Македонија
Лани евидентирани над 200 кривични дела за кражба на дрва
Министерот за земјоделство, шумарство и водостопанство, Љупчо Николовски, и министерот за внатрешни работи, Оливер Спасовски, денеска присуствуваа на конференцијата на тема „Заштита на шумите, искуство и научени лекции од Италија“ заедно со амбасадорот на Италија, Карло Ромео, и генералот на италијанскитр карабинери, Донато Монако.
Целта на денешната конференција, како што велат од Министерството за земјоделство, шумарство и водостопанство, била да се презентира моментната состојба на шумите и стопанисувањето со нив, како и да се чујат искуствата на Италија во областа на справувањето со пожарите и нелегалната сеча.
„Заштитата на шумите како природно национално богатство е еден од нашите приоритети во спроведувањето на политиките за одржливо стопанисување со шумите. Пожарите, нелегалната и нерегистрираната сеча се голема закана за нашите шумски ресурси и тоа доведува до широк спектар на разурнувачки економски, социјални и еколошки проблеми. Првпат минатата година побаравме од Државниот завод за ревизија да подготви извештај за ефикасност на мерките, политиките и проектите за заштита на шумите во Република Македонија, но се покажа дека изминатите години не се изработени важните законски и стратешки документи на оваа тема и воопшто не се вложувало во заштита на шумите“, изјави министерот Николовски.
Тој посочи дека за намалување на штетните влијанија врз шумите и справувањето со нелегалната сеча потребно е почитување на принципите за одржливо управување со шумите на институциите кои законски се надлежни за шумите, силни надзорни и контролни органи и ефикасна координација со другите институции.
Министерот Спасовски потенцира дека мора да се зголемат практичните напори во сузбивањето на натамошното уништување на шумите, притоа градејќи поефикасен и координиран систем за дејствување, кој, меѓу другото, ќе се темели и на сите проверени, соодветно применливи и позитивни искуства, како што се случајот се искуствата и практиките на италијанските институции во превенцијата и сузбивањето на непланското и незаконско однесување кон шумите, но и нивна заштита и чување.
„Конечно, сакам сосема отворено да искажам едно свое лично убедување, личен мотив – човекот е дел од природата и нашиот опстанок зависи исклучиво од нејзиното чување, а не од нејзиното загосподарување. МВР неколку години по ред ги засили напорите за превенирање и сузбивање на нагорниот тренд на незаконско пустошење и сеча на шумите и нивна незаконска препродажба како огревен или градбен материјал. Само во текот на минатата година беа евидентирани 206 кривични дела по основ на кражба на дрва или пустошење шуми, со кои беа опфатени 243 сторители против кои севкупно беа поднесени 174 кривични пријави“, изјави Спасовски.
Министерот додаде дека станува збор за бесправно исечена дрвна маса вредна речиси 11 милиони денари или точно 10.939.000 денари, односно за неповратно загубени 24.841 кубен метар дрвна маса.
МВР во тесна соработка со МЗВШ лани изведе 315 заеднички акциски контроли, при што беа одземени 607 кубниметри дрвна маса, а годинава, односно во изминатите шест месеци, беа спроведени 359 заеднички акциски контроли и беа одземени 510 кубни метри дрвна маса.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЦУК: Поплавени дворови и земјоделски површини, одрони на повеќе патни правци
Центарот за управување со кризи (ЦУК) соопшти најнови информации за последиците од обилните врнежи на територијата на Македонија – состојба заклучно со 09:00 часот.
Кочани и Штип
Кај Оризарска река во село Грдовци има излевање. Водостопанство Брегалница интервенира со багер гасеничар. Механизацијата е сѐ уште на терен. Од понеделник ќе започне чистење на речното корито на Оризарска река од Грдовци кон Оризари со цел да се спречат идни несакани последици.
Сообраќајот на патниот правец Кочани Грдовци е нормализиран.
На повеќе патни правци во источниот дел се појавуваат одрони и Македонијапат интервенира за нивно расчистување.
Битола
Во населбата Стрчин КЈП Нискоградба интервенира со механизација за расчистување на нанос од чакал и земја.
