Македонија
Левицата: Дијабетичарите селективно добија медицински средства, борбата продолжува

По актуализирањето на системските предизвици со кои се соочуваат дијабетичарите од страна на пратениците на Левицата преку предлог-законот за дополнување на Законот за здравствената заштита, кој предвидува регулирање на правото на глукомери, системи за континуиран мониторинг на гликемија и инсулински пумпи за дијабетичарите, деновиве добиваме информации од дијабетичари дека селективно некои добиваат медицински средства, информираат од Левицата.
Дополнуваат дека на седницата на Собранието на Република Македонија за пратенички прашања, пратеникот на Левицата, Борислав Крмов, побара образложение од заменик-министерката Манолева за доцнењето на инсулинот и недостапноста на медицинските средства, на што таа неаргументирано негира дека не е достапен инсулин или системи за мониторимг на гликемија.
„Ова докажува дека политичкиот притисок на Левицата кон Министерството за здравство вроди со плод, но свесни сме дека ова не претставува системско решение, а лицата со дијабетес се во неизвесност дали ќе добијат медицински средства в година.
Затоа продолжуваме со нашата борба правата на лицата со дијабетес да бидат озаконети и обезбедувањето медицински средства да стане законска обврска на државата. Постојано ги мониторираме доцнењето на инсулинот во инсулинските аптеки во државата, цените на медицинските средства, кои може да се обезбедат од аптеките и состојбата на пациентите со дијабетес“, велат од оваа партија.
Ги охрабруваат, како што велат, сите што имаат забелешки за пристапот на Министерството за здравство кон системското справување со недостигот на медицинските средства и лекови да ги споделат своите информации со нас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тетово повика на јавна дебата за промена на имињата на улиците

Општина Тетово в петок, со почеток во 15:00 часот, организира јавна дебата за предлози за имиња на улиците.
„Ги повикуваме сите граѓани, здруженија, невладини организации и граѓанскиот сектор да учествуваат на оваа јавна дебата за именување на улиците“, велат од општината преку допис.
Додаваат дека секој предлог од граѓаните е важен и помага овој процес да биде инклузивен и успешен за граѓаните и градот Тетово.
Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.
Македонија
Оставката на Папазов помина на владина седница

Владата ја прифати оставката на градоначалникот на Кочани, Љупчо Папазов.
Советот на општината ќе треба да назначи в.д. градоначалник на Кочани, откога одлуката ќе биде објавена во „Службен весник“.
Инаку, Папазов ја поднесе оставката по пожарот во дискотеката „Пулс“ каде животот го загубија 59 лица, а околу 200 беа повредени и префрлени низ клиниките во земјава и странство.
Папазов по оставката беше приведен и одреден му беше притвор. Во куќен притвор се и неговите двајца претходници од градоначалничката фотелја.
Според истрагата, тројцата осомничени градоначалници на Кочани во периодот од 2012 година до 16 март кога се запали дискотеката, не ги извршиле своите правни обврски во согласност со Законот за заштитата и спасувањето, со што овозможиле кабарето „Пулс“ незаконито да продолжи со вршење угостителска дејност. За целиот овој период, како што беше истакнато, Општината примала уплати по основ на надоместок за угостителски објект.