Македонија
Костовски: Со завршување на изградбата на коритото на реката Серава и трим патеката, граѓаните на Бутел добиваат место за рекреирање

Проблемот не е надминат со ЈП Комунална хигиена Скопје кое е под надлежност на Град Скопје. Станува збор за сите главни улици кои припаѓаат на градот Скопје и сите контејнери кои се поставени на главните улици каде евидентно граѓаните забележуваат дека воопшто на време не се реагира од страна на комунална хигиен и депонии на самите главни улици, истакна градоначалникот на Општина Бутел, Дарко Костовски на денешната трибина на тема „Намалување на загадувањето, мерки сега“.
Костовски продолжи и додаде:
„Еден од првите проекти кои почнав да ги работам како градоначалник, првиот зафат беше чистење на коритото на реката „Серава“, но она што е многу важно да го посочам е дека имаме право како општина да ја чистиме реката само во оној дел каде што не е под ГУП, таму е наша надлежност, а секаде каде што има ГУП надлежност има Градот Скопје и во тој дел не е пипната реката да се чисти“, рече Костовски.
Костовски посочи дека конечно граѓаните на Бутел ќе добијат вистинско место за рекреирање и додаде:
„Во делот каде имавме ние надлежност уште во првиот месец кога станав градоначалник почнавме да ја чистиме реката „Серава“, тоа беше во пределот на Радишани но, не сакав сето тоа да застане таму само да ја исчистиме, туку имав идеја да реализираме еден проект кој беше 30 години наназад ветуван од било кој градоначалник а, тоа е изградба на ново убаво корито на реката „Серава“ и регулирање во пределот на Радишани. Веднаш потоа откако ќе се изгради тоа корито да почнеме да градиме и трим патека и да ја реализираме таа трим патека, станува збор некаде за површина 8,000 м2 во пределот Радишани каде се гради коритото. Овие две работи се реалност, коритото е во финална фаза, веќе се привршува, со проектите од Владата, последниот конкурс кој го имаше кон општините добивме проекти за изградба на трим патека, така да ќе финализираме и со коритото и со трим патеката некаде на пролет“, дециден е Костовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова: Саемот на книгата е обид за културен натпревар на народите

Претседателката Гордана Сиљановска-Давкова се обрати и официјално го отвори 37-миот Саем на книгата 2025, најголемиот книжевен настан во земјава којшто под мотото „Храна за душа“, се одржува од 8 до 14 мај во Скопје.
Таа нагласи дека токму Саемот е обид за културен натпревар на народите и рече „со писателите и поетите како сојузници, ние сме подготвени за културен натпревар во Европа и во светот“.
Претседателката потсети на фактот дека иако не сме дел од ЕУ, наши автори биле во 10-те наградени: Гоце Смилевски, Лидија Димковска, Петaр Андоновски и Ненад Јолдески. „Тоа е нашиот доказ дека ние културно отсекогаш сме биле дел од Европа“, рече таа и повика на културен, а не на некултурен натпревар.
Укажувајќи дека културата, образованието и науката се полиња на рамноправност, каде што нема мали и големи, Сиљановска-Давкова рече дека откажувањето од читање, значи откажување од размислување и ако така продолжиме, тоа ќе не доведе до духовен и интелектуален банкрот.
Сиљановска-Давкова истакна дека младите треба не само да читаат, туку и критички да размислуваат и повика на создавање на „Дом на книгата“, како трајно културно засолниште за идните генерации.
Прогласувајќи го Саемот за книгата за отворен таа го цитираше и Петре М. Андреевски кој нè предупреди дека, ако го загубиме односот кон книгата, ќе го загубиме човечкиот идентитет.
Македонија
Апасиев на средба со Тајасев – заменик претседателот на КПРФ

