По една недела протести и негодување поради деталниот урбанистички план на општината Аеродром и неколкуте прес-конференции од страна на СДСМ, на кои посочија дека истиот претставува сериозен проблем за граѓаните на општината, денес со реакција се јави и градоначалникот Ивица Коневски.

„Би сакал уште еднаш да ве информирам дека челниците од СДСМ од Аеродром продолжуваат да пласираат лаги и невистини во јавноста во врска со донесувањето на деталните урбанистички планови и наводното уништување на зеленилото во Општина Аеродром“, вели Коневски.

Градоначаникот на општината Аеродром, вели дека СДСМ се обиделе да ја излажат јавноста и изнеле ноторни лаги каде го обвинувале за незаконски активности, а со цел да ја дискредитираат неговата личност.

„Лажните пресови на опозицијата, со кои очигледно се надева дека повеќепати повторената лага ќе стане вистина, не можат да го оспорат фактот што во последните неколку години изградивме преку 10 нови паркови и само во последните неколку месеци насадивме над 50.000 нови дрвца во Општина Аеродром“, додава Коневски.

Од ревизорските извештаи, можело да се види дека нема ниту една дамка врз начинот на донесување на ДУП-овите, а тој одговорно тврди дека и во идните контроли ќе се покаже дека залудно СДСМ го вперуваат прстот кон неговата работа.

„Ги повикувам советниците од редовите на СДСМ, деструктивната политика што ја водат со недели наназад, да ја претворат во дијалог и соработка за доброто на граѓаните, а јавноста да не подлегнува на овие манипулации и лажни вести, бидејќи постапките за донесување детални урбанистички планови се водат целосно во согласност со законот и во транспарентни процедури“, потенцира градоначалникот на општина Аеродром, Ивица Коневски.

Минатата недела Коневски за „Макфакс“ изјави дека протестите кои се организирале пред општинската зграда биле политички мотивирани од СДСМ./крај/мф/кл