Македонија
Лога: Насилството врз жените и девојчињата не смее да биде приватна работа, кривична одговорност мора да има

Министерот за правда Кренар Лога присуствуваше на Регионалната конференција ,, Обединети против насилство -Доста е” која се одржа во Приштина.
,,Насилството спрема жените и девојчињата е меѓу најзастапените повреди на човековите права. Тоа не смее да биде приватна работа и мора да има соодветен кривично правен одговор. Поради тоа неопходно е нашите активности dа вклучуваат: Криминализирање на делата на насилство према жените и девојчињата”,рече во своето обраќање министерот за правда Кренар Лога.
Како што вели тој на глобално ниво податоците покажуваат дека:
„Повеќе од пет жени или девојки се жртви на убиства секој час од некој во нивното семејство, Речиси секоја трета жена била изложена на физичко и/или сексуално насилство барем еднаш во животот. 86% од жените и девојките живеат во земји без правна заштита од родово базирано насилство. Со овогодинешната кампања инвестирај за превенција на насилството спрема жените и девојчињата се приклучуваме на 16 дена активизам против родово базираното насилство кој започна на 25 ноември на Меѓународниот ден за елиминација на насилството спрема жените а ќе заврши на 10 декември кога ќе го одбележиме денот на човековите права“, рече Лога и додаде:
„Република Северна Македонија беше меѓу првите земји која што во 2011 ја потпишаа Истанбулската Конвенција, која влезе во сила во Јули 2018 година Во фебруари 2023 година е донесен Законот за изменување и дополнување на Кривичниот Законик со кој се изврши хармонизирање со Истанбулската конвенција. За прв пат се криминализира родово базираното насилство врз жените кое означува насилство насочено против жената поради нејзина припадност на женскиот род. Се воведуваат нови кривични дела: Фемицид односно убиство на жена ило девојче до 18 години, Осакатување на женски полови органи, Демнење и Полово вознемирување“, вели Лога.
Според него за да се спречи виктимизација, жртвите на сите форми на насилство спрема жените и девојчињата потребно е да добијат навремена и сеопфатна заштита преку сервиси и услуги за подрршка и заштита.
„Унапредувањето на системот на пристап до правда за жртвите е приоритет во програмските активности на Министерството за правда. Во 2022 година се донесе Законот за исплата на паричен надоместок на жртви од кривични дела со насилство.
Истражувањето на ОБСЕ за насилството врз жените во Северна Македонија од 2019 година покажа, меѓу другото, дека 45% од жените доживеале психичко, физичко и/или сексуално насилство извршено од сегашен или поранешен интимен партнер.
Значителен дел од жените во Северна Македонија (37%) посочиja дека нивните пријатели би се согласиле дека жената треба да го слуша својот сопруг. Речиси половина сметаат дека семејното насилство е приватна работа и треба да се постапува во рамките на семејството, а 32% сметаат дека е важно мажот да и покаже на својата партнерка кој е шеф. Овие традиционални верувања претставуваат значителен предизвик за борба против насилството врз жените во Северна Македонија“, заврши Лога.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Левица со народен собир во Кичево