Во рамки на посетата во Москва, делегацијата на Левица заедно со бројните делегации од останатите земји, беше дел од свеченостите организирани од страна на КПРФ.
„После говорот на претседателот Апасиев во Паркот на победата, беше посетен главниот митинг кај споменикот на Карл Маркс (пред театарот Баљшој), по што делегациите се упатија и положија цвеќе кај споменикот на ,,Непознатиот војник” и Вечниот пламен, кај ѕидините на Кремљ“, соопштија од партијата.
Свеченостите беа завршени со работна средба на делегацијата на Левица и потпретседателот на КПРФ – пратеникот Казбек Куцукович Тајсаев, во канцелариите на Руската Дума.
„На пријателската средба, која помина во срдечна атмосфера, се разговараше за досегашната соработка меѓу двете партии, беа опфатени актуелните теми кои ја задираат европската и регионалната политика, како и за можностите двете партии да допринесат во развојот на соработката помеѓу младите на Македонија и на Русија“, соопштија од Левица.
Од партијата додаваат дека, на покана на Министерството за надворешни работи на Руската Федерација, Апасиев заедно со лидерите на идеолошки блиските партии утре ќе присуствува на Парадата на победата организирана по повод 80 години од Големата победа над фашизмот.
Македонија
Муцунски на состанок со министрите од ЕУ: Сега е време за дела, не само за зборови

Министерот за надворешни работи и надворешна трговија, Тимчо Муцунски, на покана на неговиот полски колега, министерот за надворешни работи Радослав Сикорски, учествуваше на неформалниот работен ручек на министрите за надворешни работи на земјите-членки на Европската унија и земјите кандидати и потенцијални кандидати за членство во ЕУ (формат GYMNICH), кој се одржа во Варшава, Полска.
Состанокот, организиран во рамки на претседавањето на Република Полска со Советот на Европската унија, претставува обновување на форматот на неформални средби помеѓу ЕУ и земјите-кандидати, по подолга пауза во неговото редовно одржување.
Темата на состанокот беа актуелните предизвици во европската надворешна и безбедносна политика, со посебен акцент на прашањата поврзани со градењето отпорност кон хибридните закани. Дискусиите беа фокусирани на практични чекори за подобра координација меѓу ЕУ и земјите-кандидати во однос на хибридните закани и влијанието од трети страни.
Во својата изјава пред почетокот на состанокот, министерот Муцунски изрази задоволство од одржувањето на средбата и упати благодарност до министерот Сикорски за вклучувањето на земјите-кандидати во овој процес.
„Во време на геополитичка несигурност, важно е земјите-кандидати да соработуваат со членките во создавањето стратегии за справување со заедничките предизвици. Клучно е што ја претставувам и земја-кандидат и земја која е целосно усогласена со надворешната и безбедносната политика на ЕУ. Затоа, одлуките и предизвиците со кои се соочуваме се заеднички. Драго ми е што денес соработуваме со колегите од ЕУ, и се надевам дека ваквата практика ќе продолжи и во иднина“, истакна министерот Муцунски.
Одговарајќи на новинарско прашање, тој додаде дека земјите-членки очекуваат од Европската Унија да го надмине јазот меѓу очекувањата и практичната испорака.
„Претставувајќи ја мојата земја, уверувам дека сме посветени на реформите, на усогласувањето со правото на ЕУ и на спроведувањето на реформската агенда, како дел од Планот за раст. Но, очекуваме Брисел и земјите-членки да ја исполнат обврската кон Западен Балкан дадена пред многу години. Тоа значи вистинско проширување, но и крај на билатерализацијата на пристапните процеси за земјите од регионот. Слушаме сѐ повеќе за јасна перспектива, но сега е време не само за зборови, туку и за дела“, додаде Муцунски.
Во рамки на еднодневната работна посета на Полска, министерот Муцунски го посети Меморијалниот музеј „Треблинка“, посветен на сеќавањето на жртвите на нацистичкиот логор на смртта. Тој оддаде почит, остави порака во книгата на жалост и се поклони пред споменикот посветен на македонските Евреи кои ги загубиле животите.