Во селото Кравари има заезерени земјоделски површини без опасност по објектите.
Во селата Жабени и Породин има поплавени земјоделски површини и ЈП Водостопанство интервенира на Жабјанска река.
Елешка река е излеана и има поплавени земјоделски површини.
Нивото на водата во реките е во опаѓање.
Ресен
Поплавени се земјоделско земјиште, дворови, куќи, помошни објекти и магацини за складирање на јаболка.
Нивото на Голема река е намалено од 2,20 метри на 1,40 метри.
Ангажирани се екипи од ЕЛС Ресен, Македонијапат и ЈКП Пролетер Ресен кои вршат обиколка и проценка на состојбата на терен. Состојбата е нормализирана.
Крушево
Поради поројните врнежи водата за пиење е заматена и се препорачува да се преврива најмалку 10 минути.
Нивото на Црна река кај село Бучин е покачено но водата на местата каде што беше излеана е повлечена.
Екипи од ЈП Комуна, ТППЕ Крушево, ЕЛС Крушево и надлежни служби интервенираат на зајакнување на насипите кај критичните точки.
Демир Хисар
Локалниот пат кон село Мренога е затворен за сообраќај поради оштетување на мост на Боишка река. Надлежните служби ја обезбедуваат локацијата.
Прилеп
Во селото Лажани пријавена е штета кај еден жител поради поплавен двор и приземни простории и оштетување на тутунот.
Во селото Пешталево исто така имало поплавувања поради неисчистени канали.
Во двете села интервенираше градежна механизација за расчистување на каналите.
Тетово
Патот кон Бање Тетово е исчистен но СВР Тетово го има забрането сообраќајот од безбедносни причини.
Патот кон село Жерма и кон село Бродец е прооден.
Состојбата во село Стримница Општина Желино се следи континуирано од надлежните служби.
Македонија
Заладување и снег низ цела Македонија
Времето денеска ќе биде променливо облачно, со повремени врнежи од дожд и снег во пониските предели, додека на повисоките места и на планините ќе врне снег. Поради продор на постудена воздушна маса од север, попладне и во текот на ноќта врнежите на целата територија ќе преминат во снег.
Пообилни снежни врнежи се очекуваат во западните делови од земјата, каде снежната покривка на планините ќе се зголеми за околу 20 сантиметри, додека во останатите места се очекува снежна покривка од 5 до 10 сантиметри. Минималните температури ќе се движат од -3 до 3, а максималните од 3 до 8 степени Целзиусови.
Во Скопје, претпладне ќе преовладува променливо облачно време со повремени врнежи од дожд и снег, кои попладне и во текот на ноќта ќе преминат во снег. Ќе дува слаб до умерен јужен ветер. Температурата ќе се движи од минимални -2 до максимални 4 степени Целзиусови.
Според најавите од Управата за хидрометеоролошки работи, утре се очекуваат локални снежни врнежи и засилен северен ветер, кој ќе продолжи да дува и во понеделник. Од почетокот на следната седмица, утринските температури на одделни места ќе се спуштат и под -10 степени Целзиусови, додека дневните ќе останат под нулата.
Македонија
Филипче: СДСМ ќе го поддржи Лимани за градоначалник на Гостивар
Претседателот на СДСМ, Венко Филипче, на средба со членството во Гостивар информираше дека по разговорите е постигнат заеднички договор СДСМ да даде поддршка за кандидатот Валбон Лимани за градоначалник на Гостивар од опозициската Алијанса за Албанците.
„Апелирам да ги мобилизираме што повеќе членовите и да му дадеме поддршка на Валбон“, порача Филипче, додавајќи дека изборниот циклус ќе биде јасен индикатор за опозициското расположение во Гостивар.
Филипче додаде дека партијата има сериозни шанси да биде дел од идната локалната власт, со цел да обезбеди реална поддршка за сите граѓани на Гостивар.
Филипче посочи дека притисоците и злоупотребите во изборниот процес се реален проблем и дека токму тоа е една од причините СДСМ да не прифати укинување на техничката (Пржинска) влада.