Во Кичево денеска се одржа народен собир на Левица, на кој беше промовирана советничката листа и програмата за локалните избори. На настанот присуствуваа носителот на листата за советници Бојан Мишковски, генералниот секретар на партијата и кандидатка за градоначалник на Струга, Јована Мојсоска, како и претседателот на Левица, Димитар Апасиев.
„Денес сме овде заедно со граѓаните на Кичево за да ја промовираме нашата кандидатура и она што Левица сака да го застапува во градот. Се надеваме дека ќе добиеме доволен број на гласови за да имаме два, три, па дури и пет советници кои ќе можат реално да влијаат врз локалните политики“, изјави носителот на листата Бојан Мишковски.
Тој истакна дека Левица има силна програма која се осврнува на клучните проблеми на Кичево. „Иако сме во 21 век, има места кои немаат канализација, вода за пиење, ниту асфалтирани патишта. Градот се соочува со огромно иселување – резултат на лошите политики и на локално и на централно ниво. Нашата цел е Кичево да заживее и да се создадат основни услови за достоинствен живот. Дополнително ќе вложиме во културата, спортот и секојдневниот живот на кичевчани“, порача Мишковски.
Тој додаде дека програмата на Левица е достапна во дигитална форма на веб-страницата на партијата и повика граѓаните активно да комуницираат со кандидатите. „Отворени сме секој понеделник и среда од 19 часот за сите критики, поплаки или идеи што може да се имплементираат во нашето делување“, нагласи Мишковски.
На новинарско прашање за ставот кон кандидатите за градоначалници, бидејќи Левица во Кичево настапува само со советничка листа, Мишковски одговори: „Левица предизборно не прави коалиции и не поддржува ниту еден кандидат. Ги повикуваме граѓаните да излезат на гласање и да си го искажат своето право, а за кого ќе гласаат е нивна одлука и нивна слобода“.
Генералниот секретар на Левица, Јована Мојсоска, во своето обраќање го претстави носителот на листата Бојан Мишковски како препознатлив активист меѓу кичевчани, кој беше еден од предводниците на протестите против депонијата – „рак рана на Кичево“.
Мојсоска истакна и поширок политички контекст на овие избори. „Ние како опозиција настапуваме во избирачки систем со тоталитарни услови, креирани од една авторитарна власт која не бира методи за да го угуши секој глас. Народот тоа го гледа секојдневно, преку цензурата на Левица, преку противзаконското следење на опозициски пратеници, сè со цел да се спаси рејтингот на една влада која имаше најлош старт во последните 35 години“, нагласи таа.
Таа додаде дека Левица, и покрај црната кампања наметната од власта, води позитивна изборна кампања. „Како парламентарна партија во изминатата година покажавме и докажавме дека имаме предлози и проекти што отстапуваат од сите други партии. Иако поради ароганцијата на власта не беа прифатени во Собранието, убедени сме дека граѓаните ќе го препознаат тоа“, рече Мојсоска.
„Она што ме радува е што Левица ќе има свои претставници во Советот на Општина Кичево. Како што во Собранието ја подигнавме транспарентноста и политичкото делување, истото ќе го направиме и во Советот на Кичево, конечно советниците ќе бидат вистинскиот глас на народот“, порача Мојсоска.
Македонија
(Видео) Кузеска: Владата на Мицкоски склучила договор за надзор со ИРД Инженеринг, истата фирма за која велеа дека е епски криминал

Со фирмата ИРД Инженеринг, за која велеа дека е епски криминал и сомнителна, владата на Христијан Мицкоски склучила Договор за надзор, рече денеска на прес-конференција портпаролката на СДСМ, Богданка Кузеска. Таа кажа дека договорот е склучен на 19 септември годинава, помеѓу македонски Желеници и ИРД Инженеринг и е вреден 55 илјади евра.
„Кога беа опозиција, Мицкоски, Николовски, Стојановски, цело ВМРО-ДПМНЕ држеше секојдневни прес конференции со обинувања за ИРД Инженеринг, фирмата надзор за автопатите од страна на Бехтел Енка. Ова за ВМРО-ДПМНЕ беше „епски криминал“ „лош надзор“ „сомнителна компанија“. Јавно на прес конференции целиот партиски врв на ВМРО-ДПМНЕ бараше реакции од Обвинителството, обвинуваа дека оваа фима, ИРД Инженеринг е „симбол на злоупотреби и партиски зделки“. Лично Мицкоски зборуваше за „нов голем епски криминал“ и бараше кривична одговорност. Највуваа раскинување на договорот, репреговарање, што ли уште не. Тоа беше ВМРО-ДПМНЕ во опозиција. Денеска гледаме дека се ова било лага до лага.
Наместо истрага – договор. Наместо одговорност – соработка. Ова е врв на политичко лицемерие, театар за јавноста во режија на Мицкоски и ДПМНЕ“, истакна Кузеска.
Таа побара Мицкоски јавно да излезе и да им се извини на граѓаните за, како што рече, сите негови лажни изјави, а Николовски да одговори зошто е склучен договор со ИРД Инженеринг.
Македонија
(Видео) Филипче: Резолуцијата ги јакне нашите позиции, таа е државен консензус за црвени линии

Денеска од Кисела Вода претседателот на СДСМ Венко Филипче одговарајќи на новинарско прашање порача дека СДСМ не ги урнало националните интереси на државата, ниту пак гледа дека нешто вратило ВМРО-ДПМНЕ. Но рече дека има документ со кој може да се потврдат црвените линии и заедничката позиција со национален консензус.
„Станува збор за потврдување на нашите црвени линии, потврдување на нашата заедничка позиција со национален консензус за првпат. Значи не станува збор за уривање туку за зајакнување. Ајде еднаш да сите заедно 120 пратеници како што тоа го прават сите држави вклучувајќи ја и Бугарија коишто имаат сите пратеници заеднички декларации во собранието бугарско за нивните национални интереси, ајде тоа да го направиме ние. Да конечно јасно и сите да потпишеме што е тоа што е наше национален интерес кои се нашите црвени илини и дека за тоа едноставно не преговараме.“, рече Филипче.
Тој истакна дека токму тоа стои во предлог резолуцијата која точно е утврдено дека за јазикот, идентитетот, културата, историјата ниту една влада повеќе нема да преговара.
Но повика за тоа да се зборува по изборите со цел овој период фокусот да биде ставен на локалните кампањи и презентација на програмите.