и приватниот сектор“, истакна градоначалникот Ѓорѓиевски.