Македонија
Лимани: Заложбите за поголема интеграција на Ромите во општеството да ги преточиме во дела

Министерот за социјална политика, демографија и млади, Фатмир Лимани присуствуваше на презентацијата на Извештајот за состојбата со напредокот во инклузијата на Ромите во Република Северна Македонија.
На настанот кој беше во организација на Министерството за социјална политика, демографија и млади и Мисијата на ОБСЕ во Северна Македонија, покрај министерот Лимани се обратија и шефот на Мисијата на ОБСЕ во Скопје, амбасадорот Килијан Вал и министерот без ресор задолжен за инклузија на Ромите, Шабан Салиу.
Во своето обраќање пред присутните министерот Лимани, истакна дека, почитувањето на човековите права и слободи е темел на демократијата, а во таа насока најголема одговорност за нивното почитување ја имаат оние кои носат одлуки, кои го создаваат јавното мислење, но и невладиниот сектор како партнер кој е мост меѓу граѓаните и институциите.
„Република Северна Македонија во регионот, па и пошироко стана пример за земја со традиционално меѓуетничка и меѓурелигиска толеранција и земја во која се почитуваат разликите. Тоа го постигнавме преку политики кои обезбедуваат еднаков степен на вклученост и интеграција на сите етнички заедници,“ посочи Лимани.
Тој истакна дека Ромите играат важна улога во изградбата на инклузивна Европа, како и дека Европската платформа за вклучување на Ромите, започната во 2008 година, има за цел да поттикне соработка и размена на искуства за успешно вклучување на Ромите во политики и практики помеѓу земјите членки на ЕУ, меѓународните организации и ромските претставници на граѓанското општество.
„Големо влијание и удел во постигнувањето на интеграцијата на Ромите има и Европската платформа против сиромаштијата и социјалната исклученост – Стратегијата наречена Европа 2020. Во неа е зацртано извлекувањето на најмалку 20 милиони луѓе од сиромаштија и социјална исклученост во следната декада,“ рече Лимани.
Тој се осврна на тоа дека како држава имаме усвоено две национални стратегии за Роми, 2005-2015 и 2016-2020, како и дека во 2022 година е започната новата Стратегија за инклузија на Ромите 2022–2030, која е дел од стратегиите за вклучување на сите етнички заедници.
„Активно работиме на создавање програми за вработување, здравство, образование, домување и обезбедување на лични документи за ромската заедница,“ порача Лимани.
Дел од заклучоците од презентацијата на Извештајот се дека голем најголем напредок е направен во однос на образованието, како и во обезбедувањето на трајно решение на граѓанскиот статус на Ромите што не се евидентирани во матичните книги во државата, преку носење на законски решенија. Додека пак треба сеуште да се работи на подобрување на состојбата за отстранување на стереотипите и предрасудите кон Ромите во сите сегменти на општествено – економско живеење во Северна Македонија. Како најгорллив предизвик е посочено обезбедувањето на здравствената заштита и осигурување на Ромите, ниско ниво на застапеност на Ромите во јавниот сервис и развојот на културата на истите и несразмерно учество на Ромите во општествено -политичкиот живот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Свежо утро, а преку ден до 33 степени

Времето денеска ќе биде сончево со мала до умерена локална облачност. Ќе дува слаб до умерен, а вдолж Повардарието повремено засилен северен ветер.
Минималната температура ќе биде во интервал од 9 до 19, а максималната ќе достигне од 25 до 33 степени.
Во Скопје, сончево со умерена облачност. Ќе дува слаб до умерен северен ветер. Минималната температура ќе се спушти до 16, а максималната ќе достигне до 30 степени.
До средината на следната седмица ќе преовладува претежно стабилно време со дневни температури малку под просекот за овој период од годината. Потоа времето ќе биде сончево и потопло со пораст на дневната температура.
Македонија
(Видео) Елитната полициска единица ЕБР прослави 24 години постоење

Со свечена церемонија вечерва на градскиот плоштад во Кавадарци беше одбележан 23 август – Денот на Единицата за брзо распоредување (ЕБР) и 24 години од формирањето на оваа елитна полициска единица при Министерството за внатрешни работи. Настанот се одржа во присуство на премиерот Христијан Мицкоски, раководството на МВР, министри, пратеници, претставници на институциите и локалната самоуправа, полициските синдикати, како и семејства на загинати и починати припадници на ЕБР.
Граѓаните на Кавадарци имаа можност да се запознаат со опремата на единицата преку концептот „До вас, за вас“ и да се дружат со припадниците на полицијата.
Министерот за внатрешни работи, Панче Тошковски, во своето обраќање истакна дека ЕБР е симбол на сигурност и доверба, формирана врз темелите на професионализам, пожртвуваност и верност кон државата.
„Во изминатите две и пол децении, ЕБР се втемели како симбол на сигурност и брза реакција, вистински штит на државата и граѓаните. Ниту еден припадник не се двоуми да преземе одговорност и да дејствува во најризични ситуации, каде што секунда одлука може да значи спас на човечки животи“, порача министерот Тошковски.
Тој додаде дека токму оваа единица има незаменлива улога во борбата против криминалот и корупцијата.
„Разбиени се опасни криминални групи, расветлени стотици дела, запленета е дрога која ќе завршеше кај младите, спречени се илјадници обиди за нелегален влез во државата. Дојде време да покажеме дека државата е посилна од криминалот и дека институциите ја враќаат довербата кај граѓаните“, истакна Тошковски.
На свеченоста зборуваа и досегашниот командант на ЕБР, Зоран Јанаќијев, кој даде свое видување за иднината на единицата, како и градоначалникот на Кавадарци, Митко Јанчев, кој ја поздрави иницијативата „До вас, за вас“.
Беа доделени плакети на најистакнатите припадници на ЕБР, а претходно во текот на денот беше положено свежо цвеќе пред спомен-обележјето во чест на загинатите херои на единицата.
Македонија
„Корумпираната држава ни ги украде децата“, потресни сцени на маршот во Кочани

Родителите, семејствата и пријателите на младите кои трагично ги загубија животите во пожарот во дискотеката „Пулс“ повторно одржаа марш во Кочани. Повторно се гледаа солзи, тишина и болка, а поворката ја следеа фотографии на загинатите кои нивните родители ги носеа во рацете.
„Корумпираната држава ни ги украде децата. Корупцијата ни го одреди местото каде да ги славиме нивните родендени – на гробиштата. Ни го украдоа сонот, ни ја скратија иднината, а болката ја претворија во наша секојдневна реалност. Бараме правда за нашите деца, бараме крај на корупцијата“, пишуваше на еден од транспарентите.
Слична порака се појави и на друг транспарент: „Моето дете умре, беше убиено од систем кој не штити, туку убива.“
Особено емотивен момент предизвика Мита Тасева, мајката на загинатиот диџеј Стефан Тасевски, чиј роденден се совпадна со маршот.
„Денес небото одекнува од твојата музика, синко наш. Слави го роденденот со ангелите“, порача таа, оставајќи длабока тишина меѓу присутните.
„Ние, родителите, скапо го плативме данокот на корупцијата“, стоеше напишано до фотографиите на младите кои повеќе не се меѓу живите.
Овој марш уште еднаш ја отвори болната тема за безбедноста, одговорноста на институциите и вечната битка на родителите – правдата за своите деца.