Последните инспекции потврдија сериозни регулаторни прекршувања. Доказите се јасни: од вчера направената контрола на 12 објекти со активна, важечка лиценца, до овој момент е утврдено дека 3 од нив не исполнуваат услови, односно минимум технички услови, а сепак имаат активна лиценца за вршење на дејност. За останатите 9 ве информирам дека сѐ уште е во тек проверката на документацијата и во текот на денот ќе излеземе со дополнителни информации, изјави на денешната прес-конфереција, портпаролката на Влада Марија Митева.
 
„Во однос на ваквата состојба, веднаш до Министерството за економија ќе биде испратено барање за одземање на лиценцата, забрана за вршење на дејност и сите казнени одредби коишто се возможни согласно закон ќе бидат преземени. На терен во секој момент овие денови се над 10 тима кои вршат контрола и во текот на денешниот и ќе продолжат и во текот на утрешниот ден. Ќе се проверат сите, до детал. Сакам да ја информирам и јавноста дека е направен и план и за проверка на оние кои немаат важечка лиценца, а работеле во минатото“, додаде Митева.
 
Она што се случи во Кочани не е само изолирана трагедија, посочи Митева и истакна дека тоа е симптом на расипан систем наследен од долгогодишна корупција.
 
„Ниту ќе замижуваме, ниту ќе заштитуваме. Сакам да истакнам дека ја разбираме фрустрацијата. Луѓето бараат правда и ќе ја добијат“, заврши Митева.

Денес, премиерот Христијан Мицкоски го посети Кочани и се потпиша во Книгата на жалост во чест на жртвите од трагичниот пожар.

Во овие тешки моменти, Кочани, Македонија и целиот наш народ тагуваат за младите животи што згаснаа прерано, за соништата што останаа неостварени.

„Денес, во тишина, со солзи и со почит, се поклонуваме пред жртвите и нивните семејства. Вечна им слава. Нека почиваат во мир,“ напиша премиерот Мицкоски во Книгата на жалост.

Посетата беше чин на длабока почит и солидарност со семејствата кои поминуваат низ најтешките моменти. Владата останува посветена на целосно расчистување на трагедијата и поддршка на погодените.

На социјалните мрежи лидерот на Левицата, Димитар Апасиев, бара оставка од министерот за внатрешни работи Панче Тошковски по несреќата во Кочани.

„По вчерашната експликација за одговорноста на градоначалникот на Кочани, денес продолжуваме со правни аргументи зашто и Министерството за внатрешни раноти, на чело со министерот, сноси одговорност за ситуацијата со диско-шталата.

Согласно чл. 21, ст. 1, ал. 4 од Законот за угостителската дејност („Службен весник на РМ“ бр. 62/2004), кој досега е менуван дури 15 пати, МВР дава согласност за објектот дека ги исполнува условите за заштита на јавниот ред и мир плус за безбедност во сообраќајот (паркинг и сл.).

Но, покрај оваа изречна законска надлежност, Министерството, со кое раководи Панче Тошковски – во јавноста попознат и како адвокатот на урбаната мафија, има и дополнителни ингеренции за дискотеки и кабариња, и тоа:
– проверка на работно време;
– проверка на пиротехничките средства;
– проверка на гласност и бучава;
– проверка на присуство на малолетници (и точење алкохол);
– проверка на наркотични супстанции и др.

Така што, министре, и да не сте директно кабает со непосредна вина, во крајна линија имате политичка и правна одговорност за овој случај затоа што вие сте министер од јануари 2024, а фалш лиценцата е обновена во март 2024, што значи токму во времето на вашето министерување“, пишува Апасиев.

Оттука, како што додава, според него, „смената на командирите и на началниците на СВР и ОВР не е доволна и е жртвување пион за кралица. Потребно е да покажете доблест и да си поднесете неотповиклива оставка од морални причини“, нагласува Апасиев.