Македонија
Костадиновска-Стојчевска: Ме погодува, кога гледам како луѓе од културата си ги напаѓаат колегите, некој е научен да ја гледа културата низ политиката

Министерката за култура Бисера Костадиновска-Стојчевска на денешниот брифинг со медиумите даде одговори на јавно поставените прашања во врска со резултатите од Годишната програма за поддршка на проекти од национален интерес за 2024 година.
Таа категорично ги отфрли квалификациите за политичко или друг вид на одлучување или влијание на годишните конкурси и искажа незадоволство за начинот на кој некои корисници и членови на стручните комисии беа јавно жигосувани.
„Одбивам политиката да биде дел од културата“, рече Костадиновска-Стојчевска пред новинарите, која осврнувајќи се на составот на стручните комисии кои ги разгледуваа предлог-проектите, потенцираше дека станува збор за реномирани професори од општествените науки, кои многу внимателно и прецизно направија распределба на средствата, и сите нивни одлуки се аргументирани и се во согласност со зацртаните приоритети на Министерството за култура.
„Сите членови на стручните комисии имаат потпишано три вида на изјави, за немање судир на интереси, тајност и изјава дека стојат зад својата одлука. Се трудиме комисиите последните четири години да не се повторуваат“, нагласи министерката за култура, која уште еднаш ги демантираше реакците и рече:„Некој е научен да ја гледа културата низ политиката и не е во ред да се удира по културната сцена. Ме погодува, кога гледам како луѓе од културата си ги напаѓаат колегите, тоа не е во ред. Апелирам, културни работници да не одат против културни работници“.
Костадиновска-Стојчевска за реакциите поврзани за поддршката на „Рациновите средби“, рече дека не и е јасно зошто Општина Велес како долгогодишен организатор на оваа реномирана манифестација ја делегирала надлежноста за манифестацијата, на организација која нема традиција или искуство. „Ако сакаше да го задржат реномето на „Рацинови средби“, Општината Велес требаше да остане организатор на оваа важна манифестација“, нагласи министерката за култура.
Таа ги повтори начелата на конкурсите по кои одлучуваа комисиите, и рече дека тие не се со политички предзнак, а се однесуваат на поддршка на квалитетот, традицијта, подобрување на животот на заедницата и повеќекратни придобивки кои придонесуваат на разнородност на културата.
Во таа насока, Костадиновска-Стојчевска изрази жалење што некои од прифатените апликанти, по како што рече „медиумско-партискиот притисок“ се откажаа од добиените проекти. Таа додаде дека е против ваков начин на притисок и на моделирање на културата.
„Одбивам млади уменици кои студирале на реномирани универзитети во странство да бидат поврзувани на каков било начин со имиња од Министерството за култура. Секогаш ќе бидам со заложба на младите да им ја дадеме првата шанса. Се разбира и на традицијата, но и на младите. Дали со ваков однос, со јавно изложување на млади уметници по телевизии и партиски соопштенија придонесуваме за задржување на нашите млади во државата? Сигурно не. Никој не се осврна на проектот, туку само дека апликантката е дека од Битола“, рече министерката за култура по реакциите за еден од поддржаните проекти на апликант од нејзиниот роден град. Костадиновска-Стојчевска на брифингот со новинарите одговори на јавните реакции кои се однесуваа на капиталните инвестиции. Таа додаде дека продолжува изградбата на Турскиот театар, на театрите во Тетово и Куманово, како и реконструкција на бројни домови и центри на културата.
„Оваа Влада гради следејќи ги сите законски постапки, не со стиропор и со прехранбени бои. Обезбедуваме тригодишно финансирање како гаранција за квалитетна градба и реконструкција. Вложуваме во сите општини што се покажува зголемената сума за капитални дотации, на тој начин грижејќи се за рамномерен развој на културата“, истакна министерката.
Соопшти дека ниту една одлука во Министерството не се носи по лична основа, и затоа потсети дека дел од Годишниот конкурс е и жалбената постапка која е во тек.
На брифингот со новинарите беа присутни директорите и претставници на четирите театри кои учествуваат на драмскиот фестивал „Мојсиу“ во Приштина, а тоа се албанските ансамбли од Скопје, Гостивар, Куманово и од Тетово, кои го образложија проектот и ставките кои им се одобрени за реализација.
Пред новинарите претседателот на фестивалот „Меридијани“, Шкељзен Пајазити го објасни историјатот на манифестацијата и обемноста на програмата за која се поддржани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Богојески ја менува постапката за избор на надворешни експерти за оценување на проектите и апликациите за Еразмус+

Националната агенција за европски образовни програми и мобилност го објави почетокот на клучна постапка, а во рамки на заложбите за транспарентност и борба против корупцијата.
Денес, директорот на Националната агенција, Петар Богојески, донесе нова процедура за постапката за избор на надворешни експерти/евалватори за оценување на предлог-проекти и/или периодични и конечни извештаи од одобрени проекти, како и за апликации во рамките на програмите Еразмус+ (2021–2027) и Европски солидарен корпус (2021–2027).
Во таа насока, како што посочуваат од Националната агенција, ќе следува целосна реевалуација на постојните евалватори, согласно највисоките професионални стандарди и етички норми. Потоа, ќе биде објавен нов јавен повик за избор на професионални и департизирани евалватори, експерти од различни области, кои со својата стручност и интегритет ќе придонесат кон натамошно зајакнување на кредибилитетот на Агенцијата.
Со оваа постапка, од Националната агенција велат дека се испраќа јасна порака дека борбата против корупцијата е приоритет и дека се стреми да биде пример за интегритет и професионализам, не само во нашата земја, туку и во земјите членки на Европската унија.
Македонија
Филков : Сите закони, кои се дел од реформската рамка, се подготвени или се во финална фаза на усвојување

