Македонија
Левицата: СДС и ДПМНЕ ја изгласаа сопругата на адвокатот на Заев за нов член на антикорупциската комисија

Со 97 гласа „за“ пратениците на широката коалиција, составена од СДС, ДПМНЕ и ДУИ, минатата недела заеднички го изгласаа новиот состав на Државната комисија за спречување на корупцијата, велат од Левицата.
Според Левицата, за нов член на антикорупциската комисија е избрана судијката Софија Спасова-Медарска, сопруга на партискиот адвокат на Зоран Заев, Филип Медарски, кој го застапуваше во случајот „Поткуп“.
„Токму ДПМНЕ во минатото обвинуваше дека фамилијата Медарски го има узурпирано правосудниот систем, каде што обвинителка во вишото ЈО е мајката на Филип Медарски – Елица Медарска.
По којзнае кој пат се потврдува работата на оваа „широка коалиција во Собранието, особено кога станува збор за партизација на институциите. Довербата во работата на судството е минорни 2 %, а овие три партии правосудните институции ги имаат претворено во фамилијарни династии.
За ваквиот скандалозен избор на новиот состав на ДКСК реагираа и од Платформата на граѓанските организации. Тие обвинија дека процесот на селекција бил пристрасен и партизиран, што доведува до загриженост за непристрасноста на новоизбраните членови“, се истакнува во реакцијата на партијата.
Левицата, како што додаваат, со нетрпение очекува да ги види „резултатите“од борбата против корупцијата, која треба да ги спроведе сопругата на адвокатот на аболираниот поранешен премиер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.