Претседателот на Социјалдемократскиот сојуз на Македонија, Венко Филипче, денеска во Кавадарци, имаше средба со лозари, на којашто се разговараше за состојбата во земјоделството.

Во обраќањето пред лозарите, Филипче посочи дека за една година ВМРО ДПМНЕ ги понижи и осиромаши сите земјоделци вклучително и лозарите.

„ВМРО ДПМНЕ беа гласни за земјоделците пред изборите, ветуваа се и сешто, а само за една година покажаа дека не го вреднуваат ниту трудот на земјоделецот, ниту ги интересира развојот на земјоделството особено на стратешките гранки како што е лозарството и винарството. Ги стопираа програмите за финансирање на мали семејни винарии. Ланската 2024 година е прва година кога немаше субвенции за килограм предадено винско грозје, додека претходните години беше по 2 или 3 денари за килограм во зависност од приносите на грозје во тековната година. Во програмата за субвенционирање на лозарството укината е и мерката за субвенционирање на хектар лозов насад во висина од 60.000 денари по хектар за производство на грозје за високо квалитетни вина, што како мерка беше во програмата за субвенционирање во 2024 година“, рече Филипче.

Говорејќи за потребата од поддршка на лозарството и винарството како наши извозни се стратешки гранки, Филипче потсети дека Владата на СДСМ во својот мандат, заедно со лозарите, со винариите, донесе низа мерки и нови политики за поголема поддршка на овој сектор.

„Со Законот за вино се загарантираа најниските откупни цени на грозјето, и како резултат на овие измени во 2024 година се постигна највисока просечна откупна цена кај сите вински сорти. Се олеснија условите за формирање на мали семејни винарии кои дотогаш не беа во можност да се формираат и регистрираат како такви. Воведовме нови програми за поддршка на малите винарии, беа доделени над 150 грантови од по 10 илјади евра, за набавка на опрема и за модернизација на малите семејни винарии. Лозарите беа опфатени и со мерката за субвенции за зелена нафта и со моделот за авансна исплата на субвенциите“, рече Филипче.

Градоначалничката на Град Скопје, Данела Арсовска, објави дека доставила нови документи со, како што вели, фалсификатите на Висар Ганиу, Ејуп Адеми, Бујар Аземи и нивните партнери.

„Ова нема да го видите на МТВ, Сител, Алфа….Криминал од епски размери, а корумпираните институции не постапуваат. Ако е пред избори леле сега ли ти текна, ако е после избори што не кажа порано. А ЕДИНСТВЕНО ВАЖНО ВО МАКЕДОНИЈА Е ДЕКА НЕМА ПОГОДНО ВРЕМЕ ЗА ОТКРИВАЊЕ КРИМИНАЛ!

Граѓаните се охрабруваат! Денес од лица кои се оштетени од криминалите на Висар Ганиу, доставени се над 20 нови докази за фалсификати направени од страна на неговата организирана криминална банда.

Висар Ганиу не може да уништи толку документи, колку што до нас пристигаат секојдневно и нови докази.

Денес доставивме нова документација со фалсификатите на Висар Ганиу, Ејуп Адеми, Бујар Аземи и нивните партнери соучесници, во Основното јавно обвинителство за гонење на организиран криминал и корупција.

Основно јавно обвинителство за гонење на организиран криминал и корупција дали се слушаме? Бујар Аземи поднел барање до општина во 2011 година за легализација на десетици станови кога имал 16 години, за зграда која ја градел во 2024.

Данела Арсовска, градоначалник на Град Скопје, известувач и портпарол за етика и спречување корупција на Конгресот на Совет на Европа“, објави Арсовска.

Вработувањата на Албанците станаа законска обврска за државата, изјави вицепремиерот, Изет Меџити и додаде дека Владата на денешната седница го усвоила Предлог-законот за правична и соодветна застапеност.

Според Меџити, овој предлог-закон претставува историски момент, бидејќи, како што рече, по првпат правичната и соодветна застапеност, како уставна категорија од 2001 година, добива јасно и целосно законско решение.

„Иако ова прашање требаше да биде регулирано со закон уште во 2003 година, повеќе од две децении остана заложник на политичката волја. Предлог-законот гарантира: Еднаква пристапност во вработување и унапредување во јавната администрација; Правична и соодветна застапеност на сите заедници во јавните институции, но и обезбедување вработувањето и унапредувањето да се вршат врз основа на заслуги и квалификации на секој поединец и создавање институционални и процедурни механизми за избегнување на дискриминацијата и за зајакнување на инклузивноста“, рече Меџити.

Според Меџити, овој, иако задоцнет, но неопходен чекор, конечно ја тргнува застапеноста од влијанието на дневната политика и го прави законско право за секој граѓанин, без оглед на етничката припадност.