Според Левицата, работодавците деновиве повторно ја актуализираа идејата за увоз на работна сила од странство, односно од Непал, Бангладеш, Пакистан и од Индонезија, под изговор да преживее економијата.

Оценуваат дека Владата, предводена од „левичарски и европски ориентираните“ СДС И ДУИ, наместо да се фокусира на почитување и спроведување на законите што ги одредуваат работните односи за да ги задоволат профитерските апетити на нивните капиталистички владетели – ќе увезуваат работници од странство.

„Левицата како единствена парламентарна партија на трудот повикува на итно запирање вакви погубни политики за македонскиот работник, кој едвај го преживува месецот. Наместо увезување работници, Владата да се фокусира на подобрување на животниот стандард на македонските работници првенствено преку воведување драконски казни за компаниите што не ги почитуваат веќе постојните работнички права, како и создавање реални политики за вработување на невработеното работоспособно население.

Воедно, потсетуваме дека Левицата во својата програма се залага за:
– Враќање на правото на исплата на патни трошоци и трошоци за исхрана за работниците (патарина + хранарина);
– Воведување прогресивен персонален данок на личен доход (плата, хонорар и сл., наместо сегашниот рамен данок – со цел богатите да плаќаат повеќе од сиромашните;
– Особен ангажман Државниот инспекторат за труд (ДИТ) да обезбеди доследно почитување на законските норми за работничките права“, се додава нивното соопштение.