Земјата годишно губи 146 милиони кубици вода за пиење. Речиси половина од водните претпријатија работат со финансиска загуба, а кај повеќето од нив и загубата на вода е поголема од 40 %, се наведува во анализата од истражувањето на цените и потрошувачката на водата за пиење во земјата на Центарот за граѓански комуникации.

„Во земјата има 67 снабдувачи со вода за пиење и секој си наплаќа своја цена за услугата. Повечето од нив немаат исти цени за домаќинствата и за другите потрошувачи, односно правните лица (фирми и институции).

Најниска цена за потрошената вода плаќаат жителите на Боговиње – 7,5 денари за потрошен кубик, а највисока цена плаќаат жителите на Кочани, дури 48,79 денари за кубик, што е 6,5 пати повеќе. Просечната цена на кубик вода за пиење во земјата е 27,49 денари.

Инаку, домаќинствата од Маврово плаќаат 2,6 денара за кубик, но и 210 денари фиксен месечен надоместок, поради што не се први на листата со најниска цена.

Меѓу првите пет општини со најниска цена на водата, четири се од Полошкиот Регион: Боговиње, Теарце, Желино и Врапчиште, а петтата е Росоман. Спротивно, најскапа вода плаќаат 4 општини од Источниот Регион: Кочани, Делчево, Пробиштип и Берово, како и Свети Николе“, се наведува во анализата.

„За правните лица, цената за кубик вода е најниска за потрошувачите во Желино – 13,42 денари, а убедливо најскапа е водата за скопските фирми, дури 68,10 денари за кубик. Овие т.н. други потрошувачи просечно плаќаат по 45,25 денари за кубик вода за пиење, што е дури 65 % повеќе од домаќинствата.

И кај фирмите, четири од петте општини со најниска цена за водната услуга се од Полошкиот Регион: Желино, Теарце, Боговиње и Тетово, а петта е Кривогаштани. Спротивно, меѓу петте општини со најскапа вода за фирмите, покрај Скопје, се и Делчево, Берово, Старо Нагоричане и Велес. Во Старо Нагоричане плус се плаќа и фиксен надомест од 87 денари на секоја месечна сметка за водата за пиење“, се додава во истражувањето.

Целото истражување можете да го најдете на следниот линк.