Поднесената информација „Енормно загадување на амбиенталниот воздух во Република Македонија“ се однесува на 2015 и 2016 година, а не за 2018 година како што беше презентирано, рече заменик-министерот за животна средина и просторно планирање, Јани Макрадули, на денешната јавна расправа на Комисијата за транспорт, врски и екологија во Собранието на Република Македонија, иницирана од пратениците на ВМРО-ДПМНЕ.

Макрадули ја оцени таквата информација како прилично неточна, паушална и несериозна, која беше поднесена од пратениците на ВМРО-ДПМНЕ.

Тој потенцира дека проблемот со загадувањето на воздухот треба да се решава заеднички, со вклучување на сите поединечно, особено децата, со цел да се развие општествената свест за заштита на животната средина.

„Податоците за квалитетот на воздухот 2015, 2016, 2017 и 2018 година – број на денови во среднодневни концентрации над гранични вредности – се помали во сите 18 мерни станици. Во сите. Ги имате и на страницата на Министерството. Центар од 63 на 27, Гази Баба од 56 на 49, Карпош од 54 на 31 итн. Значи, сите се помали. А дека е загадено, загадено е. И дека треба да бараме решенија – треба. Мораме да бараме решенија. Но, ова е вистината. И последните 11 дена кога нема загадување, да ширите дезинформации, да повикувате децата да не одат на училиште, е исто злонамерно, тенденциозно и шири паника. Сакам да ѝ укажам на јавноста. Ако не е загадено во денот, не ставајте му маска на детето. Тоа повеќе му штети отколку што му користи“, информира заменик-министерот Макрадули потенцирајќи дека со ширење дезинформации се создава непотребна паника кај луѓето дека загаденоста е голема.

Особено е важно, рече Макрадули, да им се објасни на граѓаните дека горењето дрва, заедно со пластика и други додатоци, како и користењето на јагленот како огрев, се штетни и истакна дека е потребно вклучување на граѓанските организации за организирање кампањи за заедничко дејствување во поглед на законски промени за забрана на греење на јаглен.

Макрадули нагласи дека Владата на Република Македонија првпат за оваа намена обезбеди дополнителни 1,5 милион евра, исклучиво за намалување на аерозагадувањето, и потенцира дека лично премиерот Заев е заслужен за јасно изразената политичка волја за спроведувањето на мерките преку програма за намалување на аерозагадувањето, чијаш имплементација станува стратешки приоритет на Владата за 2019 година.

Тој додаде дека е почнато со замена на типот на загревање во објектите што се загреваат на мазут и нафта со еколошки извор на загревање.

„Овој план ќе почне со градинките, основните училишта, здравствените установи, а првиот пример набргу ќе биде студентскиот дом ‘Кузман Јосифовски – Питу’, кој се наоѓа во центарот на градот, а кој некој од некакви си причини го префрлил на нафта, да ги загадува студентите внатре, да ја загадува околината. Тоа ќе го направиме и ќе го префрлиме на еколошки извор на загревање“.

Тој додаде дека на 800 семејства во Скопје, 150 во Битола, 150 во Тетово, со доделување инвертори како замена на печките на дрва, ќе им се помогне да го променат начинот на греење, а кои ќе бидат корисни и во лето за ладење, како и дека ќе се набават 1.700 садници за градинките, кои, како што рече, ќе чинат колку 18 палми во Скопје купени во претходните години.

„Двегодишниот план опфаќа враќање на 10 илјади граѓани – приклучоци на централното парно греење, 20.000 печки да се заменат со еколошки извори на загревање, за 10 илјади семејства – индивидуални објекти, да ја промениме енергетската ефикасност, 20 илјади инвертори ќе се набават за домаќинствата што користат нееколошки извори на загревање и 3 илјади објекти што ќе бидат дел од гасната инфраструктура или гасификацијата на државата“, истакна Макрадули.

Макрадули рече дека борбата за здрава животна средина не трпи популизам алудирајќи на постојаните лажни информации за зголемена загаденост и изрази уверување дека ќе биде постојан во неговата борба на овој план за што е убеден дека ќе донесе конкретни резултати.