Македонија
Ле Дриан: Договорот меѓу Македонија и Грција претставува значаен развој на настаните за регионот

Спогодбата од јуни во врска со името меѓу Македонија и Грција претставува значаен развој на настаните за регионот, смета францускиот министер за Европа и надворешни работи, Жан-Ив Ле Дриан.
Тој вели дека Франција ја поддржува европската перспектива на земјите од Западен Балкан и тие по вокација треба да се приклучат кон Европската унија, кога сите критериуми за нивното пристапување ќе бидат целосно исполнети.
„Во исто време, Европската унија треба да се преизгради и нејзиното функционирање да се подобри пред да биде во можност да прими нови земји-членки. Заклучоците усвоени од Советот на 26 јуни оваа година се однесуваат на тие моменти. Без одлука во оваа фаза за отворање на пристапните преговори со Европската унија со Македонија и Албанија, заклучоците ги вреднуваат напорите на овие земји направени во последниве месеци за нивно приближување до Европската унија. И покрај тоа што не е формален критериум за процесот на проширување, спогодбата од јуни во врска со името меѓу Македонија и Грција претставува значаен развој на настаните за регионот“, вели Ле Дриан.
Во врска со членството во НАТО, тој додава дека склучувањето на спогодбата ја оправдува поканата за започнување на разговорите за пристап кон Алијансата, преку Декларацијата од Самитот во Брисел.
„Што се однесува до отворањето на преговорите за пристапување кон Европската унија, заклучоците на Советот од јуни предвидуваат одново да се преиспита состојбата во Албанија и во Македонија, во јуни 2019 година, врз основа на извештајот на Комисијата и со оглед на големиот број критериуми, вклучувајќи го и напредокот во борбата против корупцијата и организираниот криминал. Ние ќе го следиме реално постигнатиот напредок, во контекст на извештаите од Комисијата од 17 април кои откриваат недостатоци во овие две области. Во меѓувреме, од суштинско значење е да се развие практична соработка меѓу балканските земји и Европската унија, со цел да се продолжи со зацврстување на регионот во Европа“, вели францускиот министер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Комисијата утврди дискриминација врз професионалните војници – синдикатот бара итни законски измени

Комисијата за спречување и заштита од дискриминација утврди индиректна дискриминација врз професионалните војници од страна на Министерството за одбрана, информира Независниот синдикат на професионални војници СО Скопје.
Претставката до Комисијата ја поднел Александар Насковски, претседател на синдикатот и професионален војник, на 12 ноември 2024 година. Според него, Министерството со години не го трансформира работниот однос на професионалните војници од определено на неопределено време, спротивно на член 46 од Законот за работни односи.
„Професионалните војници се единствената категорија вработени во државата кои работат и по 25 години со договори на определено време, често продолжувани и по седум или осум пати, без можност да остварат право на пензија“, изјави Насковски.
По долготрајна институционална игнорација, синдикатот на 3 јуни 2025 година достави предлог-закон за изменување и дополнување на Законот за служба во Армијата до Собранието и сите пратенички групи. Со предложените измени се предвидува конечно уредување на статусот на професионалните војници и спроведување на препораките од Комисијата.
Синдикатот очекува Министерството за одбрана и пратениците да постапат по препораките и да ја исправат, како што велат, децениската неправда, со што ќе се постигне и буџетска заштеда за институцијата.
Македонија
Ангелов на состанок во Берово: Планирање на акција за справување со пожарот над Русиново

Раководителот на Главниот штаб за управување со кризи и директор на Дирекцијата за заштита и спасување (ДЗС), Стојанче Ангелов, синоќа присуствуваше на координативниот состанок на Општинскиот штаб за заштита и спасување во Берово, предводен од градоначалникот Звонко Пекевски.
На работниот состанок се анализираа извештаите за движењето и интензитетот на пожарот во планината над селото Русиново. Како главни предизвици беа посочени променливиот ветер, остатоците од стари пожари – шупливи дрвја кои при горење паѓаат по стрмнините – како и непристапниот терен, што значително го отежнува гаснењето.
Според соопштението од ДЗС, состанокот траел подолго поради разгледување на повеќе стратегии за утринска интервенција. Се планира комбинирана акција со теренски сили, механизација и ангажман на воздухоплови, чија активност ќе се координира од земја во согласност со конкретните дневни услови.
Ова е дел од континуираните напори за справување со активните пожари во источниот дел на земјата.
Македонија
Tри улици од Карпош ќе останат околу шест часа без струја

Без електрична енергија денес ќе останат корисниците од три улици во Карпош.
Во периодот од 08.15 до 13.30 часот, без струја ќе бидат корисниците од улиците Иван Цанкар – парни броеви, Франц Прешерн – непарни броеви и Вангел Дину. ( општина Карпош ), информира ЦУК по известување добиено од ЕВН.