Македонија
Ласовска: На Дескоска приоритет ѝ било да го смести сопругот во Одборот за акредитација и евалуација

Наместо министерката Рената Дескоска да предложеше квалитетен закон за високо образование, деновиве стана јасно дека приоритет ѝ било обезбедување нместо за својот сопруг во Одборот за акредитација и евалуација во високото образование, изјави Благица Ласовска, пратеничка на ВМРО-ДПМНЕ, во врска со пишувања на „Макфакс“ дека професорот на Правниот факултет, Тони Дескоски, е еден од дваесет и тројцата членови на Одборот за акредитација и евалуација во високото образование, именуван на предлог на УКИМ од пред неколку години.
„Законот кој беше предлог на министерката, а парламентарното мнозинство на вчерашната седница го изгласа, се донесе без никаква дебата и инклузивност, иако се работи за едно сериозно прашање од областа на високото образование. Новиот закон за високо образование ги одзема сите права на студентите да одлучуваат за клучни процеси во универзитетите“, рече Ласовска.
Според неа, Законот за виското образование што беше донесен од страна на парламентарното мнозинство е крајно рестриктивен и недемократски ако се земат предвид правата на студентите, студентските избори, односно студентскиот парламент.
Со овој закон, рече таа, универзитетите, односно факултетските студенстски парламенти стануваат тела на универзитетот, факултетот, односно високата стручна школа.
„Новиот закон за високо образование го укинува правото за намалување на партиципацијата на децата од еднородителски семејства и истовремено се укинува и правото на студент кој е запишан во приватна квота на државните универзитети и плаќа 400 евра да не може да се префрли во државна квота од 200 евра доколку постигне просек од 8,5. Исто така законот го укинува правото на бесплатно школување на студентите со завршен просек од над 9 во претходната година. Со овие укинувања СДСМ класично ја отстранува социјалната компонента и вреднувањето на успехот и трудот на студентите“, рече Ласовска.
Таа додаде дека пратеничката група на ВМРО-ДПМНЕ поднесе 17 амандмани, но, како што рече, за жал министерката за образование и наука, Рената Дескоска, не прифати ниту еден амандман и токму затоа СДСМ не може да зборува дека овој закон е плод на широка и квалитетна дебата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пожарот во Прилепско отежнат поради детонации – сè уште активни три пожари во земјава

На територијата на Република Северна Македонија во изминатото деноноќие биле регистрирани вкупно 28 пожари на отворен простор, од кои три сè уште се активни, пет се ставени под контрола, а дваесет се целосно изгаснати.
Активните пожари се лоцирани во планинските предели кај Нивичино, како и на потегот помеѓу неколку села во Прилепско и Кавадаречко. Во Прилепско, интервенцијата е отежната поради детонации во близина на пожарот, поради што на тој дел не се интервенира, соопшти ЦУК.
Под контрола се пожари во општините Македонски Брод, Штип, Карбинци и Македонска Каменица, каде е зафатена претежно мешана или нискостеблеста шума, како и деградирани површини со ниска вегетација.
Пожарникарските екипи и понатаму се ангажирани на терен, а властите апелираат на внимателност и одговорно однесување, особено во подрачја каде постои зголемен ризик од нови пожари.
Македонија
Управител и фирма обвинети за неправилности во производството на медицински канабис

Полицијата поднесе кривична пријава против управителот Д.К.(30) од Скопје и фирмата.
Пријавениот, како одговорно лице, по добивање на решението лани за одгледување на канабис за медицински цели, постапил спротино на одредбите од Законот за контрола на опојни дроги и психотропни супстанци. Од МВР велат дека тој не се придржувал кон елаборатот за производство на канабис за медицински цели, што било констатирано при извршена контрола од страна на полициски службеници од МВР во содејство со Комисијата за оценување на исполнетоста на условите по однос на простор, опрема и кадар за одгледување на медицински канабис.
Притоа биле одземени 1.260 грама марихуана, како и исушено искршено стебло и поголем број на исушени и скршени гранчиња од растението канабис.
Македонија
ВМРО-ДПМНЕ по интерпелацијата на Коцевски: На Македонија и’ треба обвинителство отпорно на политичко влијание

Социјалдемократскот сојуз и ДУИ, вчера здружно застанаа на браникот да го спасат Љупчо Коцевски, на кого веќе му е изгласана интерпелација во македонското Собрание, велат од ВМРО-ДПМНЕ.
Според нив, сега на сите им е јасно, зошто никој од СДСМ и ДУИ не е во затвор по обвинение на Основното јавно обвинителство, а тоа е затоа што Љупчо Коцевски, како прв човек на обвинителството, наместо да го гони сторениот организиран криминал и корупција од лица на овие партии, тој се ставил во нивна заштита.
„Сламката на спасот за Коцевски е СДС и ДУИ, за после тој да продолжи да им ги спасува и штити криминалот. Со вчерашното собраниско гласање, односно негласањето на СДС и ДУИ за интерпелацијата на Коцевски, станаа јасни и други работи.
Сега веќе е јасно кој ја мати водата за трагедијата во Кочани. Истите оние кои претпладнето правеа пресови за Кочани, не беа задоволни од истрагата и обвинуваа за селективност, сега сметаат дека Коцевски добро си ја работел работата.
ДУИ и СДС се штитникот на Коцевски. Така тие си го штитат криминалот на Венко Филипче и Зоран Заев, исто како и на Али Ахмети.
Затоа и покрај јавно објавените индиции и докази за вмешаност во криминал и корупција на Филипче, Заев, на скоро цела фамилија на Амети, нема никаква истрага или постапка од обвинителството.
Сите се се уште на слобода, без никакви кривични пријави, да си ги шират бизнисите од криминално стекнатите пари.
На Македонија и треба независно и непристрасно Јавно обвинителство, отпорно на политичко влијание, кое ќе ги гони сторителите на криминал и корупција, а не обвинителство во служба и заштита на криминалот и криминалците од СДС и ДУИ“, велат од ВМРО-ДПМНЕ.