Контролата на летање М-НАВ АД Скопје објави тендер на Бирото за јавни набавки за образовни и услуги за стручно усовршување за вработените. Станува збор за отворена постапка со која се прибираат понуди за обука за освежување на т.н. воздухопловен англиски јазик во земја во која англискиот е официјален јазик. Проценетата вредност на тендерот е 4 милиони денари или приближно 65 илјади евра, без вклучен ДДВ.

Во техничката спецификација на огласот пишува дека курсот треба да трае 5 работни дена за секоја група, 25 часа за секој кандидат, а опфатени се 97 лица. Времетраењето на обуката е 12 недели или три месеци и ќе биде спроведена од 4 март до 10 мај и од 21 октомври до 15 ноември 2019 година.

Програмата опфаќа слушање, разбирање, говорење и вежби за интеракција на англиски јазик. Меѓу другото, вклучени се и вежби за справување со невообичаени ситуации. Во условите пишува дека понудувачот треба да располага со соодветна просторија, литература и соодветен аудио и видеоматеријал. Критериум за доделување на договорот е најниската цена.

Претседателот на Управниот одбор на  М-НАВ и извршен директор на секторот за воздухопловна навигација, Николче Тасевски, за „Макфакс“ рече дека тендерот е поради регулативата 340 на Европската комисија во која, како што рече е клучно познавањето нивото на англиски јазик на контролорите на летање и пилотите.

„Агенцијата за цивилно воздухопловство на 1 јануари 2019 ја прифати директивата 340 во која се предвидува редовно освежување на англискиот јазик“, рече Тасевски за „Макфакс“. Тој рече дека и лани се објавил таков оглас, но немало ниту еден заинтересиран и пријавен на огласот.