Македонија
Левица: Денес, оние кои ја нападнаа Македонија, се глорифицирани на ниво на „борци за права“, a патриотите кои ја бранеа државата се заборавени од властите

Пратеникот од Левица од ИЕ4, Сашко Јанчев, и членови на ЛО Левица – Прилеп денес положија цвеќе на комплексот „Карпалак” во центарот на Прилеп, во чест на убиените резервисти од 2001.
„Бранителите на 08.08.2001 беа начекани во заседа од терористичката УЧК и на кукавички начин, со отворен оган од тешки митралези и рачни ракетни фрлачи беа нападнати.
И по 23 години, сѐ уште е „нејасно“ кој и зошто издал наредба за повлекување на полицискиот пункт од Карпалак, без да бидат информирани Генералшабот и Министерството за одбрана.
Ден пред бруталниот масакр, амбасадорот на НАТО е известен од македонски генерал дека постојат диверзантски групи во тој регион, спротивно на договореното. Амбасадорот ваквите дојави ги квалификува како “медиумска пропаганда”.
После само 5 дена од овој настан, потпишан е капитулирачкиот Рамковен договор“, соопшти Левица.
„И после две децении, ваквиот кукавички чин остана само сива мистерија. Ниту една влада предводена од СДСМ и ДПМНЕ не покрена ниту иницијатива за истрага да се открие што точно се случи тој ден на Карпалак, а владата на ДПМНЕ по барање на меѓународната заедница, ги амнестира тешките злодела со „бланко амнестија“, спротивно на меѓународното право!
Не е поставено ниту достојно спомен обележје на местото на масакрот, посветено на десетте прилепски бранители кои загинаа во воениот конфликт во 2001 година, иако со години бранителите бараат од властите да се постави споменик. Дополнително, оние кои ја бранеа татковината од монструозните злодела, денес се заборавени и живеат како социјални случаи, а терористите се наградени со функции во Владата и Собранието.
Денес, оние кои ја нападнаа Македонија, се глорифицирани на ниво на „борци за права“, додека патриотите кои ја бранеа државата се заборавени од властите.
Потсетуваме дека воени злосторства никогаш не застаруваат и за да биде правдата задоволена за оние кои ја бранеа својата татковина, терористичките извршители мора да одговараат“, се наведува во соопштението на Левица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова во Њујорк: Време е кормилото на ОН да му го довериме на жена

Во рамки на учеството на 80. Генерално собрание на Обединетите нации во Њујорк, претседателката Гордана Сиљановска-Давкова се обрати на состанок на високо ниво по повод 30-годишнината од Четвртата светска конференција за жените.
Во своето обраќање, Сиљановска-Давкова истакна дека иако Пекиншката декларација останува темел на борбата за родова еднаквост, напредокот е нееднаков, кревок и често реверзибилен.
„Насилството врз жените останува неказнето, фемицидот ја осквернува светоста на животот, а жените сè уште се соочуваат со бариери во пристапот до ресурси, лидерство и одлучување,“ рече таа.
Претседателката посочи и на кризата во Обединетите нации, институција основана за заштита на мирот, а денес исправена пред бројни конфликти низ светот. Таа апелираше на храбро лидерство од жени, велејќи:„Ако сме сериозни во врска со мирот, време е да го довериме кормилото на ОН на жена.“
Во нејзиниот говор таа подвлече дека родовата еднаквост не е феминистичка привилегија, туку хуманистички императив, потенцирајќи дека жените се носители на исцелување, сочувство и надеж.
Учесниците на состанокот ја потврдија потребата од посветеност, конкретни политики и ресурси за реализација на визијата од Пекинг и за создавање праведни и просперитетни општества.
Пекиншката декларација, како што потсети Сиљановска-Давкова, повикува на еднакви права и пристап за сите – жени и мажи, девојчиња и момчиња – и тој повик, рече таа, останува ургентен и денес.
Македонија
ДИК со податоци: Пет отфрлени листи за градоначалници

Според податоците добиени од Државната изборна комисија, за претстојните локални избори се потврдени вкупно 861 кандидатска листа – 303 за градоначалници и 558 за членови на советите на општините и на Град Скопје.
Во тек е постапка за отстранување на неправилности кај дел од листите во општините Куманово, Аеродром, Карпош и во Град Скопје.
Според податоците, 8 листи за градоначалници и 20 советнички листи се во постапка на дополнување и корекција по добиени забелешки од општинските изборни комисии.
Досега, се отфрлени 5 листи за градоначалници, по една во општините Бутел, Центар, Куманово, Аеродром и Град Скопје.
По завршувањето на процесот на потврдување, ќе следува ждрепка за утврдување на редоследот на кандидатите на гласачкото ливче. Ждрепката ќе се одржи на 25 септември 2025 година.
Македонија
Градоначалниците од Западен Балкан ја основаа алијансата Green mayors во Драч

Градоначалниците од 19 општини од Западен Балкан потпишаа заедничка декларација со која ја формираа Алијансата на „зелени“ градоначалници – регионална платформа за забрзување на зелената транзиција преку општинско лидерство и прекугранична соработка.
Потпишувањето се одржа во рамки на Форумот на „зелени“ градоначалници во Драч, организиран од OSF–WB (Фондација Отворено Општество – Западен Балкан). Настанот собра над 100 учесници – градоначалници, претставници на училишта, граѓански организации и експерти за енергетика.
Градоначалникот на Битола, Тони Коњановски, на панел-дискусијата истакна:
„Проектот ‘Сончеви училишта’ и слични иницијативи покажуваат како промените можат да започнат на локално ниво. Општината работи на повеќе зелени решенија, како воведување електричен јавен превоз и изолација на стари згради. Нашата цел е да ги подготвиме граѓаните за праведна и одржлива иднина.“
На конференцијата беше посочено дека Битола е меѓу водечките општини во регионот според бројот и квалитетот на реализирани проекти за енергетска ефикасност и зелени решенија.