Македонија
Левица: Костовски од Бутел потрошил, речиси 27. 000 евра за четири дена снег

Според Левица, фирмата „Анизор Дооел Скопје” имала склучено Договор за зимско одржување на локалните улици и патишта на територија на општина Бутел за зимската сезона 2022/2023 година со вредност на договорот од 4 720 000 денари (76748 евра).
Од партијата на Апасиев реагираат дека во зимската сезона на територија на општина Бутел, мали снежни наноси имало еднаш, а снежна покривка не поголема од 3 см, не се задржала повеќе од 4 дена.
„И покрај ова, согласно Годишниот извештај на Општина Бутел, посочената фирма на локалните улици во Бутел истурила неверојатни 94 тони индустриска сол како абразивно средство за што се потрошени 1 642 676 денари (26 700 евра).
Го прашуваме градоначалникот Костовски од редовите на ДПМНЕ:
Како е можно општина Бутел за 4 дена при многу благи снежни наноси да потроши повеќе од 1/3 од предвидениот буџет за одржување на локалните улици во зимски услови?
Воедно, ги потсетуваме жителите на општина Бутел дека Општината го има формирано ЈКП „Бутел”.
Општина Бутел со истата фирма има склучено Договор за зимско одржување на локалните улици и патишта во општината за сезоната 2023/2024 год., а Фирмата „Анизор Дооел Скопје” е омилена фирма и на градоначалниците на Општина Ѓорче Петров (65 041 евра), Кисела Вода (48 780 евра), Карпош (97 561 евра) и Центар (116 098 евра)“, велат од Левица.
Додаваат дека нивната партија во континуитет ќе ја следи општинската администрација и ќе ги информира жителите на Бутел за сите можни злоупотреби на нивните пари.
„Левица се бори против расипничкото работење на криминогените партии од триото ДПМНЕ-ДУИ-СДС, кои јавните претпријатија ги користат само за партиски услуги, а јавните услуги ги вршат приватни компании блиски до нив и го цедат буџетот на граѓаните“, посочуваат од оваа партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Непречен сообраќај по влажни коловози низ државата

Сообраќајот на државните патишта се одвивa непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Без струја дел од Гази Баба

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 12.00 часот, корисниците од улица Трубарево – крак 2, општина Гази Баба.
Македонија
Променливо облачно со повремени врнежи од дожд

Времето денеска променливо облачно со повремени врнежи од дожд, пообилни во источните делови (над 15 l/m2). Ќе дува слаб до умерен ветер од северен правец.
Минималната температура ќе биде во интервал од 4 до 10, а максималната ќе достигне од 12 до 17 степени.
Во Скопје, променливо облачно со повремени врнежи од дожд. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 16 степени.
Во сабота времето ќе биде променливо облачно со сончеви периоди и со услови за локална појава на нестабилност со пороен дожд, грмежи и засилен ветер.
Во недела ќе има брз продор на студена воздушна маса од север и врнежи од дожд, на планините и на повисоките места од снег.
Ќе дува засилен северен ветер, температурите значително ќе опаднат и врнежи од снег се очекуваат и во некои од пониските места.
Во понеделник наместа ќе провејува слаб снег, а утринските температури на повеќе места ќе бидат негативни.