Македонија
Маричиќ: Забрзаното спроведување на реформите очекуваме да донесе напредок во евроинтеграцискиот процес

Заменик претседателот на Владата задолжен за европски прашања Бојан Маричиќ денес присуствуваше на брифингот со амбасадорите на земјите членки на ЕУ во организација на Делегацијата на ЕУ, каде ги претстави постигнатите резултати во евроинтегративниот процес и планираните активности во периодот кој претстои.
„Отворањето на пристапните преговори со Северна Македонија е важно и мојата главна порака денес до сите вас би била – да не го изгубиме овој моментум, да дадеме динамика на евроинтегративниот процес и да ја обезбедиме сигурноста и стабилноста на регионот, но и на Европа “, посочи вицепремиерот Маричиќ во обраќањето пред амбасадорите.
Маричиќ истакна дека Владата активно работи на европската агенда и зацртаните приоритети, а паралелно се водат и преговорите со Бугарија во пријателска атмосфера за доаѓање до заедничко и заемно прифатливо решение, изразувајќи уверување дека плодовите од сегашната работа ќе дојдат во месеците кои се пред нас. Во овој контекст вицепремиерот Маричиќ рече дека е крајно време сите да ги здружиме напорите и да се одржи поскоро меѓувладината седница за земјава да го започнеме патувањето кон полноправно членство во ЕУ.
Во обраќањето тој ги запозна амбасадорите и со активностите кои ќе ги реализира Секретаријатот за европски прашања во насока на спроведување на европските реформи, како и планирањата и програмирањето на развојната помош што ја обезбедува Европската Унија преку ИПА, како клучна во ефикасното спроведување на реформите. Шефот на Делегацијата на ЕУ Дејвид Гир ја потврди досегашната соработка и рече дека ќе продолжи поддршката на Унијата во реализирањето на реформите и евроинтегративниот процес на нашата земја.
На крајот, вицепремиерот Маричиќ пред амбасадорите ја истакна важноста од интегрирањето на земјите од Западен Балкан во европското семејство, за напредокот и за стабилноста не само на регионот, туку и на целиот европски континент.
„Она што го гледаме деновиве, со руската агресија врз Украина јасно покажа колку е важно да се заврши обединувањето на континентот, да се направи посилен и поотпорен на какви било сегашни или идни закани. Ова беше позицијата што ја промовиравме во последните неколку децении. Северна Македонија заслужува отворање на пристапните преговори со ЕУ и покрај сè што се случува околу нас, ние сè уште имаме позитивна енергија и оптимизам за иднината на земјата како дел од ЕУ “ рече вицепремиерот Маричиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Не било доволно папаја, манго, аспарагус и други егзотични овошја, Министерството за одбрана набавува кафе и алкохол за 31.000 евра“, велат од СДСМ

„Додека стандардот на граѓаните постојано опаѓа и семејствата едвај врзуваат крај со крај, владата на Христијан Мицкоски и ВМРО-ДПМНЕ продолжува да се луксузира со народните пари. Не било доволно папаја, манго, аспарагус и други егзотични и прескапи овошја, Министерството за одбрана на Мисајловски склучило договори со пет компании за набавка на кафе, вино, ракија, мастика и други алкохолни пијалоци во вредност од 31.000 евра“, соопшти СДСМ.
„Во реалноста, народот не може да си дозволи ниту основни работи. Последните податоци покажуваат дека синдикалната потрошувачка кошничка достигна 65.507 денари, на граѓаните им се потребни речиси 3 минималнни плати за да ги покријат само основните трошоци. Многу производи се недостижни за голем број семејства во државата.
ВМРО-ДПМНЕ ја држи Македонија со најниската минимална плата во целиот регионот и упорно одбива да ги покачи платите и да ги намали цените кои се превисоки. Просечната плата е само една третина од европскиот просек, додека цените на основните производи достигнуваат до 60% од просекот во Европа.
Ваквата расипничка политика на власта е доказ дека Мицкоски и неговите министри се грижат единствено за сопствената удобност, а не за народот кој секој ден тоне во сиромаштија и едвај врзува крај со крај“, се наведува во соопштението на СДСМ.
Македонија
„Народот денес е побогат од времето на СДС, единствена разлика е што нема милиони за Филипче и Заев од државниот буџет“, реагира ВМРО-ДПМНЕ

„Венко Филипче одамна изгубил чувство за реалноста, очигледно некаде по првиот тендер како министер за здравство, но сега откако беше на јахтата на Заев и тоа малку што го имал го нема. Народот денес е побогат од времето на СДС. Единствена разлика е што нема милиони за него и Заев од државниот буџет“, реагира ВМРО-ДПМНЕ на изјавите на Венко Филипче.
„Бројките се секогаш тврдоглави, а тие го говорат следното:
Растот на просечната нето-плата во период од последната година кога ВМРО-ДПМНЕ е на власт е 10.3%, за разлика од периодот кога СДС беше на власт, кога просечната плата порасна за 8.3%.
Уште поголем удар за СДС е фактот што реалниот пораст на просечната плата во период на ВМРО-ДПМНЕ е двојно поголем од периодот на СДС. Имено порастот на реалната плата во време на ВМРО-ДПМНЕ е 6.7%, за разлика од 3.5% во време на СДС. Тоа значи дека стандардот на граѓаните сега, е поголем од времето кога СДС беше власт.
Кога сме кај инфлацијата, и таму бројките се лоши за СДС. Имено во време на СДС инфлацијата во просек изнесувала 4.8%, за разлика од сега кога во просек е 3.6%.
СДС и Филипче може да лажат колку сакаат, но едно не можат да сменат, а тоа е реалноста“, се додава во реакцијата на ВМРО-ДПМНЕ.
Македонија
Муцунски – Кос: реформите поврзани со евроинтеграциите остануваат високо на домашната политичка агенда

Во рамки на дводневната работна посета на Брисел, министерот за надворешни работи и надворешна трговија, Тимчо Муцунски, денеска оствари средба со еврокомесарката за проширување на Европската Унија, Марта Кос.
Соговорниците ја нагласија силната поддршка за проширувањето на Унијата, и од страна на земјите членки и од страна на граѓаните на Северна Македонија – што го потврдуваат и наодите од последниот „Евробарометар“.
На средбата беше поздравен реформскиот пристап на Владата, особено исполнувањето на обврските од реформскиот процес и имплементацијата на Планот за раст. Муцунски нагласи дека реформите поврзани со евроинтеграциите остануваат високо на домашната политичка агенда, со силен фокус на владеењето на правото и борбата против корупцијата.
Изрази благодарност за личниот ангажман на еврокомесарката Кос во пристапниот процес, особено во контекст на нејзиното учество и поддршка на Самитот за Планот за раст, што неодамна се одржа во Скопје.
Соговорниците разменија мислења и за неодамнешното приклучување на државата кон СЕПА, како и за иницијативата за постепено укинување на роаминг трошоците помеѓу земјите од Западен Балкан и Европската Унија. Одлуката за оваа иницијатива се очекува на почетокот на 2026 година, како дел од бенефитите на постепената интеграција во Унијата.
На средбата се дискутираше и за актуелните регионални и глобални случувања, при што беше потврдена заедничката поддршка за Украина и заложбата за што побрзо постигнување на праведен и одржлив мир.