Македонија
Левицата: По зголемувањето на платите, Владата ги поскапе основните прехранбени продукти
																								
												
												
											Во време кога четвртина население живее со пониски примања од пазарната кошничка, Владата одлучи да се зголемат цените на повеќе од 390 производи. Иако власта најавуваше дека ќе се зголемат цените само за луксузни производи, реалноста е дека данокот на додадена вредност од 5 пораснува на 10 % за основни прехранбени производи, велат од Левицата.
Со зголемена цена, како што нагласуваат, се појавуваат производи кои се користат во секојдневието кај граѓаните, како сирењето, млекото, овошјето, зеленчукот, брашно итн.
„Манипулациите на Владата дека овие средства ќе се искористат за социјална програма потсеќаат на изговорите за поскапувањето на акцизата за т.н. зелен фонд, кој ден-денес остана уште едно нереализирано ветување на неспособната гарнитура на власт.
Јасно е дека полнењето на буџетот од овие средства првично ќе послужи за зголемување на платите на јавните функционери (кои самостојно ги зголемија своите примања од 78%) – зголемување што единствено Левицата го оспори, иако Ковачевски најавуваше нов закон за корекција на платите“, се нагласува во реакцијата на Левицата.
Левица, како што посочуваат од партијата, во минатото апелираше дека државниот буџет не може да ги издржи финансиските проекции за проектот на „Бехтел и Енка“, а тоа го поддржаа и голем број на економски аналитичари, апелирајќи до Владата да не избрзува со овој проект.
„Собраните средства од ДДВ-то ќе значи само отплаќање на милионските суми, кои Владата треба да ги исплати за отпочнување на овој проект.
Проектот за „загарантирани цени“ беше уште една манипулација од страна на Владата, која само една недела подоцна донесе Одлука за зголемување на ДДВ-то. Со ваква даночна реформа, каде што цените на основните продукти се зголемуваат, претходната мерка за загарантирани цени нема никаков ефект.
Даночните реформи кои оваа лажна левичарска власт нема капацитет да ги донесе мора да бидат во насока на намалување на социјалната нееднаквост, каде богатите стануваат се побогати, а сиромашните се посиромашни. Левицата, од позиција на власт, ќе воведе вистински данок на луксузни добра, ќе воведе прогресивно даночење на добивката на најпрофитабилните компании, ќе ја казни експлоатацијата со повисоки даноци за фирмите кои прават енормни профити, а исплаќаат ниски плати, и прогресивно ќе го оданочи личниот доход на олигархијата“, се истакнува во соопштението на оваа партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
																	
																															Македонија
Мицкоски од Брисел: Ги повторивме нашите единствени позиции за Македонија
														Премиерот Христијан Мицкоски соопшти дека во Брисел имал пријателска средба со претседателот на Европскиот совет, Антонио Кошта.
„Првата средба ја имавме точно пред една година кога господинот Кошта беше избран за претседател на Европскиот совет и од тогаш до денеска негуваме навистина пријателски и искрени односи. Господинот Кошта е голем пријател на Македонија и во таков дух помина денешната средба.
Повторно разговаравме за актуелните теми, нормално приближувањето на нашата земја кон Европската Унија и конечно формалното отпочнување на преговорите“, појасни Мицкоски.
На состанокот како што вели, биле повторени „нашите единствени позиции“.
„Тоа се навистина позиции достоинствени после сите оние понижувања кои што ни се случија во минатото, изминатите 25 години откако практично почна овој наш пат кон приближување кон Европската Унија.
Имавме пријателски и би рекол прилично продуктивен состанок, едноставно сето она кое што претставува наш приоритет е и приоритет на господинот Кошта. Покрај приближувањето кон ЕУ и отпочнувањето на преговорите, имаше уште неколку проекти кои што се за нас стратешки важни, тоа е гасниот интерконектор со Србија и крак на гасниот цевковод кон соседно Косово. Понатаму, тарифите за челикот и челичните производи на македонските производители, како и заедничкиот проект што нашата македонска Влада ќе го има со Европската комисија, а се однесува на проектите кои што треба да ги реализираме во Кочани и во кочанскиот регион.
Сè на сè, можам да кажам дека исклучително успешна и продуктивна средба, продолжуваме и понатаму со нашите средби овде во Брисел. Имаме настан со Еуроњуз, вечер имаме вечера со комесарката Марта Кос и се надевам и сигурен сум на позитивни вести“, вели Мицкоски.
Македонија
Почнува изградбата на железничкиот тунел што ќе ги поврзува Македонија и Бугарија, утре министрите на двете земји ќе го потпишат договорот
														Заменик-претседателот на Владата и министер за транспорт, Александар Николоски, утре, 6 ноември, заедно со вицепремиерот и министер за транспорт и врски на Република Бугарија, Гроздан Караџов, ќе го потпишат догорворот за подготовка, изградба и оперативност на меѓуграничниот железнички тунел на Коридорот 8.
На потпишувањето, кое ќе биде на железничката станица Ѓуешево, предвидено е да присуствуваат претставници на Европската комисија, претставници на НАТО, претставници на САД на Европската инвестициска банка, Европската банка за обнова и развој, како и претставници на Светската банка.
Изградбата на железничкиот тунел ќе претставува меѓугранична точка на двете држави на Коридорот 8. Проектираната должина на тунелот е околу 2,4 км, од кој 1,2 км се наоѓа на територијата на Македонија.
Изградбата на железничкиот Коридор 8, покрај економското значење за Македонија и регионот, има и безбедносно значење во рамките на НАТО. Во таа насока, на источниот Коридор 8 веќе е изградена и пуштена за сообраќај пругата од Куманово до Бељаковце. Делницата од Бељаковце до Крива Паланка е во фаза на изградба, а интензивно се работи и на подготовка за третата делница од Крива Паланка до границата со Република Бугарија, која во продолжение ќе го опфати и тунелското решение.
Македонија
Воведена нова процедура на Клиниката за кардиологија, пациентите со сложени срцеви аритмии повеќе нема да бидат упатувани во странство
														Министерот за здравство Азир Алиу денеска ја посети Универзитетската клиника за кардиологија по повод извршената прва аблација за коморна тахикардија во нашата држава.
„Со воведувањето на новата процедура на Клиниката за кардиологија овозможуваме пациентите со сложени срцеви аритмии да бидат згрижени и соодветно третирани во оваа врвна терциерна установа, без да има потреба да бидат упатувани во странство. Тимот од оваа клиника покажа дека во македонското здравство постои знаење, храброст и визија за врвни резултати. Ова е голем чекор напред за нашето здравство и потврда дека инвестицијата во знаење, технологија и човечки потенцијал овозможува врвни резултати“, истакна министерот Алиу при посетата.
Директорката на Клиниката за кардиологија, Даница Петкоска-Спирова, изрази благодарност до целиот тим за посветеноста во работата и грижата за пациентите со кардиолошки заболувања.
„Министерството за здравство продолжува со поддршка на иницијативите за воведување нови процедури и методи во јавните здравствени установи, со цел унапредување на третманот на пациентите на сите нивоа на здравствена заштита“, порача министерот Алиу.

