Македонија
Лашкоска: Прекуграничната соработка во управувањето со водите претставува камен-темелник за климатска адаптација во нашата држава

Заменик министерката за животна средина и просторно планирање Ане Лашкоска учествуваше на 10-тата сесија на Состанокот на страните на Конвенцијата за води на Економската комисија на Обединетите нации за Европа (UNECE) , што деновиве се одржува во Љубљана, Словенија.
Настанот претставува можност нашата држава да ги претстави приоритетите и да придонесе за обликување на стратешката насока на идната работа на Конвенцијата.
Лашкоска имаше свое обраќање во рамки на Сесијата: Нашите води – наша иднина, каде ги изнесе искуствата од меѓуграничното управување со водите во функција на климатските промени.
Според неа, прекуграничната соработка во управувањето со водите претставува камен-темелник за климатска адаптација во нашата држава, со оглед на заедничките водни ресурси со кои изобилува регионот.
– Придобивките од прекуграничната соработка се јасни: со заедничко работење, ние сме способни подобро да ги анализираме и да управуваме со заедничките климатски ризици, да ги намалиме неизвесностите преку размена на критични податоци и да развиеме координирани стратегии од кои имаат корист сите држави во сливот – истакна Лашкоска.
Како одличен пример за успешна меѓународна соработка и регионален дијалог, таа ја наведе соработката околу Дримскиот басен, кој ја поврзува Северна Македонија со Албанија, Грција, Косово и Црна Гора.
– Дримскиот процес значително ги подобри институционалните капацитети и прекуграничната соработка преку воспоставување заеднички тела за прекугранично управување, споделување податоци и развивање стратешки акционен план кој вклучува мерки за отпорност на климата – рече Лашкоска во своето обраќање.
Таа додаде и дека ваквите дијалози се клучни за идентификување решенија и можности за соработка, а со фокусирање на заедничките предизвици, може да се искористат придобивките од соработката, од забрзан економски раст и подобрена благосостојба на човекот, до зголемена еколошка одржливост и политичка стабилност.
Десеттата сесија на Состанокот на страните се смета за клучна пресвртница за Конвенцијата за води, како и во прегледот на нејзиниот придонес за решавање на тројната планетарна криза.
Настанот вклучува сегмент на високо ниво, општ сегмент и споредни настани, на кои се разговара за поврзани теми како што се адаптација на климатските промени, управување од извор до море, меѓусекторска соработка и финансирање на соработката во вода. Се очекува Страните на Конвенцијата за води да усвојат иновативна нова програма за работа за периодот 2025-2027 година, која помага да се реши тројната планетарна криза, како и да донесат други одлуки, вклучително и одлуки за развој на поодржлив и попредвидлив механизам за финансирање на Конвенцијата.
Настанот е во организација на Владата на Словенија и Секретаријатот на Конвенцијата за заштита и користење на прекугранични водни текови и меѓународни езера (Конвенција за вода), чиј домаќин е UNECE.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бледи се обидите на Филипче да се искупи за предавството, реагираат од ВМРО-ДПМНЕ

Добро е што Венко Филипче конечно ги согледа состојбите и дојде на позициите на ВМРО-ДПМНЕ, реагираат од партијата ВМРО-ДПМНЕ по денешните изјави на Филипче од Берлин.
„Добро е што Филипче и СДС признаваат дека проблемот со Бугарија не е само внесувањето на Бугари во Устав, дека проблемот е подлабок и дека ги опфаќа и идентитетските национални обележја.
Исто така, добро е што СДС и Филипче прифаќаат дека засегнат е и македонскиот јазик, за кој постојано ја убедуваа македонската јавност дека го заштитиле согласно нивните предавнички договори кои ги прифатија и потпишаа.
Но има работи кои македонската јавност нема ниту да му заборави, ниту да му ги прости.
Откако СДС, на чело со менторот на Филипче, Зоран Заев во чијашто влада беше и самиот Венко, распродаде се што е национално македонско и Македонија ја продаваа како невеста која богато ќе ја омажат, доцна им е за каење и за ископување на гревовите.
Задоцнети и бледи се ваквите обиди на СДС и Венко Филипче за нивните предавства, народот ќе ги памети како најголемите предавници во историјата на државата и истите ќе завршат во темните историски страници.
Сега Македонија има Влада која ги брани националните интереси и нема ни милиметар да се помести од позициите за одбрана на идентитетот, историјата, културата, јазикот.
На чело на државата сега е Влада која ги брани, зацврстува и ги провира националните идентитетски обележја.
Влада која работи во интерес на државата и граѓаните, која со напорен труд ја развива во сите пори на општественото живеење и која работи на нејзина евроинтеграција на достоинствен начин со заштитени национални обележја“, реагираат од ВМРО-ДПМНЕ, преку соопштение.
Македонија
Филипче во Берлин му се заблагодари на Шолц за поддршката за македонскиот јазик

Претседателот на СДСМ, Венко Филипче, денеска во Берлин, во рамки на Конгресот на германската Социјалдемократска партија (СПД), се сретна со поранешниот германски канцелар Олаф Шолц.
Партијата извести дека во името на СДСМ и на сите граѓани, Филипче изразил искрена благодарност за силната и принципиелна поддршка која Германија, под водство на Шолц, ѝ ја даваше на Македонија во процесот на европска интеграција, но и за континуираната поддршка од Владата и од СПД – сестринската партија на СДСМ за заштита на македонскиот идентитет.
„Благодарни сме за поддршката, особено за резолуцијата на германскиот Бундестаг во 2023 година, со која испративте силна порака и поддршка за македонскиот јазик и македонскиот идентитет. Тоа беше резултат на државничката политика на СДСМ и соработката со германските социјалдемократи. Погрешните политики на актуелната власт во изминатата година ги загрозија сите овие успеси“, рече Филипче.
Претседателот на СДСМ рече дека е уверен дека поддршка од германската СПД ќе продолжи и понатаму, а од Берлин упати и јасна порака дека СДСМ ќе остане да ги брани државните и националните интереси.
„Не смее да се дозволи било какви додавки за македонскиот јазик во Извештајот на Европскиот парламент. Јазикот и и идентитетот не биле и не смеат да бидат предмет на додавки. Во сите документи на Европската унија македонскиот јазик е јасно потврден„ рече Филипче.
СДСМ останува цврсто посветен на европската иднина на државата и на стратешките партнерства што ја зајакнуваат македонската позиција на меѓународната сцена.
Македонија
Некст тајм, 2 Бона и Слаткаристика вечерва во Расадник, градоначалникот Орце Ѓорѓиевски ги повика сите на журка

Општина Кисела Вода и оваа вечер, во рамки на Културното лето 2025, кое е под слоганот „Сè на свое место“, нуди ново музичко доживување. На платото пред салата „Расадник“, од 20:30 часот, ќе настапат едни од најголемите музички имиња на македонската сцена – Некст тајм, 2 Бона и Слаткаристика.
Градоначалникот на Општина Кисела Вода, Орце Ѓорѓиевски, ги покани сите граѓани да бидат дел од овој музички настан.
„Дали сте подготвени за уште една незаборавна вечер? 2 Бона, Слаткаристика и Некст тајм ќе се погрижат за тоа! Вечерва не се бројат часови, туку моменти! Подгответе се за вечер исполнета со добри вибрации и незаборавна забава. Не дозволувајте да ви раскажуваат – бидете дел од најдобрата журка во Скопје! Вечерва, 20:30 часот, плато пред сала Расадник“, повика градоначалникот Ѓорѓиевски.