Македонија
Македонските граѓани кои се во Љубљана сега се во рацете на стручни лекари: Муцунски ги посети хоспитализираните во Словенија

Министерот за надворешни работи и надворешна трговија, Тимчо Муцунски, попладнево во Љубљана ги посети македонските граѓани кои се хоспитализирани во Словенија. Притоа оствари кратки одвоени средби со министерката за надворешни работи на Словенија, Тања Фајон, министерката за здравство, Валентина Преволник-Рупел, како и со медицинскиот персонал кој се грижи за нашите пациенти.
Муцунски изрази искрена благодарност за високото ниво на солидарност што Словенија го покажува во овие тешки моменти нагласувајќи дека тоа е уште еден доказ за длабоката почит и за пријателството меѓу двете земји и нивните народи.
„Би сакал уште еднаш, во име на македонскиот народ, Владата и целата нација, да се заблагодарам за исклучителната солидарност што ја покажавте – тоа зборува за високото ниво на меѓусебно почитување што го имаме меѓу себе. Македонските граѓани кои се во Љубљана сега се во рацете на стручни лекари, медицински експерти и посветени медицински сестри“, изјави министерот Муцунски.
За време на посетата тој имаше можност лично да добие информации од лекарскиот тим за состојбата на пациентите, како и да се запознае со стручниот кадар, кој има клучна улога во организирањето и реализацијата на медицинскиот транспорт.
Муцунски нагласи дека македонската амбасада во Словенија останува целосно посветена на поддршката на пациентите и нивните семејства, а кризниот штаб во Скопје е во постојана координација со сите вклучени институции во процесот на транспорт, прием и лекување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Петрушевски: Разузнавачкиот систем бил ставен во функција против Мицкоски

Целиот разузнавачки систем бил ставен во функција против претседателот на ВМРО-ДПМНЕ, Христијан Мицкоски, со цел задржување на СДС на власт, изјави пратеникот од ВМРО-ДПМНЕ, Бране Петрушевски.
„5 години претседателот Мицкоски бил таргет на АНБ и АР, бил следен и прислушкуван, и секој негов чекор бил документиран. СДС преку АНБ и АР воделе политичка битка. Службите за безбедност и разузнавање биле целосно злоупотребени,“ рече тој.
Петрушевски додаде дека „сега кога се фатени на дело, СДС наместо да се извинат, продолжуваат да сеат магла“ и дека „цел систем на СДС е демаскиран. Злоупотребени се АНБ и АР, но и ЈО, кое преку Љупчо Коцевски ги следело мерките.“
Тој истакна дека недовербата на народот во судството и обвинителството е резултат на оваа злоупотреба: „Не е чудо што народот има 2% доверба во судството и обвинителството, кога токму тие институции биле дел од системот за следење и прислушкување на политички противници на СДС наместо да работат во служба на граѓаните.“
Петрушевски нагласи дека за прислушкувањето и следењето мора да има одговорност и дека „овој случај не смее да помине неказнето, за никогаш повеќе да не се повтори.“
Македонија
Карпошани ќе одложуваат текстил во специјализирани екоконтеjнери

Друштвото за управување со отпад од текстил ЕКО-ТЕКС ГРУП ДОО Скопје, денеска во основното училиште „Владо Тасевски“, во присуство на градоначалникот на Општина Карпош Стевчо Јакимовски го промовираше еколошкиот контејнер за собирање, селектирање, рециклирање преработка и отстранување на отпаден текстил на територијата на Општината.
Имено, ова овластено друштво за собирање и рециклирање на текстилен отпад, ќе постави ваков тип на контејнери во сите десет основни и сите четири градинки на територијата на локалната самоуправа. Првиот човек на Општината, Стевчо Јакимовски истакна дека на овој начин, сите граѓани, ќе можат да ги одложуваат своите стари и непотребни алишта во овие наменски и специјализирани еколошки контејнери, наместо да ги оставаат во класичните контејнери кои се наменети за селекција на ѓубрето кое се создава во домовите на граѓаните.
-Упатувам апел до сите Карпошани, непотребната облека, и сите текстилни материјали, кои им зафаќаат простор во домовите, а сакаат да се ослободат од нив, да ги одложуваат во овие специфични и наменски контејнери, за потоа истите преку рециклирање да имаат упоребна вредност. Од друга страна, неодамна во една акција за чистење на т.н дива депонија во населеното место Злокуќани, бевме сведоци, дека огромен дел од насобраниот шут и смет, беше токму текстилна облека од несовесни граѓани кои ја фрлиле на јавна површина. Затоа сега, кога веќе преку соработка со ова Друштво, обезбедуваме специјализирани еколошки контејнери, граѓаните имаат можност токму во нив да ги одложуваат старите и износени парчиња облека или друг вид на текстилен материјал, нагласи Јакимовски.
Општина Карпош и во иднина ќе работи на изнаоѓање на креативни решенија со кои ќе се унапреди соработката помеѓу локалната самоуправа и граѓаните, во подигнување на свеста за селекција и рециклирање на разни видови на отпад, се со цел хигиената и чистотата на територијата на Општината да биде издигната на завидно ниво.
Македонија
Пријавени осум случаи на непотребни операции на срце, ќе ги оценуваат и експерти од Словенија, Италија и Австрија

Јавна здравствена установа пријавила осум случи за извршени непотребни кардиохируршки интервенции во интерната комисија што ја формира Министерството за здравство по скандалозните тврдења на кардиологот Сашко Кедев дека во земјата за пари се прават операции на срце и кај пациенти што немаат медицинска потреба. Интерната комисија утре ќе се состане и овие осум случаи ќе бидат првите што ќе ги разгледа, а меѓународната комисија, пак, ќе почне со работа штом заврши потпишувањето на договорите за ангажирање на експертите.
„Во интерната комисија се доставени медицински досиеја за осум случаи. Комисија ќе ги обработи сите детаљно со цел да се утврди вистината врз основа на медицинските факти. Комисијата утре ќе се состане и овие досиеја ќе бидат првите случаи по кои ќе биде постапено. Како Министерство за здравство веднаш направивме интерна комисија составена од медицински експерти, правници и економисти. Нејзината задача е да ги утврди фактите и да постапува врз основа на медицинските докази според највисоките меѓународни стандарди и прецизни методолошки правила во кои се дефинирани. За членовите на меѓународната комисија постапката е при крај, треба да се заврши административниот дел – потпишувањето на договорите, за да може јавно да ги кажеме имињата. Се работи за светки признати имиња од Словенија, од Италија и од Австрија“, рече денес министерот за здравство Азир Алиу и нагласи дека побарал и вонреден стручен надзор од Лекарската комора.
Министерот Алиу, работењето на комисиите, кое сега е фокусирано на кардиолошките и на кардиоваскуларните интервенции, го нарече „терапија за здравствениот систем“ и најави дека ќе се прошири на сите сегменти и дека никој, ниту од јавното ниту од приватно здравство, нема да биде поштеден ниту, пак, неправедно стигматизиран.
Освен осумте случаи за непотребни операции, пријавени не од пациенти, туку од јавна здравствена институција, Министерството за здравство на сите расположливи алатки не добило друга пријава или претставка. Минатата недела здравствените власти повикаа сите што се сомневаат да ги пријават случаите, дури и ако не ја чуваат документација оти таа треба да стои во архивите на здравствените институции.