Работата на Комисијата и членовите од македонска страна е предмет на злоупотреба од страна на најодговорните фактори во двете држави – политичарите (како од власта, така и од опозицијата), стручната јавност, како и од страна на голем дел од медиумите со нивното непрофесионално известување, повторно, како и секогаш, кога политичките односи меѓу Северна Македонија и Бугарија се влошуваат или се наоѓаат пред голем предизвик да се надминат анахроните и апсурдни барања на официјална Софија, реагираат од билатералната мултидисциплинарна експертска Комисија за историски и образовни прашања.

„Поради големиот број дезинформации и лаги пласирани во јавноста изминативе денови, би сакале да информираме дека:

1. Комисијата никогаш не разговарала и не усогласувала предлог-текстови доставени до владите, со цел тие да бидат испишани на споменици, споменични обележја или тврдини, како што е тоа наведено во манипулативниот текст на порталот „Бгнес“, кој речиси сите медиуми во Северна Македонија го пренесоа, без притоа да побараат информации од членовите во Комисијата за да се провери точноста на информацијата и да се консултира нивното мислење во однос на ова прашање. Таквиот начин на информирање нема цел јавноста да дознае што се случува со работата на Комисијата и да се пренесат погледите на сите страни вклучени во процесот, туку да се злоупотреби нејзината работа за политички цели. Текстовите што досега се усвоени од страна на Комисијата се предлози до двете влади за заедничко чествување одредени личности, а не објаснувачки текстови за споменични обележја, споменици и тврдини и тие не смее да бидат искористени за таа цел. Исто така, крајно неодговорно е овие непроверени и неточни информации во поглед на намената и содржината на усвоените текстови за заедничко чествување од страна на Комисијата да бидат користени од претставници на политички партии и носители на функции за да собираат политички поени и да создаваат слика за себе како за бранители на националните интереси на сметка на Комисијата, која наводно работела во тајност, без нивно знаење. Особено кога за нашата работа редовно е информирана јавноста и истите тие политичари се дел од власта и може или можеле да ги имаат на увид сите усвоени препораки на Комисијата во однос на заедничките чествувања и учебниците по историја. Исто така, уверени сме дека и опозицијата е запозната со сите досегашни решенија на Комисијата и како и власта знае дека во нив нема ништо спорно и ништо со што би се загрозиле историскиот идентитет на македонскиот народ и дигнитетот на сите граѓани на Северна Македонија.

2. Комисијата од македонска страна никогаш не прифатила ниту, пак, ќе прифати да биде алатка на политиката или, пак, да работи според политички инструкции, со што таа би прераснала во политичко тело за цензура, а не експертско тело, кое има цел да помогне да се надминат споровите за минатото, а кои се злоупотребуваат за политички цели. Комисијата е формирана врз основа на договорот за добрососедство и пријателство, но нејзината работа се води според правилникот, кој двете страни заеднички го усвоија на првата средба на Комисијата во 2018 година и во кој нема ниту еден елемент ниту една точка што Комисијата би ја претворила во тело што ја одредува историската вистина. Поради тоа, сакаме да укажеме дека секое нејзино подредување и потчинување на политички потреби на една или друга влада или политичка партија ќе значи и крај на постоењето на Комисијата.

3. Неопходно е професионално и одговорно однесување на сите фактори во општествениот и политички живот со цел да не се манипулира со чувствата на граѓаните, да не се поттикнува несигурност, и уште поважно, да не се поттикнуваат поделби внатре во општеството, како и меѓу самиот македонски народ,. Патриотизмот не е и не смее да биде алатка за постигнување лични цели и градење лични политички кариери, кои во нашата кратка историја на независноста не служеле како ништо друго, освен како средство за стекнување лична материјална корист.

На крајот, апелираме прашањата што се однесуваат на работата на Комисијата од македонска страна да бидат проверувани со нас, а за прашањата во однос на тоа каква ќе биде улогата на Комисијата во евентуални нови протоколи меѓу двете земји ќе се изјасниме доколку тие бидат официјално усвоени од владите на Северна Македонија и Бугарија“, е наведено во писмената реакција од билатералната мултидисциплинарна експертска Комисија за историски и образовни прашања.