Македонија
Лекарската комора бара промени на казнената регулатива на Фондот

Лекарската комора остро реагира на наплатата на изречените казни за матичните лекари од страна на Фондот за здравствено осигурување. Оттаму велат дека докторите од примарното здравство се исцрпени од борбата со пандемијата.
Реакцијата на Лекарската комора се однесува на казните што се изречени за административни пропусти во работењето и не се поврзани со пропусти во лекувањето.
„ Матичните лекари се првиот контакт на пациентот со здравствениот систем и тие треба да се мотивирани и да имаат механизми здравствените проблеми на болните да ги решаваат брзо и ефикасно на примарно ниво, а не да ги проследуваат пациентите непотребно до другите нивоа на здравствениот систем, што се наметнува поради некои важечки прописи како што е режимот за препишување лекови. Имено, матичните доктори во местата каде што нема специјалисти по одредени специјалности, лековите за хронична терапија кои требале да бидат препишани врз основа на претходна препорака, односно медицински извештај од одреден специјалист, ги препишувале врз основ на медицински извештаи од специјалисти кои согласно режимот на препишување лекови немале право да ги препишуваат. Ова се правело со цел да излезат во пресрет на потребите на пациентите“, се вели во реакцијата.
На докторот, како што додаваат, приоритет му е обезбедување континуитет во лекувањето на пациентите, а здравствената регулатива треба да биде во функција на овој приоритет.
„Лекарите се исцрпени од зголемениот интензитет на работа, но опстојувањето на нивните ординации од финансиски аспект е засегнато и со други негативни ефекти од кризата, како што е набавката на медицинска заштитна опрема која во целиот период на пандемијата е на нивен трошок, како и значително повисоките сметки за електрична енергија кои ги добиваат поради енергетската криза.
Препознавајќи ја тежината на проблемот со кој се соочуваат матичните лекари, Лекарска комора неколку пати досега реагираше до Фондот за здравствено осигурување со барање за повлекување на казните и нивно ревидирање, како и промени на казнената регулатива на ФЗО. Потенцираме дека сега матичните лекари повеќе отколку кога било не се во состојба да ги поднесат овие трошоци“, велат од Лекарската комора.
Оттаму порачуваат дека во интерес на пациентите, здравствените работници и здравствениот систем е Фондот сериозно да постапи по овие реакции и во најкусо време да обезбеди решение кое е прифатливо за сите страни, бидејќи , како што појаснуваат, едностраното носење одлуки, без комуникација на договорните страни само ќе ги продлабочи проблемите кои постојат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Николовски: Трубарево е земјоделски регион, веднаш да се направат анализи на почвата и водата

По големиот пожар во Трубарево, потребата од итни и стручни анализи на почвата и водата е неопходна и неминовна, предупреди пратеникот на СДСМ, Љупчо Николовски во одговор на новинарско прашање на денешната прес-конференција.
„Тоа требаше и да биде направено, заради тоа што Трубарево е регион во којшто се произведува храна, земјоделски производи. После една ваква хаварија која што ни се случи и после ваквите анализи во сегмент на воздухот, задолжително е институциите, министерствата и научните институции веднаш да ги направат неопходните анализи и на водата и на почвата, се со цел да ги знаеме и тие резултати. Граѓаните мора да бидат сигурни и безбедни, и да ги знаат точните информации и точно да се види дали има контаминации во делот на резултатите коишто ќе ги добиеме и од водата и од почвата“, рече Николовски.
При тоа, Николовски нагласи дека власта треба да прекине да ја бара вината во други, бидејќи како влада има одговорност да ги заштити а не да ги лаже граѓаните.
„Неколку министри ја лажеа јавноста дека нема никакви лоши резултати, дека се нормални, дека воздухот не е загаден. Меѓутоа, видовме дека експертите и сите оние стручни анализи, и податоци, го покажуваат токму спротивното, граѓаните имаат право да ја знаат вистината.Одговорноста е пред се во владата, во надлежното министерство. Власта мора да ја прекине праксата дека се она што ќе се случи во нејзино време, не може некој да биде друг крив, не може некој друг центар да биде одговорен за сето она што ни се случува постојано“, изјави Николовски.
Македонија
(Видео) Кузеска: Кој ќе ја преземе одговорноста за расипаниот радар на скопскиот аеродром?

Денес повторно гледаме како партизацијата и неспособноста на ВМРО-ДПМНЕ директно ги доведуваат граѓаните во опасност. Радар во Контролата на летање на скопскиот аеродром се расипал. Тоа значи дека секој авион што слетува во Македонија сега зависи од импровизација, бавни процедури и надворешни радари од соседни земји, обвини портпаролката на СДСМ, Богданка Кузеска.
Според неа, ова не е само технички дефект, ова е последица на насилното вдомување на партиски кадри во една од најважните институции за безбедноста на сите нас.
„Наместо професионалци, таму се вработуваат луѓе по партиска линија и јасно е дека срга ќе гледаме хаос и импровизација. Сега ќе понесе ли некој одговорност од власта“, рече Кузеска.
Таа прашува кој ќе ја преземе одговорноста за расипаниот радар и до кога безбедноста на граѓаните ќе зависи од импровизациите на ВМРО-ДПМНЕ и уште колку институции ќе паднат во колапс пред ВМРО-ДПМНЕ да признае дека нивниот модел на владеење е опасен и погрешен?
Македонија
Николовски: На ВМРО-ДПМНЕ не му одговараат европските реформи во шумарството, затоа ги стопира

Пратеникот од СДСМ Љупчо Николовски на денешната прес-конференција посочи дека стопирањето на реформите во шумарството од страна на владата на ВМРО ДПМНЕ оди на директна штета на природните ресурси на државата и заштита на шумите. Николовски предупреди дека власта ги напушти европските реформи во шумарството, за што потврда има и од Делегацијата на ЕУ во Скопје.
„Во времето на СДСМ на мое барање како тогашен министер за прв пат од ЕУ побаравме а тие се сложија да застанат за целосна и длабинска реформа на секторот шумарство. И токму затоа ни одобрија три големи проекти во износ од над 1,5 милиони евра за да се реформира и да го трансформитаме Јавното претпријатие. „Македонски шуми“ и да се спроведе целата реформа на секторот шумарство кој што е значаен. Се изработија нови закони за шумите, за формирање Агенција за шумите и шумската полиција, а закон за формирање на ново државно претпријатие за „Македонски шуми“. Односно со овие средства и проекти на кои што изминатите години се работеше интензивно, се обезбеди целосна трансформација на ЈП „Македонски шуми“ и секторот шумарство но и креирање на интегриран ИТ-систем за контрола на дрвната маса и шумските пожари. Тоа беа вистински европски реформи“, рече Николовски.
Тој додаде ИТ системот за следење на дрвната маса којшто го има во сите европски земји иако е изработен,набавен и е во сопственост на државата воопшто не е ставен во фунција.
„Што направи ВМРО-ДПМНЕ? Ги повлекоа законите, ги прекинаа реформите, софтверите за следење на дрвната маса се нефункционални. Јасно е дека на некому му одговара хаосот, а не европските стандарди и контрола. Ова оди директно на штета на природните ресурси на државата, на заштита на шумите, на граѓаните крајно“, рече Николовски, додавајќи дека СДСМ покажа како се гради систем што дава резултати и ќе продолжи да дава решенија за поддршката на земјоделството, шумарството и водостопанството.