Македонија
Лукаревска до Љутков: Зошто не се почитува законот, се срамите ли што досега ништо не направивте за македонскиот јазик

Пратеничката на СДСМ, Сања Лукаревска на денешната собраниска седница посветена на пратенички прашања, упати две прашање до министерот за култура, Зоран Љутков, кои се однесуваа на македонскиот јазик. Односно, кога ќе почнат да ги исполнуваат обврските од Законот за македонски јазик, бидејќи не е исполнета ниту една обврска и дали не се срамат затоа што досега ништо немаат направено за македонскиот јазик.
„Јас сум горда, што припаѓам на партија и работев за Влада која што докажа како се сака, брани и почитува македонскиот јазик. А знаете зошто го велам ова? Затоа што токму во периодот на Владата на СДСМ, се спроведоа државнички политики за заштита, афирмација и унапредување на нашиот македонски јазик.
Она што денес го гледаме во однос на унапредувањето и афирмирањето на македонскиот јазик, е во склоп на сите останати политики на ДПМНЕ – ништо не е направено, не е спроведена ниту една политика-тотална незаинтересираност.
Дури ниту законските обврски не се исполнети, а тоа е недозволиво“, рече Лукаревска.
Девет месеци, според неа, ДПМНЕ не се сети и не покажа ни иницијатива за основање на Инспекторатот за употреба на македонски јазик, нема огласи за вработување на лектори.
„Па, оттука моите две прашања до министерот за култура Љутков се:
1. Кога ќе почнете да ги исполнувате обврските од Законот за македонски јазик?
2. Дали не се срамите за тоа што досега ништо немате направено за македонскиот јазик?“, праша Лукаревска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од денес пуштен во употреба магистралниот пат Охрид-Св.Наум, најави Владата

Македонија се гради. Денес официјално ќе биде пуштен во употреба магистралниот пат Охрид-Св.Наум во должина од 24,3 километри, најавуваат од Владата.
Вредноста на проектот за реконструкција на овој патен правец, како што е појаснето во официјалното соопштение изнесуваше 11,7 милиони евра.
„Ова значи дека по речиси 4 децении, не само охриѓани, туку голем број на граѓани ширум државата, но и туристи ќе можат да патуваат од Охрид до манастирскиот комплекс Св. Наум, но и до соседна Република Албанија, по нов патен правец.
Овие капитални проекти го подобруваат не само туристичкиот, туку и економскиот напредок и развој во Македонија.
Владата работи и создава дела за просперитет на Македонија“.
Македонија
Без вода дел од Кисела Вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска поради изведување на водоводен приклучок на водоводна мрежа со пречник од Ф-150 мм на улицата Христо Татарчев бр. 47, прекинато водоснабдување ќе имаат корисниците од истата улица и кулите – Расдник, oпштина Кисела Вода.
Водоснабдувањето ќе биде прекинато од 09:00 часот до завршување на работните активности.
Македонија
Сончево и топло, максималната температура ќе достигне до 34 степени

Времето денеска ќе биде сончево и топло со мала локална облачност. Ќе дува слаб до умерен, а наместа долж Повардарието повремено засилен ветер од северен правец. Минималната температура ќе биде во интервал од 9 до 19, а максималната ќе достигне од 27 до 34 степени.
Во Скопје, сончево и топло. Ќе дува умерен, во делови од котлината повремено засилен ветер од северен правец. Минималната температура ќе се спушти до 17, а максималната ќе достигне до 34 степени.
Времето во наредните денови
Во следните денови времето ќе биде стабилно, претежно сончево и топло. Ќе дува умерен, во сабота наместа долж Повардарието повремено засилен северен ветер.