Македонија
Левицата: Владата на ВМРО-ДПМНЕ, ЗНАМ и „Вреди“ со државни пари ќе одбележува јубилеј на ансамблот „Илирида“
На собраниската седница, на која се најде и Програмата за одбележување јубилејни настани, пратениците од Левицата, Реџеп Исмаил и Јована Мојсоска, остро се спротивставија на неа актуализирајќи дека во неа се наоѓаат одбележувања на јубилеи на спорни, сепаратистички и антимакедонски здруженија. Пратеникот Реџеп Исмаил имаше излагање на кое посочи дека доколку се изгласа ваквата програма, би се нарушила репутацијата на Собранието и дека таа е во колизија со меѓународните документи донесени со одлука на ООН:
„Во точка 99 одредено е дека се слави јубилеј од ансамблот ‘Илирида’. Прво би сакал да истакнам дека ова несреќно избрано име на овој ансамбл би требало да сноси одговорност за неговата регистрација во Централниот регистар на РМ. Нагласувам дека ова здружение, и по неговата функција и по симболот што го носи, апсолутно не исполнува ниеден од критериумите за одбележување јубилејни годишни и значајни настани“, потенцира пратеникот од Левицата, Исмаил.
Иако тој побара вака спорно срочената Програма за одбележување јубилејни настани да се врати на корекција, исфрлајќи ги, како што ги нарече Исмаил, антиасномските јубилеи, владејачкото мнозинство ја изгласа програмата не земајќи ги предвид забелешките.
На ова реагира и пратеничкатa од Левицата, Јована Мојсоска, која на својот фејсбук-профил напиша:
„На денешната собраниска седница владејачкото мнозинство си ја изгласа Програмата за одбележување јубилејни настани, меѓу кое е и 10 години од основањето на ансамблот ‘Илирида’“!
Откога пратеникот Хактан проблематизира дека здружение кое де факто промовира сепаратизам не треба ни да постои (а камоли да му одбележуваме јубилеј), пратениците од ДПМНЕ искажаа такви небулози, што навистина не знам дали толку немаат поим од историја или не знаат како да си го одбранат коленичењето пред „Вреди“.
Како вмровските пратеници да не се запознаени дека во 1992 година се одржа референдум под платформата „Илирида“, организиран од тогашните албански партии, кои го бојкотираа референдумот во 1991 г. Организаторите на референдумот бараа промена на Уставот, каде што ќе се внесе албанската автономија – Автономна Република Илирида. Исто така, беше предложен додатен дел на Уставот, со наслов: Автономна Република Илирида, која беше одредена како автономна политичка територијална и демократска заедница.
Односно, движењето „Илирида“ предвидува формирање бинационална држава со две федерални единици – албанска и македонска. И, замислете, за комитите од ВМРО, „Илирида“ воопшто не е спорна!
„Мој совет до вмровските пратеници е повеќе да читаат историја за да не завршат повторно на погрешната страна (како во Втората светска војна)“, напиша Мојсоска објавувајќи фотографија од референдумското прашање за „Илирида“: „Дали сте за политичко-територијална автономија на Албанците во Македонија“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Центар наскоро ќе стане првата општина во земјава со систем за мерење на бучава, рече Герасимовски
Општина Центар наскоро ќе стане првата општина во земјава со систем за мерење на бучава во реално време, најави градоначалникот Горан Герасимовски. Според него, јавната набавка е завршена, а веднаш по изборите ќе бидат поставени 30 мерни единици на различни локации.
„Заврши јавната набавка, чекаме да поминат изборите за да ги поставиме мерните единици – првично 30. Преку мобилна апликација, секој граѓанин ќе може да провери каква е фреквенцијата на бучава на одредена локација“, изјави Герасимовски.
Системот, како што објасни, ќе им овозможи на граѓаните докази при пријавување во Министерството за внатрешни работи или до општинските инспекциски служби. Целта е брза и ефикасна реакција на прекршителите, особено во зони каде што постојат проблеми со прекумерна бучава од угостителски објекти и сообраќај.
Во вториот дел од изјавата, Герасимовски зборуваше за следниот голем проект на општината – постепено затворање на Дебар Маало за моторен сообраќај, со што ќе се намали хаосот со паркирањето и ќе се создаде подобар квалитет на живот за жителите.
„Имаме ревидиран проект за затворање на Дебар Маало. Тој е доставен до Министерството за внатрешни работи и веќе имавме два состанока со МВР за да го подобриме и да добиеме одобрување. Така и беше договорено на последниот состанок“, рече Герасимовски.
Планот е Дебар Маало да се затвора дел по дел, почнувајќи веднаш по завршувањето на изборниот процес, а првата рампа веќе е поставена.
