Македонија
Костадиновска-Стојчевска: Отворањето на македонскиот КИЦ во Белград уште повеќе ќе ја засили културната соработка со Србија

Министерката за култура, Бисера Костадиновска-Стојчевска, и српската министерка и вицепремиерка Маја Гојковиќ, во Белград, на маргините на Самитот „Отворен Балкан“, ја потпишаа Програмата за соработка меѓу Министерството за култура на Македонија и Министерството за култура и информирање на Србија за периодот од 2022 до 2025 година.
„Програмата е континуитет на одличната соработка во областа на културата што ја негуваат двете земји, на институционално и на вонинституционално ниво. Програмата се усовршува и се збогатува со секоја нова верзија уште од Спогодбата од 1997 година што ја потпишале двете земји во областа на образованието, културата и спортот“, рече министерката Костадиновска-Стојчевска.
Двете министерки се согласни дека на овој начин се постигнуваат силни резултати во развивањето и продлабочувањето на меѓусебното разбирање, добрососедството, пријателските односи и довербата во културата.
„Програмата обезбедува подобри услови за натамошно зацврстување на културната соработка во сите сфери на уметноста. Таа ја олеснува работата на заеднички проекти меѓу националните институции и меѓу други организации во областа на културата и уметноста, меѓу уметниците и експертите од двете земји.
Она што е најактуелно за двете култури е што е донесена одлука за отворање Културно-информативен центар на Северна Македонија во Белград, со најава дека и Србија ќе отвори КИЦ во нашата земја. Тој простор и таа институција, убедена сум, ќе биде ново средиште за стари и за нови пријателства на уметници од сите генерации и области на двете земји. Културно-информативните центри негуваат незаменлива практика за зближување и размена, која се предвидува и со Програмата, во издавачката, визуелната и ликовната дејност, во музичко-сценската област, во филмот“, вели Костадиновска-Стојчевска.
Особен акцент во овој документ се става и на соработката во архивската, библиотечната и музејската дејност, како и во заштитата на нематеријално културно наследство, преку обезбедување поддршка за традиционалните културни активности, фестивали и саеми поврзани со традиционалната музика, занаетчиството и други елементи на нематеријалното културно наследство на двете земји.
Костадиновска-Стојчевска ја истакнува важноста на соработката во заштитата на културното наследство, во спречувањето на противзаконскиот увоз, извоз и пренос на правото на сопственост над културните добра, во согласност со нормите на меѓународното правo.
„Ние продолжуваме заедно да ги надоградуваме заедничките политики на меѓународен план во регионалните, европските и меѓународните организации, како: УНЕСКО, ЕУ, Советот на Европа, Советот на министри на Југоисточна Европа, каде што заедно ги зацврстуваме своите позиции, разменуваме искуства и експерти со цел поефикасна интеграција во европските процеси, осовременување и побрзо воведување на новите техники и дигитализацијата“, вели Костадиновска-Стојчевска.
Министерката за култура Бисера Костадиновска-Стојчевска беше дел од владината делегација на Самитот „Отворен Балкан“ во Белград.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мисајловски – Пирс: Соработка на највисоко ниво, Обединетото Кралство останува наш силен сојузник

Денеска министерот за одбрана Владо Мисајловски се сретна со новата специјална претставничка на Обединетото Кралство за Западниот Балкан, Карен Пирс, на која и се заблагодари за континуираната поддршка од страна на Обединетото Кралство во развојот на капацитетите на македонската Армија.
„Нашите две држави имаат повеќедецениска интензивна одбранбена соработка која, особено по членството во НАТО го достигна сиот свој потенцијал“, рече Мисајловски и додаде дека сета оваа соработка значително ги зајакна врските помеѓу двете Армии и нивните припадници.
Министерот посочи дека одбраната и Армијата остануваат отворени за континуиран развој на соработката во секоја област – одбранбената политика, воената обука и едукација, јазичната обука и советодавната поддршка од Обединетото Кралство, досега реализирана во повеќе наврати.
„Ние ќе продолжиме да бидеме близок партнер и силен сојузник на Северна Македонија во НАТО. Обединетото Кралство останува целосно посветено на зајакнување на стабилноста, безбедноста и економската соработка во регионот“, изјави Пирс.
На средбата во Министерството за одбрана присуствуваа и амбасадорот на Обединетото Кралство, Метју Лосон и одбранбеното аташе, потполковникот Едвард Џон Грин.
Македонија
Лимани: Потребен е нов пакет-услуги за спрaвување со растечките стапки на детскаta сиромаштија

