Македонија
Маричиќ-Албарез: Северна Македонија го засилува европското темпо за реформи и фондови, уставните измени клучни за тоа
Вицепремиерот задолжен за европски прашања Бојан Маричиќ денеска оствари средба со министерот за надворешни работи, ЕУ и соработка на Кралството Шпанија, Хозе Мануел Албарез Буено, кој е во еднодневна официјална посета на Северна Македонија.
Маричиќ на почетокот за заблагодари за поддршката што Шпанија ја дава на евроинтеграцискиот процес на Северна Македонија и укажа дека меѓусебната поддршка, како и добрите билатерални односи, го потврдуваат искреното пријателство меѓу Северна Македонија и Шпанија, кое следната година слави 30 години од воспоставувањето дипломатски односи меѓу двете држави.
– Поддршката од Шпанија за евроинтегративниот процес и реформите продолжува, за нас е клучно на време да ги завршиме нашите обврски. Шпанското претседателство со Европската Унија ќе одигра огромна улога за нашиот напредок во следната фаза на преговорите и нашата позиција во пакетот за следното проширување на ЕУ, рече Маричиќ на состанокот.
Министерот за надворешни работи, ЕУ и соработка на Кралството Шпанија, Хозе Мануел Албарез Буено потврди дека Северна Македонија може да смета на поддршката за забрзување на преговорите со ЕУ и дека не е случајна неговата посета на регионот, во пресрет на шпанското претседателство со Унијата.
Маричиќ го брифираше шпанскиот министер за текот на скрининг процесот, а во таа насока Албарез посочи дека Северна Македонија има напредок и дека го засилува европското темпо за повеќе фондови и брзи реформи, но дека уставните измени остануваат клучни за брзата интеграција на државата во ЕУ.
Соговорниците изразија верување дека скринингот ќе помине во најдобар ред и во планираниот временски рок, како би можеле за време на нивното претседателство со ЕУ, заедно да работиме на следната фаза на преговорите со ЕУ и отворањето на Кластерите.
Вицепремиерот Маричиќ и главен преговарач со ЕУ го запозна Албарез со новата иницијатива на министрите за евроинтеграции од земјите на Западен Балкан, кои следниот месец треба да се сретнат во Белград, за да ја договорат заедничка соработка во преговорите со ЕУ и настапување пред Европската комисија, која Албарез ја поздрави и за посака успех.
Вицепремиерот Маричиќ кој е и национален координатор на ИПА се заблагодари на Шпанија за нивниот интерес за поддршка на клучни проекти во областа на заштитата на животната средина и пред се Охридското Езеро и за соработката преку Твининг инструментот, конкретно за финансиската помош да се имплементира проект за усогласување на работењето во согласност со поштенската директива на ЕУ, во вредност од 600.000 евра, кој заврши во 2022 година.
– Одличните билатерални односи и соработка која ја имаме во реализација на реформите, во многу области преку ИПА програмата, од денеска ја продлабочуваме и во процесот на пристапните преговори со ЕУ, што ја потврдува поддршката и искреното пријателство помеѓу двете држави, истакна Маричиќ.
Од Секретаријатот за европски прашања информираат дека вицепремиерот и главен преговарач со ЕУ остварил и тет-а-тет средба со министерот за надворешни работи, ЕУ и соработка на Кралството Шпанија, Хосе Мануел Албарез Буено, на која биле отворени важни теми поврзани со европската перспектива на регионот и поддршката на земјите членки на ЕУ за брз напредок на Северна Македонија.
Министерот за надворешни работи, ЕУ и соработка на Кралството Шпанија, Хозе Мануел Албарез Буено, денеска со неговата посета на Скопје ја заврши турнеја во регионот, во чии рамки ги посети и Република Србија и Албанија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Државна лотарија предупредува: нелегални платформи го злоупотребуваат името и логото
Нелегални интернет платформи неовластено го користат името и логото на Државна лотарија
Државна лотарија ги повикува сите играчи на интернет игри на среќа да внимаваат при изборот на интернет платформи и да учествуваат исклучиво преку официјалните канали на Државна лотарија, со цел да се заштитат од можни злоупотреби, односно, да учествуваат во игри на среќа, кои се транспарентни, регулирани и одговорно приредени.
Државна лотарија, како единствено овластено друштво за приредување игри на среќа во Република Северна Македонија, ја информира јавноста дека исклучиво таа има законско право да приредува лотариски, инстант лотариски и интернет игри на среќа на територијата на државата.
