Сотир Лукровски, кандидат за градоначалник на општина Карпош од редовите на ВМРО-ДПМНЕ, се обрати од денешниот настан одржан во Карпош, на којшто истакна дека следува историска победа на ВМРО-ДПМНЕ и нагласи дека ќе завршат старите практикии кои биле штетни за карпошани, потенцирајќи дека време е да се реализираат проекти кои се во интерес на граѓаните.

„Знаеме колку паркови се претворија во згради, знаеме колку непринципиелни договори и колку криминални ДУП-ови видовме“, вели Лукровски и додаде:

„Овие избори се референдумски за нас карпошани. На овие избори, карпошани мора да се решат дали ќе стават крај на досегашните практики и ќе избереме луѓе со визија, со нов концепт, а се за подобро на нашите деца“.

Лукровски ги повика граѓаните во вториот круг масовно да излезат на гласање и да го заокружат бројот 9 за историска победа и развој на општина Карпош.

Кандидатот за градоначаланик на општина Центар, Мирослав Лабудовиќ доби јавна и целосна поддршка од коалицискиот партнер ВМРО-ДПМНЕ за гласањето в недела во вториот круг на изборите.

Лабудовиќ денеска на неформална кафе-средба со премиерот Христијан Мицкоски и кандидатот за градоначалник на Скопје Орце Ѓорѓиевски во Капиштец, заеднички констатираа дека на Центар и на Скопје им е потребна промена – нов ветар во грб, со нова визија кои ќе ги променат работите од темел и ќе ја водат општината и градот напред.

Премиерот Мицкоски ги повика членовите и симпатизерите на ВМРО-ДПМНЕ, како и сите граѓани на Центар в недела да им дадат максимална поддршка на Мирослав Лабудовиќ и Орце Ѓорѓиевски – кои треба да ги донесат неопходните промени. А, тоа е пред се стоп на бруталната бетонизација во Центар која е отидена предалеку и на штета на сите жители во централната градска општина.

Мицкоски потенцираше дека мора да се подвлече линија која ќе прави јасна разлика меѓу криминалот што сега се случува и домаќинското и одговорно однесување и работење што ќе донесат со себе Ѓорѓиевски и Лабудовиќ по стапувањето на функциите.

Мирослав Лабудовиќ пак на премиерот Мицкоски и на Орце Ѓорѓиевски им посочил дека во првиот круг над 2/3 од излезените гласачи сакале промена и верува дека на крајот таа ќе се случи, Едноставно речено, 68 отсто од гласовите во првиот круг во Центар што не го поддржаа актуелниот градоначалник, се потенцијал кој би бил пресуден за победа во Центар, но и за уште поубедлив резултат во Скопје.

Вицепремиерот и министер за транспорт и врски, Александар Николоски, изјави дека владините политики за привлекување нови авиолинии на скопскиот и охридскиот аеродром веќе даваат резултати, најавувајќи 11 нови дестинации што стартуваат со зимскиот распоред на летање.

„Со зимскиот распоред на летање, веќе од утре – 27 октомври, од Охрид ќе се лета кон Базел, исклучително важна дестинација која го отвора Охрид не само за туристите од Швајцарија, туку и за оние од Франција и Германија“, изјави Николоски.

Тој додаде дека од скопскиот аеродром се воведуваат линии кон Стокхолм (главниот аеродром), Штутгарт, Бари и Ларнака (Кипар), а од 3 ноември ќе започнат летови и кон Женева и Мадрид, додека од 15 декември ќе следуваат Прага и Келн.

„Ако на ова го додадеме и тоа дека од април ќе се лета кон Будимпешта и Неапол, тогаш добиваме целосна слика за напорите на Владата да ја направи Македонија достапна и поврзана со остатокот од Европа“, рече Николоски.

Тој потенцираше дека субвенциите се насочени кон патници кои пристигнуваат во земјата, со цел да се поттикне туризмот и економскиот развој, нагласувајќи дека ваков раст на авиосообраќајот не е виден со децении.