На настан посветен на справување со детската сиромаштија и социјалната исклученост, Министерството за социјална политика, демографија и млади, со поддршка од УНИЦЕФ, ги претстави резултатите од анализата и препораките за политики за сеопфатен пакет на услуги кои треба да се разгледаат во рамки на Европската гаранција за децата во Северна Македонија.
Дијалогот за новиот пакет на услуги доаѓа во критичен момент: според најновите достапни податоци, децата во Северна Македонија се изложени на значително повисок ризик од сиромаштија од возрасните, при што 32% живеат под националниот праг на сиромаштија, а 40% се соочуваат со мултидимензионална сиромаштија, според најново достапните податоци.
Предложениот пакет на услуги за гаранција за деца има за цел да обезбеди секое дете, особено најранливитe, да има загарантиран пристап до здравствена заштита, образование, социјална заштита и грижа преку координирана, мултисекторска поддршка.
„И покрај достапноста на основни услуги како здравствената и социјална заштита и образование, децата што се соочуваат со сиромаштија и исклученост наидуваат на поголеми пречки поради тоа што системите не се прилагодени на нивните потреби. За да ги надминеме спомнатите предизвици, Владата на Северна Македонија со поддршка од ЕУ и УНИЦЕФ изработи Национален акциски план за правата на децата 2025-2029, кој е во завршна фаза на усвојување. Еден од приоритетите на Планот е намалувањето на детската сиромаштија, вклучително и со воведување на Европската детска гаранција, како и зголемување од 15% на паричните додатоци наменети за децата,“ изјави Фатмир Лимани, министер за социјална политика, демографија и млади.
Тој информираше дека Министерството за социјална политика, демографија и млади ќе ја предводи координацијата со другите владини институции за развивање на план за имплементација на Гаранцијата за деца.
Препораките за политиките се насочени кон најризичните категории деца, вклучувајќи ги децата Роми, децата со попреченост, децата без родителска грижа, децата во судир со законот и други. Пакетот вклучува повеќе услуги, како проширена парична помош, зголемен пристап до предучилишно образование, инклузивно образование, универзален пристап до здравствена заштита, бесплатни оброци во училиштата и други услуги.
„Децата кои растат во сиромаштија имаат поголема веројатност да останат сиромашни и како возрасни, продолжувајќи го циклусот на нееднаквост,“ рече Лесли Милер, претставничка на УНИЦЕФ. „Гаранцијата за децата се покажува дека е докажан механизам за борба против овие алармантни трендови и обезбедува да не биде запоставено ниту едно дете.“ Препораките се насочени кон решавање на причините за детската сиромаштија, како што се финансиски тешкотии на домаќинствата, ограничен пристап до квалитетни услуги и системски бариери како стигматизација, слаба координација меѓу институциите и географски нееднаквости. Пристапот ја нагласува интегрираната испорака на услуги, проактивна теренска работа со семејствата и мерки прилагодени на вистинските потреби на децата и нивните семејства.
Националниот акциски план за Гаранцијата за децата, предвидува зајакнување на испораката на услуги и мобилизирање средства преку националниот и општинските буџети за негова реализација. При што веќе се планираат до 3 милиони евра за воведување услуги фокусирани на децата. Модифицираните модели на услуги ќе бидат пилотирани во избрани општини за да се обезбедат податоци за нивно пошироко национално имплементирање.
Македонија
(Видео) Спасовски: ВМРО-ДПМНЕ не го поддржа нашиот предлог за помош на жртвите од трагедијата во Кочани

Пратениците на ВМРО ДПМНЕ не гласаа и не го поддржаа предлогот на СДСМ на дневен ред да се стави Законот за помош на семејствата на загинатите и повредените од Кочани, соопштија од СДСМ.
„Го предложивме ова законско решение затоа што не станува збор за обичен законски текст, туку за морална, институционална и човечка обврска на сите нас. Тој произлезе од големата трагедија што ни се случи во Кочани, каде што животот го загубија 62 лица, а уште 250 беа повредени. Со донесувањето на овој закон ја преземаме нашата должност како држава – да не дозволиме страдањата на граѓаните да бидат игнорирани или потиснати“, рече пратеникот Оливер Спасовски.
Со тоа, додаде тој, институциите конечно ќе застанат зад народот по оваа трагедија. Според Спасовски, потребна е помош и во деновите што следат, во процесот на закрепнување, со солидарност и одговорност.
„Поддршката преку овој закон опфаќа обештетување за сите семејства што загубиле член – по 80.000 евра во денарска противвредност. Помош ќе добијат и оние кои имаат инвалидитет“, рече пратеникот на СДСМ, Оливер Спасовски денес во Собранието.
Тој потенцираше дека со законот се предвидува добивање приоритетен пристап до здравствени услуги – како за лекување, така и за рехабилитација – при што сите услуги ќе бидат покриени од државата, како во земјата, така и во странство. Исто така, се предвидуваат и измени во трудовото право: секој родител што има повредено дете да има право на неплатено отсуство.