Македонија
Манчевски: Неопходно е јакнење на свест за сајбер-безбедност од најрана возраст

Министерот за информатичко општество и администрација, Дамјан Манчевски, присуствуваше на предавање за сајбер-безбедност во ООУ „Петар Поп Арсов“ во општина Карпош.
Во рамките на активностите на Mинистерството за информатичко општество и администрација за јакнење на капацитети и подигнување на свеста во областа на сајбер-безбедноста, денеска беше организирано предавање за сајбер-безбедност, на кое присуствуваа министерот Дамјан Манчевски и градоначалникот на општина Карпош, Стефан Богоев.
„Кога зборуваме за сајбер-безбедност луѓето мислат на безбедноста на компјутерските системи, но тоа не е така, сајбер-безбедноста е многу повеќе и во денешното дигитално време посебно децата кои цело време се на интернет, се изложени на сајбер-булинг, одредени напади кои доаѓаат од сајбер-просторот“, истакна министерот Манчевски.
Во светски рамки податоците се дека 43% од децата биле изложени на сајбер-булинг и веројатно тоа се случува и со децата кај нас.
„МИОА започна пилот-проект за превенција преку едукација и, како што кажа и градоначалникот, заедно со учениците, наставниците и родителите, сакаме да ја кренеме свеста кај сите за сето она што може да се случи преку сајбер-булинг. Насилството во сајбер-просторот, за жал, многу често може да се пренесе и во реалниот простор и децата да бидат физички загрозени“, истакна министерот Манчевски, додавајќи дека дека денешното предавање е во насока да се дознае на кој начин може дополнително да се заштитат децата.
Предавачи на денешниот настан беа началникот на отсек за истраги на интернет и електронско плаќање во Секторот за компјутерски криминал и дигитална форензика во МВР, како и Матеј Плавевски, кој е дел од победничкиот тим на тинејџери од Северна Македонија кои добија глобално признание за иновативно решение за спречување на насилството.
Предавањето е трет ваков настан во рамки на пилот-проектот и се планира активноста да се прошири и во останатите училишта. Следната недела ќе стартуваат активности и за Европската недела на кодирање и ќе се зборува на овие теми и во основните и во средните училишта.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Регионална иницијатива за превенција од пожари на Западен Балкан

Во услови на зголемени ризици од пожари, започна регионална иницијатива за подигање на свеста за управување со пожари на ниво на предел во земјите од Западен Балкан. Иницијативата, поддржана од Министерството за земјоделство, шумарство и водостопанство, има за цел да го поттикне интегрираното и одржливо управување со екосистемите, наместо традиционалниот пристап што се фокусира исклучиво на гаснење.
Пожарите оставија сериозни последици врз природата, економијата и животот на граѓаните, а над 90% од нив се предизвикани од човечка невнимателност — факт што укажува дека превенцијата е клучна.
Преку интерсекторска соработка, јакнење на локалните капацитети и активности на терен, иницијативата тежнее да создаде предели и заедници отпорни на пожари.
„Природата е наша заедничка одговорност. Со здружени напори можеме да постигнеме нула пожари предизвикани од човечки фактор,“ велат од Министерството.
Македонија
Гром го предизвикал пожарот во велешката фабрика, велат од „Мирана“

Удар од гром е причината за пожарот што синоќа избувна во дел од производствениот погон на „Биокосмос“ во Велес, информираат од компанијата „Мирана“ преку официјално соопштение.
Од ударот се оштетени дел од просториите на „Биокосмос“ и, како што посочуваат од таму, тие привремено ќе бидат надвор од употреба додека не се санира штетата.
Фабриката „Мирана“, која се наоѓа во истиот индустриски комплекс, не била зафатена од пожарот и производствениот процес таму продолжува непречено.
Во пожарот нема повредени лица.
Центарот за управување со кризи, претходно денес информира дека пожарот бил целосно локализиран рано утрово, околу 4 часот. Според информациите на ЦУК, огнот зафатил магацински простор со фрижидери и канцеларии со документација, а на неколку места сè уште се забележува слабо чадење.
Иако пожарот е ставен под контрола, службите сè уште се на терен за да спречат повторно разгорување, со оглед дека на одредени локации сè уште се јавуваат чадења.
Македонија
(Видео) Едниот качен на хауба, друг вози без дозвола – поднесени пријави за скопјаните кои дивееа низ улиците

Министерството за внатрешни работи поднесе пријави против двајца млади скопјани, откако на социјалните мрежи се појави видео од опасна и непромислена „возачка забава“ по скопските булевари.
Во видеото се гледа како едно лице стои на хаубата од автомобил во движење, а возачот, покрај тоа што управува без дозвола, вози и без регистарски таблици. Станува збор за 20-годишниот С.З. и 19-годишниот Р.Ѓ., двајцата од Скопје. Против нив се покренати поднесоци по неколку основи, вклучително и управување без возачка дозвола, загрозување на сопствената и туѓата безбедност, како и дозволување управување на лице без дозвола.
Од МВР информираат дека лицата биле веднаш повикани на службен разговор, а полицијата презема и дополнителни активности за целосно расчистување на случајот.