„60 години Скопје на солидарноста возвраќа со љубов и останува отворен град за сите“, порачува во својата објава на социјалните мрежи министерката за култура, Бисера Костадиновска-Стојчевска, и потсетува дека „Скопје денес се сеќава и нема никогаш да ги заборави своите сограѓани и сите други, кои тој кобен ден, на 26 јули 1963 година, ги загубија животите во катастрофалниот земјотрес кога градот беше покосен во урнатини“.

„Цели 60 години на овој ден ги прераскажуваме сеќавањата, личните приказни и трагедии, кои говорат за неизмерна болка и тага. Спасителите, кои се упатија кон дестинацијата Скопје, од каде што извираа повици за помош, сведочеа за потресни слики додека секоја секунда значеше спасен живот“, напиша Костадиновска-Стојчевска.

Таа потсетува дека во тие трагични моменти целата земја стана единствена во желбата да му помогне на Скопје и во тие моменти најсилно дојдоа до израз братството и единството на југословенските народи, а потоа и помошта на голем број други земји од целиот свет.

Подадената и прифатена рака подоцна стана симболична претстава за градот, кој со сочувството, љубовта и солидарноста на светот важи за парадигма на човечноста, која е најмоќната сила за обнова и нов почеток. Така, Скопје го доби скапоцениот камен во круната наречен солидарност. Тој скапоцен камен на солидарноста денеска го сведочат многубројни објекти, јавни установи, станбени објекти и цели населби, кои беа изградени како подарок со љубов за Скопје, пишува во објавата министерката .

„Сите беа обединети околу идејата Скопје да биде град на нова ера, агора на демократијата и форум на слобода. Беа исцртани и поставени темелите на една модерна метропола, во која главен двигател е неговиот континуиран развој со обележја што проникнуваат и се надоврзуваат на неговата автентичност“, нагласува Костадиновска-Стојчевска.

Министерката за култура потенцира дека „за жал, во децениите што следуваа Скопје доживеа и идеолошко-политички земјотрес предизвикан од самоповиканите квазиурбанисти и идентитетски квазиинженери преку проектот „Скопје 2014“.

„Го откорнаа градот од неговата органска поврзаност со вековната, препознатлива приказна на град со отворена и инклузивна урбана средина на разни култури и традиции. Го нарушија единствниот ритам на пријателска, комшиска заедница, во која солидарноста е нишката што поврзува“, напиша Бисера Костадиновска-Стојчевска и додаде дека објектите на ‘Скопје 2014’ се како циркони, кои може да се светликави, но тоа не е сјајот на Скопје. Тие кич циркони се симболи на делба, а Скопје не е тоа на ниту еден начин“.

Според министерката, „Скопје е град кому не му личат делбите, град кому му приличат заедништвото и емпатијата“.