Македонија
Македонскиот концепт: Бујар Османи свесно ја внесува Македонија во српско-косовскиот судир

Партијата Македонски концепт најостро ги осудува, како што велат, низата обиди на т.н. министер за надворешни работи на Македонија Бујар Османи, со кои директно и свесно ја внесува Македонија во српско – косовскиот судир, што е дел од руското сценарио за дестабилизација на Балкан и јужното крило на НАТО.
„Бујар Османи повеќе се однесува како министер на Косово или на Русија од колку министер на Македонија, земја членка на НАТО. Со последната изјава дека Србија треба нешто да докажува на Косово, во спротивно Македонија треба да преземе непријателски дејства кон своите соседи, тој директно придонесува кон дестабилизација на нашиот регион, особено го помага Косово во очајните обиди за извоз на тероризам и етнички шовинизам кон сите соседи“, се истакнува во реакцијата на партијата.
Ова особено од аспект, како што велат, што истиот човек претседава со ОБСЕ, но не во име на ДУИ или на Косово или УЧК, туку во име на Македонија и сите нас македонските граѓани, што дава дополнителна тежина на неговата злоупотреба на службена положба и овластувања, што е кривично дело и за истото треба да одговара пред правосудниот систем на Македонија, не на Косово.
„Проектот ‘Отворен Балкан’ за нашата партија беше промашена инвестиција уште на почетокот на истиот и навреме реагиравме во таа насока. Но вмешување на Македонија во странски судири, особено помеѓу нашите соседи, е директно работење против мирот и стабилноста и против македонските национални интереси“, велат од Македонски концепт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Здружението на судии: Нема да ја коментираме неправосилната пресуда за „Онкологија“

Здружението на судии на Република Северна Македонија соопшти дека нема да даде коментар за неправосилната пресуда во предметот познат како „Онкологија“, бидејќи, како што наведуваат, основно правно начело е да не се коментираат судски одлуки кои не се правосилни, со цел да не се влијае врз понатамошната постапка и одлучување на повисок степен.
Во реакцијата, Здружението додава дека пресудата е донесена врз основа на признание на вина, но судството ќе ги почитува правните стандарди и нема да се впушта во понатамошни коментари.
Во однос на прашањето за платите, од Здружението нагласуваат дека и по зголемувањето од 78 проценти, платите на најголем број судии во основните судови изнесуваат околу 86.000 денари, а примањата на судските службеници се под просечната плата во државата.
„Ваквите плати на судиите и судските службеници се апсолутно најниски во регионот и пошироко,“ се наведува во реакцијата.
Македонија
Кирков алармира: Туберкулоза во Зоолошката градина во Скопје

Советникот во Советот на Град Скопје од ВМРО-ДПМНЕ, Стефан Кирков, преку објава на социјалните мрежи предупреди на сериозна состојба во Зоолошката градина во Скопје, наведувајќи дека причина за смртта на неколку животни е туберкулоза.
Кирков посочи дека во изминатиот период починале ламите и младо мајмунче од видот гибон, кај кои е потврдена туберкулоза, а последно и европскиот бизон, за кој денеска, според него, биле добиени официјални резултати дека исто така бил болен од оваа болест.
„Зоолошката градина е контаминирано подрачје, цели реони се зафатени, вработените се оставени без соодветна заштита, а секојдневно има стотици посетители кои поминуваат низ живеалиштата каде починаа животни“, пишува Кирков.
Тој додава дека резултатите се добиени од Ветеринарниот факултет, Ветеринарниот институт и Агенцијата за храна и ветерина. Кирков бара итен инспекциски надзор, тестирање на сите вработени и животни, како и можност за времено затворање на установата.
Советникот најави и поднесување кривична пријава против менаџментот на градината, нагласувајќи дека во последните три години починале повеќе од 50 животни, без да има преземена одговорност.
Македонија
Марјан Димитриев кандидат за градоначалник на општина Аеродром од Левицата

Марјан Димитриев е кандидат за градоначалник на Општина Аеродром од Левица. Носител на советничката листа е Дејан Ристовски.
„Со ова официјално влегуваме во изборната трка со јасна визија: Аеродром да стане место каде што интересот на граѓаните ќе биде пред личните и партиските привилегии. Нашиот тим, составен од луѓе со интегритет и волја за промени, е подготвен да работи посветено за: подобра урбана средина; транспарентна работа на општината; вистинска грижа за жителите. Веруваме дека Аеродром заслужува нов почеток, без корупција, без партиски игри и без запоставување на реалните проблеми. Со поддршката на граѓаните, заедно можеме да ја донесеме таа промена“, соопштија од партијата.