Денеска на редовна седница на Владата практично отпочнавме со постапката за објавување на вториот повик преку Министерството за локална самоуправа со којшто ќе се изрази интерес на единиците на локална самоуправа за финансирање на капитални проекти од интерес на граѓаните, истакна премиерот Христијан Мицкоски.

Станува збор, како што појасни, за втор јавен повик за искористување на средства од оние 15 милијарди денари кои Владата, како што дополни, ги стави на располагање на општините.

„До 15 милијарди денари ќе биде вредноста на овој втор повик. Но, тоа не подразбира дека сите овие средства ќе бидат потрошени во тековната фискална година. Ќе повторам за да нема забуни во јавноста, можно е некои проекти да влезат и во три годишни буџети, и во 2025-та и во 2026-та и во 2027-та. Некои проекти да бидат само во 2025-та, некои да бидат и во 2025 и во 2026. Но, вкупниот волумен на средства со кои што ќе се финансираат проектите од овој втор повик, за којшто денеска отпочнавме процедура на редовна владина седница, е до 15 милијарди денари“, нагласи Мицкоски.

За таа цел, како што информира, се задолжуваат Министерството за транспорт, Министерството за животна средина и просторно планирање, Министерството за образование и наука, Министерството за социјална политика, демографија и млади, Министерството за спорт, Министерството за култура и туризам, да ги утврдат критериумите со коишто ќе се финансираат овие проекти преку капитални дотации.

Владата според премиерот, го задолжи или ќе го задолжи Министерството за локална самоуправа, откако целиот процес ќе биде издефиниран, да го објави јавниот повик за изразување на интерес од страна на единиците на локална самоуправа за финансирање на проектите коишто се дел од овој втор повик.

Ова според него се значајни средства кои се ставаат на располагање на општините за изградба на капитални проекти, како што се училишта, градинки, паркови, водоводи и канализации, со кои се решаваат децениски проблеми на граѓаните.

„Се работи за историски најголема инвестиција на централната власт во единиците на локалната самоуправа, општините преку кои директно се влијае на подобар живот и повисок стандард.

Ова е втор јавен повик, а минатиот повик 78 општини добија 288 проекти со вкупна вредност од 4,5 милијарди денари или повеќе од 73 милиони евра. И дополнително преку Министерството за транспорт, отприлика околу 800 милиони денари коишто се средства коишто со посебна програма беа доделени за финансирање на проекти во општините“, потсети Мицкоски.

Како што оцени, вака директно се помага на граѓаните и општините.

„И ова се мерки коишто се однесуваат само за граѓаните. Само вака, со работа и посветеност го исполнуваме ветеното и Македонија станува повторно на народот“, додаде Мицкоски.

Разрешувањето на в.д. директорката на Клиниката „Козле“ е директен резултат на силниот притисок од јавноста, граѓаните, медиумите и политичкиот притисок на СДСМ, велат од опозициската партија.

„Ова е доказ дека неспособноста, мобингот и злоупотребите на Клиниката „Козле“ за кои алармираше СДСМ се целосно потврдени иако власта со месеци ја штитеше.

На ДПМНЕ и на Таравари треба да им биде јасно дека нема да поминат незабележано и дека одговорност мора да има за хаосот во здравството.

Ја охрабруваме јавноста да остане будна и гласна, бидејќи секој компромис со здравствениот систем директно ги загрозува граѓаните“.

Очекуваат новата директорката на Клиниката „Козле“ веднаш да почне да ја санира штетата од погрешното менаџирање на сега веќе разрешената и да ја врати на работа докторката која после 27 години беше насилно избркана на улица.

СДСМ е на страна на граѓаните и на професионалците во здравството. СДСМ ќе продолжи да се бори против партизацијата и несоодветните кадровски решенија во здравството, затоа што здравјето на граѓаните е над партиските интереси на ДПМНЕ и нивните коалициски партнери, додаваат од партијата на Филипче.

Поради сообраќајна незгода, регионалниот пат од Каласлари до населбата Градско е затворен за сообраќај од 14 часот, односно сообраќајот се пренасочува по автопатот Велес – Градско.

АМСМ потсетува дека од 15.11.2024 година почна законската обврска за задолжително поседување зимска опрема во возилата, без оглед на моментната временска состојба. Оваа обврска ќе трае до 15.3.2025 година.

Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.

АМСМ препорачува приспособена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде што има можност од појава на одрони. Ова особено се однесува за делниците Катланово – Велес, Маврово – Дебар – Струга, Виница – Берово и Кочани – Делчево.