Македонија
Левица: Одговорност од највисоките инстанции за Онкологија – поддршка за протестот

Низата информации, кои беа објавени во јавноста, јасно укажуваат дека криминалот на Онкологија не бил возможен без инволвираност на највисоки политички инстанции. Со назначувањето на д-р Нино Васев за директор на онкологија, во моментот кога владата ја доби СДСМ, тој го исклучил КАТО-системот, чија цел е строга контрола на влезот и на излезот на лекови од системот. Како една од неговите први постапки како директор на Клиниката, тој овозможил неконтролиран излез на лековите од системот и дупка од 20 милиони евра во буџетот на Клиниката, велат од партијата Левица.
„За имплементација на КАТО-системот, македонските граѓани платија 350 илјади евра, но системот функционирал само шест месеци како последица на политизирањето на здравството и честото менување на менаџерски тимови. Со исклучувањето на КАТО-системот државна Онкологија продолжила со подготвување цитостатици на стариот начин, а всушност тоа овозможило крадење на лековите и администрација на чист физиолошки раствор кај болните од рак!
Стотици терапевтски режими биле нарушени, животи изгубени поради овозможувањето скапите лекови да се крадат и да завршуваат на црниот пазар во Косово! Тогашната директорка на Државниот здравствен и санитарен инспекторат, д-р Иринка Сотирова-Бухова, не постапила по многуте пријави од страна на некои вработени и медиумите за постоење сомнеж дека лековите завршуваат на црниот пазар. Дополнително, медицинска сестра, која била фатена како краде лекови, по шест месеци, била вратена на работа. Истата медицинска сестра повторно била фатена во кражба на лекови, при што делото не се квалификува како кражба, туку како ‘послужување’?! Нејзината наследничка, д-р Рената Младеновска (кадар на СДС), исто така не постапила по овој основ.
Во овие пет години, додека се случувал монструозниот чин на Клиниката на онкологија, се променија три министри за здравство во Владата на СДС, вклучувајќи ги Венко Филипче, Беким Сали и актуелниот Фатмир Меџити. Тие не само што не го регулирале излезот на цитостатици туку и преку именувањето на Нехат Нухи од ДУИ како организациски директор на Клиниката го помогнале криминалниот синџир. Во јавноста се појавија информации дека кадарот на Нухи креирал список со лажни болни од канцер од свои блиски и така обезбедувал дополнителна количина цитостатици за црниот пазар.
Актуелната заменик-министерка Маја Манолева, иако е на позицијата од март, таа како кадар на СДС беше надворешен соработник на Филипче и сноси одговорност за хаосот на Онкологија, покрај отворените предмети за нејзината политичка функција отворени од ДКСК. Левицата го поддржува денешниот протест закажан пред Владата на Република Македонија во 18 часот и ќе побараме кривична одговорност за сите инволвирани во крадењето лекови од онколошката клиника“, велат од партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ со остра реакција до Мицкоски: Сака да ни го избрише идентитетот со електронски попис

Демократската унија за интеграција (ДУИ) денеска жестоко реагираше на најавите од премиерот Христијан Мицкоски и Владата за спроведување на електронски попис во 2026 година, обвинувајќи дека станува збор за националистичка агенда со цел исклучување на Албанците од институциите и системот.
Во реакцијата, ДУИ потсетува дека уште во 2022 година, Мицкоски јавно ги оспори резултатите од пописот на населението, каде беше утврдено дека Албанците сочинуваат 29,5% од вкупната популација.
„Тој тогаш вети дека штом ќе дојде на власт ќе организира електронски попис за да ги ‘коригира’ резултатите. Тоа не беше техничка изјава, туку политичка порака – дел од серија ветувања со слоганот ‘да им се покаже местото на Албанците’“, стои во реакцијата на партијата.
ДУИ обвинува дека новата власт го спроведува овој план преку институциите кои ги има ставено под своја контрола.
„Уставниот суд, Јавното обвинителство и други тела активно работат во служба на оваа агенда – укинување на Балансерот, уривање на механизмите за заштита од мајоризација, исклучување на албанскиот јазик, систематско маргинализирање на Албанците во администрацијата, безбедносните служби и армијата“, наведуваат од партијата.
ДУИ не ја штеди ниту коалицијата Вреди, која според нив, со својата тишина и поддршка, ја легитимира политиката на ВМРО-ДПМНЕ.
„Уценети и заробени, тие создаваат лажна слика за мултиетничност на владата. Албанците не се наивни и никогаш нема да прифатат да бидат предмет на ‘дигитален инженеринг’, дури и ако во тој процес учествуваат Албанци од Вреди“, велат од ДУИ.
На крајот, од партијата испратија порака до граѓаните:
„Овие обиди нема да поминат. Ќе се спротивставиме со сите демократски средства, а Албанците ќе знаат да го заштитат својот глас, своето место и своето достоинство во оваа држава“.
Скопје
Центарот на Скопје блокиран два дена поради средба на високи гости