„Веќе поставивме рампа на почетокот на Боемска улица. Разговараме за начинот на кој таа зона ќе функционира, и тоа ќе биде пример за затворање и на други населби каде што сообраќајот и паркирањето се хаотични“, додаде градоначалникот.
Македонија
Николоски го претстави планот за Николиќ во Дојран: Уредена плажа, патека и подобро електроснабдување
Потпретседателот на ВМРО-ДПМНЕ, Александар Николоски, при посетата на дојранското место Николиќ, најави повеќе инфраструктурни и развојни проекти за локалното население и туристите.
Николоски посочи дека приоритет е решавањето на проблемот со снабдувањето со електрична енергија, бидејќи местото брзо се шири со нови куќи и викендици.
Како втор проект го најави уредувањето и осветлувањето на пешачката патека што ќе води од населбата до плажата, која, според него, ќе стане туристичка атракција.
Трет приоритет е уредувањето на плажата Николиќ, која ќе добие концесионер со обврска да ја трансформира во современо туристичко место.
Николоски додаде дека се разговара и за изградба на културен дом и решенија за предучилишно згрижување на децата.
„Убеден сум дека Илија Николиќ ќе биде новиот градоначалник на Дојран и дека заедно ќе ги реализираме овие проекти со поддршка од Владата“, изјави Николоски.
Македонија
Мицкоски од Пробиштип повика на масовна излезност во вториот круг
Во првиот круг коалицијата којашто ја предводи ВМРО-ДПМНЕ освои 33 градоначалници. Двајца во меѓу време, помеѓу првиот и вториот круг, против кандидати на нашите кандидати се откажаа, што значи дека сега веќе се 35 градоначалници и во уште 24 општини сме во вториот круг. Во недела ќе се одлучува кој ќе биде градоначалник во тие 24 општини. Во 6 од тие 26 општини сме второпласирани, со тенденција и со голема шанса, бидејќи разликата е премногу мала, да бидеме првопласирани, рече претседателот на ВМРО-ДПМНЕ, Христијан Мицкоски на вечерашниот мини митинг во Пробиштип во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори во недела на 2 ноември.
Мицкоски изрази убедување дека коалицијата предводена од ВМРО-ДПМНЕ, после овие локални избори ќе има 59 градоначалници.
„Истовремено, дозволете ми да информирам дека во 58 општини советничките листи ан коалицијата предводена од ВМРО-ДПМНЕ победија и имаат убедливо мнозинство во Советот. Кога на сето тоа ќе се додаде и резултатот во Градот Скопје, односно убедливото водство на идниот градоначалник на Градот Скопје, Орце Ѓорѓиевски, 90 илјади наспроти 30 илјади, отприлика нешто повеќе од 3 спрема 1, очекуваме во вториот круг таа бројка да дојде до 120 можеби 125 илјади гласа. И убедливата победа на советничката листа на коалицијата предводена од ВМРО-ДПМНЕ за Град Скопје, доаѓаме до фантастична бројка од 60 општини во кои што се состои и Градот Скопје, нешто што до сега на ниту една политичка коалиција во независна Македонија не и се случило“, истакна Мицкоски.
Втората крупна политичка порака, вели Мицкоски, која сакам денес од Пробиштип да ја испратам, е дека конечно, партијата која повеќе од 20 години беше дел од сите влади во Македонија, Демократската унија за интеграција, на овие локални избори е поразена.
„Ние велевме на парламентарните избори пред година и половина ги развластивме и дека ќе дојде време, кога на локалните избори, тие ќе бидат поразени. И тие практично се поразени на овие локални избори“, рече Мицкоски.
Додаде дека во вториот круг имаме три опции, од кои првата е да се гласа за коалицијата која ја претставува ВМРО-ДПМНЕ, која е победничката коалиција, додека втората опција е поранешната владина коалиција предводена од СДСМ, која е опција која не враќа назад во времето и која ја ограбуваше, понижуваше и распродаваше Македонија.
„И третата опција, по мене, најкатастрофални е да останеме дома и да не излеземе на изборите и да дозволиме некој друг да одлучува во наше име“, дециден беше Мицкоски додавајќи дека со седењето дома никој не се казнува, туку со тоа се казнуваат самите граѓани кои не излегле на гласање.
Затоа, Мицкоски ги повика граѓаните на Пробиштип, но и на цела Македонија во недела на 2 ноември да излезат на гласање што е можно помасовно и да го дадат својот глас онака како што тие мислат дека е најдобро.
„Но, убеден сум дека кога ќе застанете позади параванот, со пенкалото во рака и со гласачкото ливче пред вас, ако го слушате разумот и вашето срце, и длабоко погледате во вашата душа, ќе видите и ќе препознаете дека таму извира бројот 9 и името на Тони Тоневски. И јас сум убеден дека тоа ќе биде вашата опција за следните четири години“, посочи Мицкоски.