Министерот за правда Игор Филков на денешната прес конференција се осврна и на Реформската агенда и законите кои се подготвени или се во финална фаза на усвојување во изминатите 10 месеци.
Подготвени се:
-Предлог Закон за судски совет
-Предлог Закон за јавно обвинителство
– Предлог Закон за платите на јавните обвинители
-Кривичен законик
-Предлог Закон за кривична постапка
-Предлог Законот за судска служба
Во план и подготовка се и:
Предлог Законот за судски буџет
Предлог Законот за Советот на јавни обвинители
Предлог Законот за јавнообвинителска служба
Измени на Изборниот законик, со поддршка на ОДИХР.
Закони со кои се регулираат платите на судиите, јавните обвинители, и јавно обвинителската служба
Закон за слободен пристап до информации од јавен карактер
Закон за помилување
Закон за вештачење
Закон за нотаријат
Закон за извршување
Закон за пробација
Закон за извршување на санкции
Закон за конфискација на имот во граѓанска постапка
Закон за заштита на лични податоци
,,Реформската агенда има рокови до кои законот треба да биде донесен од Собранието. Од друга страна, Годишната програма на Владата опфаќа поранешна фаза — кога законот треба да биде доставен до ЕНЕР или до Владата.
Во просек, собраниската постапка трае два месеца. Кај одредени закони, постојат надворешни фактори.
Изборниот законик, на пример, бара широк политички консензус,”рече министерот за правда Игор Филков.
Министерот порача дека се оди на квалитетни измени и законски решенија во интерес на граѓаните, не како што досега била праксата да се носат во интерес на поединци или какви било интересни групи кои што во минатото ги носеле измените на штета на граѓаните ,на начини на кои што сите ги знаеме.
,,Законите се тука, подготвени, доставени, транспарентно објавени. Ние нема да дозволиме реформите да бидат жртва на дневна политика или бирократска инертност. Затоа ќе повторам: реформите не се желба, туку одговорност. И Министерството за правда таа одговорност ја носи до крај”,потенцира министерот за правда Игор Филков.
Македонија
Палевски вели дека не се пријавил во полицијата во Баликесир оти секако ќе го нашле, се видел на сите вести во пицеријата додека пиел еспресо

Обвинетиот за убиствата на Вања и Панче, Љупчо Палевски, во судот одговараше на прашањата на обвинителите.
Тој беше прашан зошто сам не се пријавил во полиција кога во Баликесир видел дека го бараат со меѓународна потерница. Рече дека пред да биде уапсен го вратил клучот од куќата на сопственикот затоа што сметал дека е јасно оти ќе биде уапсен.
„Без разлика на големината на Баликесир, кога 48 часа сте во градот, не може да знаете каде се судот, Обвинителството и полициската станица. Затоа, реков дека во истиот ден двапати се вратив во пицеријата по што вториот пат бев лишен од слобода на регуларен, нормален начин. Немам приговори на однесувањето на турската полиција, освен една забелешка, која вашиот претпоставен Бубевски ја злоупотреби. Еден од вработените од Интерпол ме извади во ходникот, ме фотографира и фотографијата на ‘Воцап’ му ја испрати на Оливер Спасовски. Подоцна мојот адвокат во Турција ми испрати печатени вести од Македонија, каде што ја видов оваа фотографија. Тоа се ваши класични злоупотреби и на предистрагата и на самата истрага, каде што ги фотографирате осомничените и им ги праќате на медиумите. Немало бегање и не сум променил град на престој по сознанието дека сум осомничен“, рече Палевски.
Потоа обвинителката му рече дека ако сакал, можел и од самата пицерија да се пријави бидејќи бил баран со меѓународна потерница, а прашањето беше насочено кон тоа дали седел без намера да се пријави, Палевски одговори: „И еспресо пиев“.
Додаде и дека не барал полициска станица. На мониторот во пицеријата на сите вести во Турција се гледал себеси.
„Зошто да барам станица кога ќе ме најдат? На 2 декември, Дејан Димовски, оној што вистински ја водел истрагата, а не вие, барал од мојот адвокат Стојков преку телефон да му кажам каде се наоѓам, да му кажам каде сум се движел на 27 ноември. На полицијата ѝ кажав дека сум во Баликесир“, рече Палевски.
Обвинителката Жаклина Јосифовска го праша и каде одел и зошто, иако тврдеше дека го боли грбот и одел во Белград по второ мислење за болеста, со себе немал ниедно ливче од медицинската документација.
„Имав две цедиња во куферот, Обвинителството ми ги украде“, рече Палевски.
Прашан беше и за денот кога беше грабнат и убиен 74-годишниот Панче Жежовски од Велес и за лицето што вели дека го сретнал, но рече дека не може да се сети на неговото име и презиме. Додека ја шетав Хера, рече Палевски, среќавав многу луѓе.
„Кога и како ќе се осмели тоа лице да се појави пред судот, не знам, но за разлика од ЈО, моите тврдења до сега, како и за пиштолот што недостига, се поткрепени со материјални докази“, одговори Палевски.
Прашан дали однапред платил кирија за декември и покрај лошата финансиска состојба на партијата за да си обезбеди алиби, Палевски одговори: Токму тоа што не сум правел алиби како што сум можел, покажува нешто друго, а не да грабнуваш и да убиваш. Дополнително, слушнавте дека обвинетите рекоа оти се плашеле од мене, тогаш зошто би убивал кога сум можел само да им наредам да го направат тоа.