Поради најавената средба на лидерите од Западен Балкан која ќе се одржи во Скопје, Секторот за внатрешни работи информира дека во понеделник (30 јуни) и вторник (1 јули) во главниот град ќе биде воспоставен посебен режим на сообраќајот.
Од СВР Скопје соопштуваат дека мерките ќе се однесуваат на поширокото централно подрачје на градот, при што дел од улиците и булеварите ќе бидат затворени во различни временски интервали, во зависност од движењето на делегациите.
„Станува збор за највисоко ниво на безбедносна организација, и апелираме до сите граѓани да покажат разбирање и трпение. Полициските службеници ќе бидат распоредени на клучни локации и ќе ја координираат обиколката на возилата“, изјави за медиумите полициски службеник од Единицата за безбедност на патниот сообраќај.
Од СВР додаваат дека сите учесници во сообраќајот треба строго да ги почитуваат наредбите и знаците кои ќе ги даваат униформираните полициски службеници, со цел да не се создаваат дополнителни метежи или проблеми.
„Сите неопходни информации за затворените улици и алтернативните правци ќе бидат достапни преку медиумите и социјалните мрежи. Апелираме возачите да планираат алтернативни рути и да тргнуваат порано од дома“, велат од полицијата.
Граѓаните кои живеат или работат во централното градско подрачје се советуваат да користат јавен превоз или алтернативни средства за движење за време на двете критични деноноќија.
Македонија
Талески: СДСМ ги направи тунелите, мостовите, оградите – ВМРО само бетон од 10 метри

Со завршувањето на експресниот пат низ Фаришката клисура, делницата од Дреново до Градско, пратеникот на СДСМ, Миле Талески, остро реагираше на обидите на ВМРО-ДПМНЕ да си го припише проектот како сопствен. Тој потсети дека најтешкиот и најкомплексен дел од трасата е изведен токму во мандатот на СДСМ.
„Горди сме затоа што СДСМ заврши над 90% од овој капитален инфраструктурен проект. Станува збор за делница долга 10,2 километри, со вредност над 33 милиони евра, која има огромно значење не само за Прилеп и прилепчани, туку и за целиот Пелагониски регион“, изјави Талески.
Тој додаде дека во мандатот на СДСМ биле целосно завршени двата тунели со вредност од околу 6 милиони евра, биле асфалтирани 95% од трасата и изведени сите клучни елементи: 21 мост, 11 потпорни ѕидови, 15 пропусти, 1 вијадукт и 1 галерија.
„Ова не е само пат, туку животна артерија за економијата, транспортот и безбедноста во регионот. Нашата работа зборува сама за себе“, додаде тој.
Во однос на активностите на актуелната власт, Талески беше јасен:
„Што направи ВМРО-ДПМНЕ за една цела година? Заврши само мал дел, санира едно свлечиште, постави бетон од 10 метри, дел од сигнализацијата и оградите. И потоа, секако, сликање пред камери и китење со туѓи перја“.
Тој подвлече дека, и покрај тоа, најважно е што патот конечно е завршен и достапен за граѓаните, и потсети на низа други проекти изведени во мандатот на СДСМ, како експресниот пат Градско–Дреново, обновата на делницата кај Плетвар, патот до езерото кај Прилеп, како и почетокот на автопатот Прилеп–Битола, дел од Коридорот 10д.
„СДСМ сериозно инвестираше во патната инфраструктура и ние ќе продолжиме по тој пат. Благодарност до сите градежници, инженери и проекти кои ја реализираа оваа важна делница“, истакна Талески на крајот.