Македонија
Маричиќ: ИПА-поддршката во правосудниот систем, пресудна за напредокот во Поглавје 23 и 24

Денес заменик-претседателот на Владата задолжен за европски прашања и национален ИПА-координатор, Бојан Маричиќ, го отвори петтиот состанок на Секторската работна група за секторот правда, на кој ја потенцираше важноста на овој сектор особено од аспект на европската интеграција.
„Владеењето на правото претставува сржта на пристапувањето на нашата земја во ЕУ, а реформите имаат клучна улога во целиот процес. Земјава вложува значајни напори и ресурси за владеење на правото, градење функционално судство, борба против организираниот криминал, и тоа со единствена цел – да обезбеди економски развој и да овозможи демократија во пракса“, рече Маричиќ.
Според него потребно е соодветно да се координира донаторската помош со цел да биде комплементарна, односно распоредена рационално, да ги покрива реформите за европска интеграција планирани во Националната програма за усвојување на правото на ЕУ, како сеопфатен национален стратешки и програмски документ за водење на процесот на европска интеграција, како и Националниот план за развој кој е во тек и Програмата за економски реформи, со кои практично се заокружува планирањето и одредувањето приоритети на стратешко ниво.
Маричиќ ја истакна и важноста од учеството на граѓанските организации на состаноците на Секторските работни групи со цел да се обезбедат нивните повратни информации за начините како спроведувањето на приоритетите е остварливо, ефективно и ефикасно, како и нивната посветеност за спроведување на некои од приоритетите на терен.
„Верувам дека во следната фаза ќе се обезбеди финансирање на добро дефинираните и договорени приоритети – без разлика на изворот на финансирање, било да е тоа национален буџет и помош од донатори“, рече Маричиќ, информирајќи ги присутните дека е започнат и процесот на програмирање на ИПА 2023-2024 кој ќе се реализира на техничко ниво на секторски работни групи и побара повратна информација од донаторите во однос на презентираните приоритети и идното финансирање на нивната имплементација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.