Македонија
Македонските граѓани кои се во Љубљана сега се во рацете на стручни лекари: Муцунски ги посети хоспитализираните во Словенија

Министерот за надворешни работи и надворешна трговија, Тимчо Муцунски, попладнево во Љубљана ги посети македонските граѓани кои се хоспитализирани во Словенија. Притоа оствари кратки одвоени средби со министерката за надворешни работи на Словенија, Тања Фајон, министерката за здравство, Валентина Преволник-Рупел, како и со медицинскиот персонал кој се грижи за нашите пациенти.
Муцунски изрази искрена благодарност за високото ниво на солидарност што Словенија го покажува во овие тешки моменти нагласувајќи дека тоа е уште еден доказ за длабоката почит и за пријателството меѓу двете земји и нивните народи.
„Би сакал уште еднаш, во име на македонскиот народ, Владата и целата нација, да се заблагодарам за исклучителната солидарност што ја покажавте – тоа зборува за високото ниво на меѓусебно почитување што го имаме меѓу себе. Македонските граѓани кои се во Љубљана сега се во рацете на стручни лекари, медицински експерти и посветени медицински сестри“, изјави министерот Муцунски.
За време на посетата тој имаше можност лично да добие информации од лекарскиот тим за состојбата на пациентите, како и да се запознае со стручниот кадар, кој има клучна улога во организирањето и реализацијата на медицинскиот транспорт.
Муцунски нагласи дека македонската амбасада во Словенија останува целосно посветена на поддршката на пациентите и нивните семејства, а кризниот штаб во Скопје е во постојана координација со сите вклучени институции во процесот на транспорт, прием и лекување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска Давкова до медицинските тимови од Израел и Чешка: Од срце благодарам за херојскиот ангажман во спасувањето на животите на настраданите во апокалиптичниот пожар

Претседателката на Македонија, Гордана Сиљановска Давкова извести дека ги примила медицинските тимови од Израел и Чешка, во придружба на нивните амбасадори, пред заминувањето од државата.
„Тие, заедно со веќе заминатиот српски медицински тим од ВМА, извршија стотина операции во соработка со македонските лекари.
Се работи за лекари со врвно знаење, професионалност, хуманост, пожртвуваност и етика. Убаво е да се чујат комплименти за нашите лекари, како и изразена спремност за нивна едукација“, кажа Сиљановска Давкова.
„По она што го чув од нив, не можев да најдам соодветни зборови за да им изразам должна благодарност. Од срце им благодарам за херојскиот ангажман во спасувањето на животите на настраданите во апокалиптичниот пожар. Никогаш нема да го заборавам нивниот несебичен лекарски потфат!“, додаде Сиљановска Давкова.
Македонија
Тошковски: Целосна мобилизација на институциите, МВР работи со сите свои капацитети

Министерот за внатрешни работи Панче Тошковски во денешната изјава за медиумите повика на целосна мобилизација на сите институции и потенцира дека Министерството за внатрешни работи уште веднаш ги активираше сите свои капацитети.
„Од обезбедување на местото на трагедијата, евакуација и извлекување на повредените, регулирање на сообраќајот, па сѐ до логистичка поддршка за нивниот транспорт и лекување, како во земјата така и во странство. Над 250 лица беа брзо и безбедно транспортирани до болниците низ државата, а над 100 лица до граничните премини. Веднаш беа изработени итни патни документи за придружниците на повредените. Во исто време, полициските структури останаа целосно посветени на истражните дејствија и расветлување на случајот, дејствувајќи со емпатија, дисциплина и професионалност“, потенцираше министерот Тошковски.
Министерот Тошковски извести дека во итна постапка биле изработени и патни исправи за придружниците на повредените во странство, а полициските службеници остануваат целосно посветени на истражните дејствија и расветлување на случајот, дејствувајќи со емпатија, дисциплина и професионалност.
Македонија
Од 25 до 27 март ќе се одржи симулациска вежба за болеста чума кај мали преживари

Агенцијата за храна и ветеринарство (АХВ) во соработка со Организацијата за храна и земјоделство на Организацијата на Обединети нации (FAO), од 25 до 27 март, ќе спроведе симулациска вежба за болеста чума кај мали преживари. Цел на вежбата е да се утврдат добрите и слабите страни на одговор при евентуална појава на болеста, која е предмет на планови за итни мерки на АХВ.
На вежбата ќе присуствуваат претставници од АХВ, од Ветеринарната комора на РСМ, од Факултетот за ветеринарна медицина од Скопје, експерти од Европската унија како и претставници од Сојузот на здруженија на одгледувачи на овци „Модерен овчар”.
Првиот дел од симулацискта вежба (теоретско –практичен) ќе се спроведе на 25.03.2025 и 27.03.2025 (вторник и четврток) на Факултетот за земјоделски науки и храна, додека вториот дел (теренски) ќе се реализира на 26.03.2025 (среда) во село Брњарци, општина Гази Баба. По спроведување на вежбата ќе се направи евалуација на подготвеноста на Агенцијата за храна и ветеринарство за одговор при појава на болеста, а ќе се реализираат активности за подобра подготвеност на институциите и засегнатите страни при појава на особено опасни заразни болести како што е болеста чума кај мали преживари.
АХВ ја известува јавноста дека активностите кои ќе бидат преземени се исклучиво во рамки на предвидените за реализација на симулациската вежба, односно, не се станува збор за реална ситуација и појава на жариште на болеста чума кај малите преживари.