Македонската академија на науките и уметностите (МАНУ) претпочита нејзиното ново име да гласи – Академија на науките и уметностите на Република Северна Македонија – МАНУ. Ваквото мислење било усвоено на денешната консултативна седница на која биле разгледани предлозите на Владата за преименување во: Академија на науките и уметностите на Република Северна Македонија – МАНУ или Национална академија на науките и уметностите на Република Северна Македонија – МАНУ.

„По обемна и конструктивна дискусија, се заклучи да се упати мислење до Владата на Република Северна Македонија, според кое, мнозинството членови на Академијата го претпочитаат името Академија на науките и уметностите на Република Северна Македонија – МАНУ. Академијата исто така истакнува дека таа не донесува одлука за преименување на Академијата, односно дека одлуката ќе ја донесе Владата на Република Северна Македонија почитувајќи го утврдениот предлог на мнозинството членови на Академијата“, се наведува во соопштението.

Според нив, кратенката МАНУ, како составен дел на новото име, има суштинско значење бидејќи, од една страна, е поврзано со идентитетските прашања, а од друга, со ова решение отпаѓа потребата од промена на веб-адресата на Академијата.

Академијата истакнува дека уште пред шест месеци кога се одржала научна расправа во МАНУ за спогодбата од Преспа и кога станало јасно дека ќе мора да го промени името, раководството на Академијата инсистирало при донесувањето на одлуката да се води сметка за тоа дека Академијата е препознатлива по придавската референца МАНУ и оти на веб-страницата стои придавката manu, односно masa на англиски јазик. Понатаму, се додава дека основната дејност на Академијата се остварува во автономните сфери на општеството во која државата, според Уставот, има ограничени компетенции и станува збор за институција со поширок меѓународен углед.

Од Академијата велат дека ваквата аргументација била во целост прифатена од Владата на Република Северна Македонија, а наишла и на разбирање кај грчката страна.