Македонија
Левица предлага укинување на Регулаторната комисија за енергетика

Политичката партија Левица реагира на поскапувањето на струјата, оценувајќи ја одлуката како ненародна. Eден од предлозите на Левица е укинување на Регулаторната комисија за енергетика и инкорпорирање на нејзините ингеренции во Министерството за економија.
Левица предлага и промена на начинот на функционирање на ЕСМ во однос на продажбата на вишоците, односно ЕСМ да го заштеди водниот потенцијал со целогодишен увоз на одредена количина на електрична енергија по економско прифатлива цена, додека во месеците кога енергијата е скапа да продава од заштедените акумулации, како и мораториум за вработување во овие енергетски компании.
Политичката партија обвини дека еден од главните виновници за поскапувањето на струјата се енергетските политики на вицепремиерот Кочо Анѓушев.
„Изговорот на социјал-демократите дека плаќаме најниска цена за електрична енергија е дрско манипулирање кога над 400.000 жители живеат на работ на сиромаштија и сведочиме масовно иселување поради социјалната беда, корумпираноста и невработеноста! Потенцираме, генезата на сегашното поскапувањето на електричната енергија има своја историја и никако не е само поради причините кои ги наведе РКЕ, кои би предизвикале поскапување за нешто повеќе од 1.5%, а не повеќе од 7%“, велат од Левица.
Партијата ги повикува одговорните да го испитаат работењето на кадровските решенија на Анѓушев, со акцент на одговорниот на Операторот на електропреносниот систем при АД МЕПСО и неговото, како што велат, катастрофално менаџирање со водните ресурси во акумулациите – како и одговорните во ЕСМ задолжени за тендерите за ископ на руда, превоз и ремонти во компанијата.
Левица предлага и итна замена на овие кадри со лица со интегритет и стручност, како и нивна одговорност за штетата која ја предизвикале.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Алиу вети транспарентност, граѓаните ќе знаат кој го помага македонското здравство

Министерството за здравство воведе нов електронски модул за транспарентен преглед на донациите во здравството, со кој јавноста ќе може во секое време да има увид во видот, вредноста и донаторите на пристигнатата помош.
Модулот е достапен на веб-страницата donacii.zdravstvo.gov.mk и овозможува детални информации за секоја донација примена од Министерството или јавните здравствени установи.
Министерот за здравство, Азир Алиу, истакна дека досега се евидентирани над 400 донации, а бројката постојано расте.
„Од самиот модул се гледа дека донациите доаѓаат од широк спектар донатори – од меѓународни институции и организации, држави и хуманитарни фондации. Токму нивната поддршка е клучна потврда за довербата и значењето што го има нашиот здравствен систем“, изјави Алиу.
Податоците покажуваат дека најголемиот дел од донациите, дури 85%, се однесуваат на медицински материјали, меѓу кои лекови, вакцини, апарати и други средства за јавните здравствени установи.
Алиу додаде дека со новиот систем ќе се избегнат ситуации кога во земјата стигнува опрема со различни оперативни системи или апаратура без достапни резервни делови и сервис.
„Со овој модул, испраќаме јасна порака дека во здравството нема скриени процеси и тајни договори, дека секоја донација е видлива, секоја помош е евидентирана, а секој граѓанин има право на информација“, порача министерот.
Македонија
Македонија преживуваше драматичен ден, пожарот во Јасен сè уште под закана

На територијата на Македонија до утрово биле регистрирани вкупно 18 пожари на отворен простор, покажуваат податоците на Центарот за управување со кризи (ЦУК). Од нив, 17 се целосно изгаснати, еден е ставен под контрола, а активни пожари во моментов нема.
Според информациите, единствениот пожар кој сè уште е под надзор, но не е целосно изгаснат, е оној во општина Македонски Брод, во паркот „Јасен“, каде што горела мешана шума. Екипите остануваат на терен за да спречат повторно разгорување.
Во текот на вчерашниот ден и ноќта биле изгаснати серија пожари низ целата држава. Во скопскиот регион беа зафатени повеќе локации: во Сопиште, кај браната „Козјак“, изгоре ниска вегетација и делови од шума, додека во Студеничани пожарот се прошири на планинскиот врв Китка, зафаќајќи мешана шума во близина на селата Горно Количани и Драчевица.
Во југозападниот регион, екипите интервенирле во Кичево, кај селото Душегубица, каде што горела ниска вегетација, а во Охрид во селото Велгошти пожарот зафатил поголема површина од ниска вегетација. Во Кавадарци, кај селото Брушани, гореле тревни површини, додека во Демир Хисар огнот избувнал на депонија во селото Кутретино.
Пожари имало и во Битола, каде што биле зафатени две локации – во месноста Тепсија и во селото Велушта, додека во Новаци, помеѓу Суводол и селото Балдовци, изгорела ниска вегетација. Прилеп и околината исто така беа погодени: во селото Беловодица, на местото викано Ливада, и во селото Лењиште бил зафатен шумски појас со букви, а во друг пожар, во близина на дата-центар во Прилеп, изгореле тревни површини.
Во општина Долнени, кај селата Стровија и Долгаец, бил зафатен простор со мешана шума, додека во Брвеница, во селото Милетино, горела ниска вегетација. Пожар избувнал и во Гостивар, во близина на градската болница, но бил брзо ставен под контрола. Во Врапчиште, кај селото Тумчевиште, и во Чешиново-Облешево, кај објектот „Мак Млин“ каде што гореле ѓубриште и гуми, екипите интервенирале за да спречат ширење.
Истовремено, во струмичкиот регион пожар избувнал кај селата Турново и Иловица, зафаќајќи депонија, но истиот бил изгаснат навреме.
Иако пожарите биле успешно изгаснати или ставени под контрола, надлежните апелираат за внимателност и совесност, бидејќи високите температури и сувата вегетација создаваат услови за нови огнени стихии.
Македонија
Вреди: Пописот беше дело на ДУИ, Албанците беа оставени како странци во сопствената земја

Вреди остро ја обвини Демократската унија за интеграција (ДУИ) дека создава неправди врз Албанците, а потоа вината ја префрла врз други.
„ДУИ се преправа дека е загрижена за правичната застапеност на Албанците, но вистината е горчлива: тие ја создадоа неправдата што денес ја осудуваат“, стои во соопштението на ВЛЕН.
Оттаму потсетуваат дека Законот за попис бил изготвен и предложен токму од министрите и пратениците на ДУИ, меѓу кои Бујар Османи, Артан Груби, Фатмир Бесими и Арбер Адеми. Тие додаваат дека во законот биле внесени одредби кои, според нив, ги третираат Албанците од дијаспората како странци во сопствената земја.
„Резултатот не е статистичка грешка, туку намерно намалување на бројот на Албанците и напад врз правичната застапеност. Тоа е историска неправда и едно од најголемите предавства на албанската кауза“, наведуваат од Вреди, додавајќи дека додека раководството на ДУИ се занимавало со бизнис интереси, Албанците доживеале неправда од државата.
Во соопштението се истакнува дека Вреди ќе биде коректор на „свесните грешки на ДУИ“ и дека нема да дозволи повторно фалсификување на бројките и достоинството на Албанците.
„Нема амнестија за политичка вина. Времето на измама заврши, сега е времето на албанскиот граѓанин“, порачаа од Вреди.