Секоја појава на трета страна, како што се додава, која неовластено користи визуелни елементи, лого или други обележја што претставуваат интелектуална сопственост на Државна лотарија, претставува нелегално користење и кршење на законските прописи, со што се доведува во заблуда јавноста и се нарушува довербата во легалниот систем за игри на среќа.
Македонија
Животните заслужуваат правда: Здруженијата за заштита на животните со иницијатива за укинување на мерката за еутаназија на кучиња со лајшманиоза
Здруженијата за заштита на животните од целата држава имаат со иницијатива за укинување на мерката за задолжително тестирање и автоматска еутаназија на бездомни кучиња со лајшманиоза.
„Ние, здруженијата за заштита на животните од целата држава, заедно ја поднесовме оваа иницијатива пред повеќе од еден месец, со јасно барање – итно укинување на мерката за задолжително тестирање и автоматска еутаназија на бездомни кучиња со лајшманиоза, пропишана во точката 6.2 од Годишната наредба за здравствена заштита на животните“, појаснуваат во соопштението.
Оваа мерка, додаваат, е морален, научен и институционален пораз.
Таа, како што информираат, дозволува убивање на здрави животни под изговор на „заштита“, без никакво јавно-здравствено оправдување.
„Наместо превенција и контрола на векторите – единствениот вистински начин за справување со болеста, државата со години го избира најлесниот и најсуров пат: уништување на живот.
Од нејзиното воведување, мерката по инерција се повторува секоја година, без никакви резултати, легитимира убивање, служи како параван за трошење јавни средства и претставува смртна пресуда за илјадници здрави, мирни бездомни животни.
Ниту една земја од ЕУ не спроведува ваква пракса, ни оние со висока ендемичност како Грција, Италија или Шпанија. Светската здравствена организација, ECDC и CDC јасно укажуваат дека лајшманиозата не се пренесува од куче на човек, туку преку песочни мушички.
Значи, не убивањето, туку превенцијата е одговорот.
Покрај тоа, мерката е длабоко неправедна и дискриминаторска – се применува исклучиво врз бездомни животни, додека сопственичките остануваат надвор од системот. Тоа е двоен стандард, медицински апсурд и цивилизациски срам“.
Бараат надлежните институции итно да ја укинат оваа мерка и да воведат современ, хуман и европски модел за справување со лајшманиозата – преку превенција, лекување, згрижување и вдомување, а не ликвидација.
Ова прашање, оценуваат здруженијата, одамна го надминува полето на ветеринарната политика.
„Ова е прашање на вредности, морал и наука — затоа што мерка што медицински и научно е нелогична не може да биде оправдана ниту законски, ниту човечки.
Дали сакаме држава што убива, или држава што штити?
Македонија може подобро, а животните заслужуваат правда.
Македонија
Арсовска: Како ќе функционира ЈП „Комунална хигиена“ – Скопје во следните пет дена – прашајте го премиерот Мицкоски
„Како ќе функционира ЈП „Комунална хигиена“ – Скопје во следните пет дена прашајте го премиерот Мицкоски кој лично од својот кабинет го наредува овој хаос кој воедно и го најави како интересна разврска на прес конференција непосредно пред да се случи“, вели актуелната градоначалничка на Град Скопје, Данела Арсовска.

„Го повикуваме премиерот Мицкоски кој има своја претседателка на Управен одбор од ВМРО која воедно е и осуден криминалец за 2 кривични дела во 2006 и 2022 година, да го повика Управниот одбор на Комунална хигиена Скопје согласно член 24а став 2 од Законот за јавни претпријатија во случај да донесе одлука за разрешување на директорот и согласно став 3 од истиот член да именува вршител на должност на претпријатието.
Мицкоски го тероризира градот со своето режимско и диктаторско владеење преку својот Управен одбор, злоупотребувајќи ги институциите и полицијата да сее страв и да врши репресија пред избори.
Го прашуваме директно и базирано врз доказите кои граѓаните секојдневно ги изнесуваат во јавност:
1. Дали е приведен директорот на Јавното комунално претпријатие Тетово за еко хаваријата што ја предизвика со отпадот во Вардар и зошто не?
2. Дали е приведен директорот на Јавното комунално претпријатие Гази Баба за еко хаваријата што ја предизвика во Јурумлери со отпадот кој го фрла сред природа со општински камиони и зошто не?
3. Дали е приведен директорот на JП Чистота и зеленило Куманово за еко хаваријата што ја предизвикува секојдневно со отпадот низ Куманово и зошто не?
Или таму РЕЖИМСКИОТ ДИКТАТОР Мицкоски не дал наредба да се апси?“, прашува Арсовска, преку соопштението објавено и на социјалните мрежи.

