Откако Левица побара одговор за кривичната истрага против поранешната директорка на Клиниката за онкологија, Симонида Црвенкова, која во 2011 година нанела штета на Фондот за здравство во висина од 350.000 евра – Јавното обвинителство одговори дека надлежниот обвинител после 4 години се откажал од кривично гонење, бидејќи делото кое ѝ се става на товар не било кривично дело кое се гони по службена должност, реагираат од оваа партија.

Во 2012 година, како што појаснуваат, МВР поднесува пријава за сторено кривично дело „Злоупотреба на службената положба и овластување“, врз основа на утврдени неправилности, констатирани од извршената контрола на Клиниката за Онкологија од страна на овластени лица од ФЗОМ, како и по извршениот надзор од страна на одделението за внатрешна ревизија при Министерството.

„Понатаму, делото кое ѝ се ставало на товар на поранешната директорка се преиначува во „Несовесно работење во службата“.

Иако согласно закон, двете кривични дела се водат по службена должност, сепак обвинителот до истражниот судија, после четиригодишна истрага, доставува допис дека се откажува од гонење со образложение дека делото не се гонело по службена должност, кој допис пак, судот го прифаќа и ја запира истрагата.

И покрај релевантните докази против неа, потпомогната од правосудните органи, поранешната директорка, која уште работи на Клиниката, не се соочува со правдата и на тој начин се дозволува криминалот во постапката за набавка на лекови на Клиниката за онкологија да се продолжи до ден денес“, истакнуваат од Левица.

Оценуваат дека зад уништувањето на здравствениот систем во Македонија стојат лица, имиња и презимиња, почнувајќи од поранешниот министер Венко Филипче – кои треба да ѝ се познати на јавноста и кои треба да одговараат за нивното соучесништво и профитирање на грбот на оние кои се борат за живот.