Македонија
Лимани кон младите: Нашите врати се отворени за вас
Министерот за социјална политика, демографија и млади, Фатмир Лимани, денеска, учествуваше на конференцијата со наслов „Од Словенија до Северна Македонија: Синергијата на образованието и бизнисот во Северна Македонија“, во организација на Амбасадата на Република Словенија, Македонската студентска организација во Словенија и Друштвото на словенечки и македонски стопанственици.
Целта на оваа конференција беше на едно место се соберат младите студенти, претставниците на институциите и стопанствениците, да се слушнат предизвиците со кои сме соочени како држава и заеднички да се работи на изнаоѓањето решенија, со кои ќе се подобри демографската слика на државата, односно ќе ги вратиме младите дома, а на идните генерации да им се обезбедат услови за образование и напредок во својата земја.
Во своето обраќање пред присутните министерот Лимани се осврна на сериозноста на состојбата со младите од Македонија, кои сè повеќе иднината ја гледаат во други држави. Притоа ја истакна заложбата на оваа Влада, која ги препознава предизвиците со младите и заради подигнување на нивното значење во општеството, секторот млади го вгради како приоритетна област во Министерството за социјална политика, демографија и млади.
„Би сакал да се осврнам на едно од последните истражувања на Фондацијата ‘Вестминстер’ за учеството на младите во социјалниот и политичкиот живот во државата, според кое 62 % од младите би се отселиле од Македонија доколку им се даде шанса, а уште посериозно е дека дури 77 % од младите не би се вратиле назад во Македонија доколку се отселат. Како фактори што влијаат на овие нивни одлуки се вбројуваат состојбите во образовниот систем, студентскиот стандард, здравството, како и можностите за вработување. Овие бројки се алармот, кој веќе е вклучен. Оваа состојба во која се наоѓа нашата држава е многу сериозна. И наша одговорност како Влада е да преземеме сериозни чекори ВЕДНАШ за да го смениме овој негативен тренд,“ посочи Лимани.
Тој посочи и дека презентацијата на резултатите од анкетата спроведена од Македонската студентска организација во Словенија и излагањата на студентите од Универзитетите во Словенија за тоа како младите гледаат на можноста да се вратат во својата земја за да бидат дел од општествената заедница се патоказите што треба да ги следиме ако сакаме да постигнеме успех во решавањето на овој предизвик.
„Следејќи го овој негативен тренд на заминување на младите од државата и нивно останување таму, резултира со креирање конкретни политики и стимулативни мерки од страна на оваа Влада, која се обврзува да ги реализира по секоја цена. Еден од главните приоритети на кои ќе работиме е отворањето нови работни места за младите, кое може да се постигне преку поддршка за претприемаштво и стартапи, обезбедување финансиска поддршка и грантови за млади претприемачи, како и обуки и менторски програми за развој на бизнис-вештини,“ рече Лимани.
Тој ги посочи и партнерства со приватниот сектор, поттикнување инвестиции од домашни и странски компании, даночните олеснувања и субвенциите, формирање јавно-приватни партнерства за развој на нови проекти, поддршката на новите технологии и иновации, инвестициите во инфраструктурата и услугите во руралните подрачја како дел од мерките што ќе ги преземе оваа Влада.
„Сликата на заминување на младите студенти надвор од државата затоа што тука не успеале да се вработат и нивниот потенцијал не бил препознаен, ќе го замениме со нова. Ќе обезбедиме загарантирана понуда за работа за најдобрите студенти. Оваа мерка ќе придонесе кон намалување на невработеноста меѓу младите и да помогне во задржување на талентираните млади луѓе во земјата,“ посочи Лимани.
Тој на крајот на своето обраќање им порача на младите: „Нашите врати се отворени за вас, ајде заедно да ги креираме и реализираме идните младински политики.“
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Започна поставувањето на семафори на крстосницата кај Васко Карангелевски во Аеродром
Денес екипи на ЈП „Улици и патишта“ – Скопје започнаа со градежните активности од првата фаза за поставување на светлосна сигнализација на крстосницата од улиците „Васко Карангелевски“ и „Ангел Димовски“ во населбата Аеродром.
„Работните активности се изведуваат по налог на Град Скопје, односно согласно основен сообраќаен проект за воведување на светлосни сигнали на оваа крстосница донесен од Град Скопје и според долгоочекуваната согласност од Министерството за внатрешни работи“, велат од „Улици и патишта“.
Во оваа фаза се врши рачен и машински ископ на земјан материјал за поставување темели на семафорски столбови и ископи за спроведување на електричната инсталација. По завршувањето на градежните работи, ќе следува монтажа на семафорската опрема и сигнализација.
Со поставувањето на новата семафоризирана крстосница, ќе се подобри проточноста на сообраќајот и значително ќе се зголеми безбедноста на учесниците во сообраќајот во овој дел од градот.
Македонија
Три нови битолски училишта ќе добијат фотоволтаици до крајот на учебната година
Општина Битола до крајот на учебната година ќе постави фотоволтаични системи на уште три згради на основните училишта во градот. Со оваа мерка, локалната самоуправа продолжува со активностите за зголемување на енергетската ефикасност и користење на обновливи извори на енергија во образовните установи.
Во текот на овие денови се вршат теренски проверки на состојбата на покривите на училиштата, како и проценка на можностите за најсоодветна позиција за поставување на соларните панели.
По завршувањето на анализите и објавувањето на тендерските постапки ќе следува и реализацијата, односно поставувањето на новите фотоволтаични соларни централи за производство на електрична енергија во три нови битолски училишта.
Со воведувањето на фотоволтаиците се очекува училиштата да остварат значителни заштеди во трошоците за електрична енергија и да придонесат кон намалување на јаглеродните емисии во општината.
Во моментов, на 10 објекти на основни и средни училишта во Општина Битола се поставени сончеви панели. Кон крајот на 2023 година, на објектот на училиштето и градинката во населбата Долно Оризари беше поставена првата фотоволтаична електрична централа во училиштата, по што во 2024 година беа поставени уште девет — три на средни и шест на основни училишта.
Македонија
Оставка на Сабахадин Рустеми од „Комунална хигиена“ за да не влијае на истрагата
В.д. директорот на ЈП „Комунална хигиена“ – Скопје, Сабахадин Рустеми, поднесе оставка од функцијата поради морални причини, соопшти неговиот адвокат Асмир Алиспахиќ.
Адвокатот изјави дека оставката не е поврзана со признание на вина, туку со желба да не влијае на истрагата.
„Тоа е чин што ќе овозможи непречено водење на постапката. Ќе докажеме дека Рустеми нема никаква поврзаност со делото“, рече адвокатот.
Според него, постојат докази дека Рустеми презел активности за обезбедување механизација и ресурси, но дека неговите барања не биле одобрени од управниот одбор на претпријатието.
Рустеми и Аки Саити, управител за отпад во претпријатието, добија мерка притвор од 30 дена поради основано сомнение за сторено кривично дело загрозување на животната средина и природата со отпад, како и опасност од влијание врз сведоци и можност за повторување на делото.

