Македонија
Левица во Корча, Албанија: Остро се спротивставуваме на агресивната и бескурпулозна дипломатска офанзива на Бугарија во Албанија

На денешната средба одржана во Горица / Корча (Албанија), организирана од Македонската алијанса за европска интеграција (МАЕИ), политичката партија Левица беше претставувана од највисокото раководство – претседателот, проф. д-р Димитар Апасиев и потпретседателот, м-р Реџеп Исмаил – обајцата пратеници во Собранието на Република Македонија.
Настанот беше посветен на разгледување на Нацрт-стратегијата предложена од претставниците на македонското мационално малцинство во Албанија, насочена кон подобрување на нивната положба и заштита на основните човекови права.
Од страна на делегацијата на Левица беше афирмирано дека цврсто стои зад барањата на Македонците во Албанија.
„Левица нема да остане само на декларативна поддршка – активно ќе се вклучиме со конкретни предлози и сугестии за подобрување на Нацрт-стратегијата, со цел да се создаде сеопфатен документ кој ќе адресира клучни прашања: заштита на македонскиот јазик, унапредување на образованието на мајчин јазик, институционална видливост и економско јакнење на македонските заедници. Остро се спротивставуваме на агресивната и бескурпулозна дипломатска офанзива на Бугарија во Албанија, која преку политички и социјални уцени и злоупотреба на членството во Европската Унија врши асимилациски притисоци врз Македонците. Овие обиди за бугаризација не се само непријателски кон македонскиот народ, туку претставуваат грубо кршење на основните европски принципи за заштита на националните малцинства. Левица ќе го користи секој дипломатски и парламентарен инструмент за разобличување на овие политики и заштита на македонскиот идентитет“ соопшти партијата Левица.
Македонското малцинство во Албанија, како и во другите соседни земји, Левица го смета за нераскинлив дел од македонскиот народ и неговата заштита треба да биде стратешки и приоритетен национален интерес на Република Македонија.
„Левица, освен преку партиски ангажман, ќе го искористи и својот капацитет во Собранието на РМ за проактивна политика насочена кон промоција, заштита и унапредување на нивните права, како и следење на имплементацијата на конкретните чекори кои ќе се однесуваат на сите македонскит заедници надвор од границите на нашата држава“, велат од партијата.
Целата на сите активности ќе биде создавање на долгорочна, системска и одржлива политика за заштита на правата, културен интегритет и достоинствен живот на Македонците во Албанија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Даниловски за мајмунските сипаници: Болеста не се пренесува лесно, претпазливост, но не и паника

Откако Институтот за јавно здравје вчера потврди два случаи на Monkeypox – Мајмунски сипаници во Македонија, епидемиологот Драган Даниловски на социјалните мрежи објаснува за какво заболување станува збор.
„Мајмунските сипаници се вирусна болест предизвикана од monkeypox вирусот, кој припаѓа на истото семејство како и вирусот на големите сипаници (variola vera). Симптомите обично вклучуваат: треска, главоболка, болки во мускулите и грбот, зголемени лимфни жлезди, исцрпеност, кожен осип кој може да се појави на лицето, рацете, стапалата, гениталната област или други делови од телото. Инкубациониот период е обично од 6 до 13 дена, но може да варира од 5 до 21 ден. Болеста трае од 2 до 4 недели и во повеќето случаи се повлекува без потреба од специфичен третман. Сепак, кај лица со ослабен имунитет, деца и бремени жени, може да се развијат посериозни компликации“.
Даниловски објаснува како се пренесува болеста.
„Директен контакт со кожни лезии или телесни течности на заразено лице; Близок физички контакт, вклучувајќи сексуален однос; Контакт со контаминирани предмети како облека, постелнина или прибор; Респираторни капки при продолжен близок контакт лице в лице“.
Важно е како што напоменува дека болеста не се пренесува лесно.
„Потребен е близок, продолжен контакт“.
Според него ризикот за епидемија е многу низок а состојбата се следи од здравствените власти.
Даниловски советува и што да направите за сопствена заштита.
„Одржувајте хигиена (миење раце со сапун и вода); Избегнувајте близок контакт со симптоматски лица и споделување на лични предмети; Консултирајте лекар при сомнителен осип. Информирајте се од релевантни извори – не од гласини“.
Мајмунските сипаници, како што вели не се нова, ниту неконтролирана закана. Ситуацијата, според него, бара информираност и претпазливост, но не и паника.
Од Институтот за јавно здравје најавија дека ќе продолжат да ја следат состојбата.
„Во моментов нема простор за паника, бидејќи брзо и навремено институционално се превземаат сите потребни мерки. Вечерва се мобилизирани сите институционални капацитети за надминување на
последиците од ваквата појава и се превземаат сите превентивни мерки“, беше нагласено во официјалната информација од ИЈЗ.
Тие најавија подетални информации во текот на денешниот ден.
Македонија
Филипче: Власите се нераскинлив дел од мозаикот на нашето општество

Претседателот на СДСМ, Венко Филипче, денеска по повод Националниот ден на Власите, упати честитка до сите припадници на влашката заедница, упатувајќи порака на благодарност и признание за нивниот историски и општествен придонес во државата.
„На сите припадници на влашката заедница им го честитам денешниот Национален ден на Власите. На овој ден оддаваме почит и признание на влашкиот народ, на нивната истрајност, култура и традиција.
Низ историјата, Власите имаат значаен придонес во клучните историски моменти за државата, во борбата за слобода, независност и државност. Со својот јазик, обичаи и традиции, влашкиот народ е нераскинлив дел од мозаикот на нашата држава.
Упатувам искрена благодарност до сите припадници на влашката заедница за нивната активна улога во изградбата на нашето заедничко и праведно општество, водено од вредностите на меѓусебно почитување, доверба и единство.Нека е честит 23 Мај, Националниот ден на Власите.“, истакна претседателот на СДСМ Венко Филипче.
Македонија
Мицкоски до влашката заедница: Имате значајна улога во градењето на Македонија

Премиерот, Христијан Мицкоски, упати честитка по повод 23 Мај – Националниот дел на Власите.
Тој вели дека влашката заедница има значајна улога во градењето и развојот на Македонија.
„И во историска и во општествена смисла тие се лојален дел од развојот и постоењето на државата.
Денес Власите активно учествуваат кон трансформирање на државата, нешто за коешто се обврзавме пред граѓаните.
Преку заедничка работа, труд и посветеност ние градиме соживот, но и услови за подобар и поквалитетен живот за сите граѓани.
Свесен сум дека и Власите како и останатите граѓани го живеат тешкото секојдневие на предизвици и препреки, но заедно сите посветено мораме да работиме да ги премостиме сите заеднички проблеми и да донесеме решенија за идните генерации.
Македонија го оди патот на трансформацијата, каде што ќе се почитуваат принципите на владеење на правото, правна држава, бескомпромисна борба против криминалот, како и вредностите врз кој треба да се развива државата, а тоа е исполнување на ветувањата, реализација на проектите и градење на држава во која секој ќе си ја пронајде сопствената иднина и среќа.
Наша обврска и задача е преку толеранција, меѓусебно разбирање и почитување на различностите да продолжиме да живееме и создаваме во ова парче земја и да градиме мостови на пријателство.
Нека Ви е честит 23 мај, Националниот ден на Власите“, пишува во честитката.